Na vosa vakavalagi ni “emeni” e kena ibalebale “me yaco mada ga,” se “io.” E vu mai na vosa vakaIperiu e kena ibalebale na “yalodina,” kei na “nuitaki.” E dau cavuti ena so na gauna ena bubului. Ni sa bubului oti e dua, ena kaya na emeni me vakadeitaka ni donu na ka e cavuta, ena lewai tale ga ena ka kece e bubuluitaka. (Tiko 5:22) Ni tukuna e matanalevu na “emeni,” qori ena uqeti koya me dei ena ka e bubuluitaka.—Niem. 5:13.

E volai ena Vakarua wase 27 e dua na sala vakasakiti e cavuti kina na “emeni.” Nira butuka na Vanua Yalataki na Isireli, a vinakati mera soqoni ena lomadonu ni Ulu i Ipali kei Ulu i Kirisimi mera rogoca ni wiliki e cake na Lawa. Ena vinakati mera rogoca, mera duavata tale ga kei na ka e wiliki. Era vakaraitaka nodra duavata nira tukuna “Emeni!” ena gauna e wiliki kina na isau ni talaidredre. (Vkru. 27:15-26) Raitayaloyalotaka mada na domodra e vica vata na udolu na tagane, yalewa, kei na gone nira cavuta vakadomoilevu, “Emeni!” (Josua 8:30-35) Era na sega vakadua ni guilecava na ka kece era cavuta ena siga qori. Era cakava na Isireli na ka kece era bubuluitaka, ni volai me baleti ira: “Era qaravi Jiova tiko ga na Isireli ena gauna taucoko i Josua kei na nodra gauna taucoko na qase era bula tiko ni sa mate o Josua, era kila tale ga na ka kece e vakayacora o Jiova vei ira na Isireli.”—Josua 24:31.

E cavuta tale ga o Jisu na “emeni” me vakadeitaka ni dina na ka e tukuna, ia e duatani na sala e vakayagataka kina. E sega ni tukuna “emeni” (kena vakadewa vakavalagi  “e dina”) ni cavuti oti e dua na ka, ia e cavuta rawa ni bera ni tukuna e dua na ka me vakadeitaka ni dina. So na gauna, e dau cavuta veitaravi “emeni emeni” (e vakadewataki vakaViti me “au kaya vakadodonu”). (Maciu 5:18; Joni 1:51) Qori me vakadeitaka vei ira na rogoci koya ni dina na ka e tukuna. Sa rauta me vosa va qori o Jisu ni o koya ga e vakadonuya na Kalou me vakayacora na nona vosa ni yalayala.—2 Kor. 1:20; Vkta. 3:14.

Era cavuta tale ga na Isireli na “emeni” nira vakacaucautaki Jiova kei na nodra masu. (Niem. 8:6; Same 41:13) Nira cavuta na vakarorogo na “emeni” ni oti na masu, e vakaraitaka nira sa duavata kei na ka e masulaki. Qo e dua na sala era vakaitavi kece kina, era marautaka tale ga nodra qaravi Jiova. A yaco qori ena gauna e kauta mai kina o Tui Tevita na Kato i Jiova i Jerusalemi. Ni caka na kena soqo, e qai cavuta nona masu o Tevita mai vu ni lomana me vaka e dua na sere. E volai qori ena 1 Veigauna 16:8-36. E uqeti ira sara ga na vakarorogo na ka e cavuta, “era [qai] kaya kece na lewenivanua, ‘Emeni!’ era vakacaucautaki Jiova sara.” Dua na ka nodra marau nira duavata ena sokalou.

Era cavuta tale ga na “emeni” na lotu vaKarisito ena imatai ni senitiuri nira vakacaucautaki Jiova. Era vola tale ga na dau vola iVolatabu. (Roma 1:25; 16:27; 1 Pita 4:11) E vakamacalataki ena Vakatakila nira vakacaucautaki Jiova na kabula vakayalo mai lomalagi nira kaya: “Emeni! Vakacaucautaki Ja!” (Vkta. 19:1, 4) Nira dau soqoni na lotu vaKarisito ena gauna e liu, era dau cavuta na “emeni” ni oti na masu. (1 Kor. 14:16) Era sega ni dau cavuta wale tu ga na vosa qori.

Nida sa kila na inaki era cavuta kina na “emeni” na dauveiqaravi i Jiova, sa qai  matata na vuna meda tinia kina na masu ena “emeni.” Nida vakaemeni ni oti noda masu, e vakaraitaka nida masu mai vu ni lomada. Nida vakaemeni tale ga ni oti nona masu e dua, ke sega mada ga ni rogoci, e vakaraitaka nida duavata kei na ka e masulaki. Dikeva eso tale na vuna e bibi kina noda cavuta na “emeni.”

Eda rogoca vinaka na masu ni okati ena noda sokalou. Na masu e okati ena noda sokalou vei Jiova. E bibi gona na ka eda cavuta kei na noda itovo ena gauna ni masu. Nida vinakata me vakaibalebale noda “emeni,” eda na doka na masu qai vakarorogo vinaka.

Eda na duavata ena sokalou. Ni dua e masu e matanalevu, era rogoca kece na lewe ni ivavakoso. (Caka. 1:14; 12:5) Nida cavuta na “emeni” kei ira na tacida ni oti na masu, e vakaduavatataki keda. Ke da cavuta lo, se cavuta e cake, ena rogoca o Jiova na ka eda kerea vakaivavakoso.

Eda vakacaucautaki Jiova. E raica vinaka tu o Jiova na noda ivakarau ni sokalou, ke sega mada ga ni laurai levu. (Luke 21:2, 3) E kila vinaka na ka e tu e lomada kei na inaki ni ka eda cakava. Ke da soqoni mada ga mai vale ena talevoni, eda kila ni kauaitaka tale ga o Jiova na noda vakaemeni. Eda duavata tiko kei ira na tacida ena noda vakacaucautaki Jiova.

Ena rairai nanumi ni dua ga na ka lailai na vakaemeni, ia e bibi dina. E kaya e dua na Bible encyclopedia: “Nira cavuta na tamata ni Kalou e dua na vosa qo, era vakaraitaka kina na nodra nuidei, veitokoni, kei na nodra vakanuinui.” Me vakamarautaki Jiova mada ga na noda dau vakaemeni. —Same 19:14.