Jiñi tʼan amén yom i yʌl «cheʼʌchi» o «cheʼʌch yom». Ili tilem ti tʼan hebreo, yom bʌ i yʌl «xucʼul» o «muʼ bʌ i mejlel lac ñop». An qʼuiñil, miʼ cʼʌjñel baʼ woli (choncol) i yujtel meloñel. Jumpʼejl ejemplo, jiñi wiñicob xʼixicob (quixtañujob) miʼ yʌlob «amén» cheʼ bʌ tsaʼ ujti i yʌcʼob i tʼan chaʼan i sujmʌch chuqui tsiʼ yʌlʌyob yicʼot chaʼan mucʼʌch caj i cuchbeñob i wocolel chuqui tsiʼ yʌlʌyob (Nm. 5:22). Cheʼ miʼ yʌlob «amén» tiʼ chiquin yambʌlob, ñumen añʌch chucoch yom miʼ tsʼʌctesañob chuqui tsiʼ yʌlʌyob (Neh. 5:13).

Yaʼ ti capítulo 27 i chaʼan Deuteronomio, an jumpʼejl ñuc bʌ ejemplo chaʼan bajcheʼ tsaʼ cʼʌjñi jiñi tʼan amén. Cheʼ bʌ jiñi israelob ochemobix ti jiñi Lum tsaʼ bʌ wʌn Subentiyob, tsiʼ tempayob i bʌ yaʼ ti wits Ebal yicʼot Guerizim chaʼan miʼ ñʌchʼtañob i pejcʌntel jiñi Mandar i chaʼan miʼ yʌcʼob i tʼan chaʼan mucʼʌch caj i tsʼʌctesañob. Tsiʼ yʌcʼʌyob i tʼan cheʼ tsiʼ yʌlʌyob «amén» cheʼ jajayajl tsiʼ yubiyob baqui tac bʌ i wocolel mi tsiʼ ñusayob tʼan (Dt. 27:15-26). ¡Ñaʼtancu bajcheʼ yubil tiʼ subu i bʌ cheʼ yonlel wiñicob, xʼixicob yicʼot alobob tsiʼ yʌlʌyob jiñi tʼan! (Jos. 8:30-35). Tajol maʼañic baʼ ora tsiʼ ñajʌtesayob i tʼan tsaʼ bʌ i yʌcʼʌyob ti jiñi qʼuin. La cujil chaʼan tsaʼʌch i tsʼʌctesayob come jiñi Biblia miʼ yʌl: «Jini israelob tsiʼ meleyob chuqui yom lac Yum cheʼ cuxul to Josué yicʼot cheʼ cuxul to jini añoʼ bʌ i yeʼtel cʌmbiloʼ bʌ i chaʼan pejtelel tsaʼ bʌ i chaʼle lac Yum tiʼ tojlel israelob» (Jos. 24:31).

Jesús tsiʼ yʌlʌ jaʼel jiñi «amén» chaʼan miʼ yʌcʼ ti cʌjñel chaʼan i sujmʌch chuqui woli (yʌquel) i yʌl, pero wen qʼuexel bajcheʼ tsiʼ cʼʌñʌ. Ili tʼan tsiʼ cʼʌñʌ cheʼ bʌ an chuqui muʼto caj i tech i yʌl chaʼan miʼ ñaʼtʌntel chaʼan cheʼʌchi, mach jiñic cheʼ añix chuqui tsaʼ ujti i yʌl yambʌ quixtañu. Ilayi, jiñi tʼan miʼ chaʼlentel ti traducir bajcheʼ «i sujm». An qʼuiñil,  Jesús chaʼyajl tsiʼ yʌlʌ jiñi tʼan, «amén amén» (Mt. 5:18; Jn. 1:51). Cheʼ bajcheʼ jiñi, tsiʼ pʌsʌ chaʼan mero i sujmʌch jiñi tʼan. Miʼ mejlel i yʌl chaʼan i sujmʌch pejtelel i tʼan come jin jach jiñi aqʼuebil bʌ tiʼ wenta chaʼan miʼ mejlel i yʌcʼ ti tsʼʌctiyel pejtelel chuqui albil i chaʼan Dios (2 Co. 1:20; Ap. 3:14).

Cheʼ bʌ jiñi israelob miʼ cʼʌyiñob Jehová yicʼot miʼ melbeñob oración tac miʼ yʌlob jaʼel jiñi «amén» (Neh. 8:6; Sal. 41:13). Jiñi woli bʌ i yubiñob cheʼ miʼ mejlel jumpʼejl oración, miʼ yʌlob amén tiʼ yujtibal, cheʼ bajcheʼ jiñi miʼ pʌsob chaʼan mucʼʌch i ñopob tsaʼ bʌ ajli. Cheʼ tiʼ pejtelel jiñi israelob miʼ mejlelob i mel iliyi, miʼ ñumen aqʼueñob i tijicñʌyel cheʼ miʼ chʼujutesañob Jehová. Cheʼʌch tsaʼ ujti cheʼ bʌ jiñi rey David tsiʼ chʼʌmʌ majlel ti Jerusalén jiñi Arca i chaʼan Jehová. Cheʼ bʌ woliʼ mejlel qʼuiñijel, tsaʼ ajli utsʼatax bʌ oración cheʼ bajcheʼ jumpʼejl cʼay muʼ bʌ lac taj ti 1 Crónicas 16:8-36. Jiñi tsaʼ bʌ ajli, tsiʼ wen ñijcʌbeyob i pusicʼal jiñi wiñicob xʼixicob i tiʼ pejtelelob «tsiʼ yʌlʌyob, Amén» yicʼot «tsiʼ subuyob i ñuclel lac Yum». Cheʼ juntemel tsiʼ jacʼʌyob bajcheʼ jiñi, ñumen tijicña tsiʼ yubiyob i bʌ.

Jiñi xñoptʼañob ti ñaxam bʌ siglo miʼ yʌlob jaʼel jiñi «amén» cheʼ miʼ yujtelob i yʌqʼuen i ñuclel Jehová. Cheʼ jaʼel, an xtsʼijbaya bibliajob tsaʼ bʌ i cʼʌñʌyob yaʼ tiʼ jun tac (Ro. 1:25; 16:27; 1 P. 4:11). Yaʼ ti libro i chaʼan Apocalipsis, muʼto i yʌjlel jaʼel chaʼan an ángelob woli bʌ i yʌqʼueñob i ñuclel Jehová yaʼ ti panchan i miʼ yʌlob: «Amén. Aleluya» (Ap. 19:1, 4). Jiñi ñaxam bʌ xñoptʼañob miʼ yʌlob «amén» cheʼ miʼ yujtel i mejlel oración yaʼ ti tempa bʌ tac (1 Co. 14:16). Pero jiñi tʼan mach cheʼ jach yom miʼ toʼol ajlel.

Jiñi tsaʼix bʌ laj qʼuele miʼ coltañonla lac ñumen chʼʌmben i sujm chucoch ñuc i cʼʌjñibal cheʼ mi la cʌl «amén». Mi mucʼʌch la cʌl cheʼ mi la cujtel lac mel jumpʼejl oración, mi lac pʌs chaʼan loqʼuemʌch ti lac pusicʼal tsaʼ bʌ la cʌlʌ. I cheʼ mi la cʌl «amén» cheʼ bʌ miʼ yujtel ti mejlel jumpʼejl oración, ti cʼam bʌ tʼan o ti mucul jach, mi lac pʌs  chaʼan cheʼʌch mi lac ñaʼtan o mi la cubin cheʼ bajcheʼ tsaʼ ajli. Laʼ laj qʼuel yan tac bʌ i sujmlel cheʼ yomʌch mi la cʌl «amén».

Come cheʼ miʼ lac ñʌchʼtan cheʼ miʼ mejlel oración jiñʌch junchajp ochem bʌ ti lac chʼujutesaya. Cheʼ weñʌch lac melbal cheʼ wolito i mejlel jumpʼejl oración jiñʌch bajcheʼ mi lac chʼujutesan Jehová jaʼel, mach cojach ti bajcheʼ mi lac jacʼ cheʼ miʼ yujtel ti mejlel. Muʼ bʌ i mejlel i coltañonla chaʼan toj añonla yicʼot mi lac wen ñʌchʼtan cheʼ miʼ mejlel oración, jin cheʼ ti jumpʼejl lac pusicʼal la com la cʌl «amén».

Come mi lac pʌs chaʼan temel añonla la quicʼot la quermañojob. Cheʼ choncol i mejlel oración yaʼ ti congregación, pejtelel jiñi hermanojob juntemel miʼ ñʌchʼtañob woli bʌ ti ajlel (Hch. 1:14; 12:5). Cheʼ juntemel mi la cʌl «amén», miʼ coltañonla chaʼan ñumen temel mi la cajñel. Anquese ti cʼam mi la cʌl o ti lac pusicʼal jach, mi lac ñumen aqʼuen i ñaʼtan Jehová chaʼan yomʌch miʼ yʌqʼueñonla chuqui tsaʼ laj cʼajtibe ti temel.

Come cheʼʌch mi la cʌqʼuen i ñuclel Jehová. Miʼ qʼuel pejtelel muʼ bʌ lac mel chaʼan mi lac chʼujutesan, anquese mach wen ñuquic mi laj qʼuel (Lc. 21:2, 3). Dios miʼ qʼuel chucoch mi lac mel yicʼot chuqui an ti lac pusicʼal. Anquese tajol maʼañic mi lac mejlel ti majlel ti tempa bʌ i ti teléfono jach mi lac ñʌchʼtan, miʼ mejlel lac ñop chaʼan mucʼʌch i yubin cheʼ mi la cʌl «amén». Jiñi muʼ bʌ lac jacʼ yaʼʌch ochem ti jiñi chʼujutesaya muʼ bʌ i yʌqʼuentel Jehová ti congregación.

Cheʼ bajcheʼ tsaʼix laj qʼuele, tajol mach wen ñuquic i cʼʌjñibal yilal cheʼ mi la cʌl «amén», pero ñucʌch i cʼʌjñibal. Jiñi libro Perspicacia miʼ yʌl chaʼan ili tʼan miʼ cʼʌjñibʌyel chaʼan mi la cʌcʼ ti cʌjñel ñopol bʌ lac chaʼan yicʼot jiñi lac pijtaya am bʌ ti lac pusicʼal. Jin chaʼan, cheʼ jajayajl mi la cʌl «amén», utsʼat mi caj i qʼuelonla Jehová (Sal. 19:14).