Embo ndi “amen” ri heya kutja “otjingaperi,” poo “ngape kare nao.” Oro ra zira kembo rOtjiheberi ndi heya “rira omuṱakame.” Povikando tjiva embo ndo aari ungurisiwa moviṋa vyozoveta. Indu omundu tja tjiti oruyano, eye aa tja “amen” okuraisa kutja imbi mbya hungire ovyo ouatjiri, nokutja eye ma yakura oviṋa avihe mbi mavi kongorere ko. (Num. 5:22) Omundu tja ungurisa embo ndo mokati kovandu, eye wa ri nonḓero yomasa okuṱakamisa omambo we ngo.​—Neh. 5:13.

Otjihorera otjinanambango tjomaungurisiro wembo ndi “amen” tji ri mu Deuteronomium ekondwa 27. Kombunda Ovaisrael tji va za nokuhita mEhi Ekwizikwa, owo va woronganene pamwe pokati kOndundu Ebal nOndundu Gerizim kokutja ve zuve Omatwako. Owo kana ve ya mbo okupuratena uriri posi yokutja owo aave sokuraera ovandu avehe kutja va yakura Omatwako ngo. Indu tji va leserwa oviṋa mbi mavi tjitwa kuwo tjinangara kave ṱakamisire Omatwako ngo, owo va tja: “Amen!” (Deut. 27:15-26) Ripura uriri nombosiro yovarumendu, ovakazendu novanatje omasere omengi amave zirire pamwe! (Jos. 8:30-35) Owo mape ya kave zembire omambo ngu va hungira eyuva ndo. Ovaisrael mbo va tjita imbi mbi va hungira, orondu Omatjangwa ye tja: “Otjiwaṋa tja lsrael tja karera Muhona, Josua ngunda a ri nomuinyo; nu kombunda yonḓiro ye owo va kara pokukarera Muhona, imba ovanane mbuyave tjiwa oviṋa avihe mbya tjita ku Israel ngunda ava ri nomuinyo.”​—Jos. 24:31.

Jesus wina wa ungurisa embo ndi “amen” tjaa vanga okuraisa kutja imbi mbi ma hungire ovyo ouatjiri, posi yokutja eye wa tjita nao momuano wa peke. Pendje nokutja “amen” kombunda yokuhungira otjiṋa, Jesus aa tja “amen” (nda torokwa mOmbeibela yOtjiherero otja “tjiri”) komurungu  yokuhungira otjiṋa momuano wokuṋuṋisa epu re. Povikando tjiva, eye aa tja: “Amen amen.” (Mat. 5:18; Joh. 1:51) Kunao eye aa tjiti kutja ovapuratene ve ve mune kutja omambo we ouatjiri. Jesus aa yenene okuhungira nao mena rokutja eye wa ri nouyara wokutjita kutja omakwizikiro aehe wa Mukuru ye yeninisiwe.​—2 Kor. 1:20; Omavan. 3:14.

Ovaisrael wina aave ungurisa embo ndi “amen” indu tjaave tanga Jehova nokukumba ku Ye. (Neh. 8:6; Eps. 41:13) Mokutja “amen” kombunda yongumbiro, aa tji raisa kutja owo va yakura avihe mbya hungirwa mongumbiro. Avehe mbaari mbo aave yenene okukara norupa mokurikotamena ku Jehova momuano mbo. Wina pa tjitwa nao indu Ombara David tja eta Otjipwikiro tjOmerikutiropamwe wa Ndjambi koJerusalem. Ngunda ave ri menyando, David wa kumba ku Jehova okuza komutima momuano weimburiro rondangero otja tji pa tjangwa 1 Ekuruhungi 16:8-36. Ovandu mba ri mbo va ṱunwa tjinene i yomambo we ngo nga ‘otjiwaṋa atjihe tji tja tja: “Amen! Muhona nga tangwe!”’ Otjingaperi kutja, owo va ri nondjoroka okurikotamena ku Jehova pamwe.

Ovakriste veserewondo etenga wina aave ungurisa embo ndi “amen” indu tjaave tanga Jehova. Ovatjange wOmbeibela povikando aave ungurisa embo ndo motutuu twawo. (Rom. 1:25; 16:27; 1 Petr. 4:11) Embo rOmavandururiro wina ri raisa oviutwa vyombepo a mavi tanga Jehova nomambo nga: “Amen! Haleluja! Tangeye Muhona!” (Omavan. 19:1, 4) Ovakirste woruveze orukuru aave tja “amen” kombunda yongumbiro indu tji ve ri pozombongarero zawo. (1 Kor. 14:16) Posi yokutja, oro ka ra ri embo rokuyarukira po uriri nungwari aave sokuripurira ko.

Otja tji twa munu omuano ovakarere va Mukuru maave ungurisa embo ndi “amen,” tu muna ounanḓengu wokuhungira embo ndo okupata na ro ongumbiro. Indu tji twa hungire embo ndo kombunda yongumbiro yetu, tu raisa kutja imbi mbi twa hungire vya zu komutima tjiri. Indu tji twa tja “amen,” nandarire mongumumu, kongumbiro  ndja kumbwa i yomundu warwe kutja varwe ve zuve, tu raisa kutja matu kupasana na imbi mbi vya hungirwa. Tara kepu rarwe rokutja ongwaye okutja “amen” tje ri otjiṋa otjinanḓengu.

Tu yandja ombango mena rokutja orupa romerikotameneno wetu. Eṱe wina tu rikotamena ku Jehova momuano mu matu yandja ombango komundu ngu ma kumbu nungwari ka mokuyakura ongumbiro uriri. Mena rokutja matu vanga okutja “amen” ndji mai zu komutima tjiri, ihi tji tu vatera kutja tu kare noumune ouwa nu tu yandje ombango kongumbiro.

Twa wana otjovakarere va Mukuru. Ongumbiro ndji kumbwa kutja ovandu avehe ve zuve i yandja ombango ku imbi ombongo aihe mbi mave zuu. (Oviung. 1:14; 12:5) Indu tji matu tja “amen” puna ovakambure ovakwetu, tu wanena ko. Nandarire indu tji twa tja “amen” pamwe, mongumumu poo ndji mai zuvakwa, ihi tji hinga Jehova okutjita ihi tji twe mu ningire.

Tu tanga Jehova. Jehova u muna avihe mbi tu mu tjitira momerikotameneno wetu nandarire kutja o mouṋa ouṱiṱi. (Luk. 21:2, 3) Eye u tjiwa ozondando nḓu matu vanga okutjita na imbi mbi ri momitima vyetu. Nandarire kutja matu puratene kozombongarero zombongo okupitira mongoze, tu nongamburiro kutja Jehova u puratena indu tji matu tja “amen” nomerisusuparisiro. Indu tji twa tja “amen,” tu ri kuta kuna imba mbe ri pozombongarero zombongo mokutanga Jehova.

Indu tji twa tja “amen” mape ya a i munika aayo ka i nonḓengu, posi yokutja i nonḓengu tjinene. Embo ndi Bible encyclopedia ri tja ovakarere va Mukuru mave yenene okuraisa “ongamburiro, omayakuriro, nomaundjiro ngu ve nawo momitima vyawo, okupitira momaungurisiro wembo rimwe ndo.” Matu zeri kutja o “amen” aihe ndji matu hungire, i yakurwe i Jehova.​—Eps. 19:14.