“Isẹ” Nin Uwẹ Gbe Ọbhi Erọnmhọn Ti Jehova Bhọ
JEHOVA ghe oga nin mhan ga ọle bọsi emhin nọn ghanlẹn. Ọle ‘gbehọkotọ ka ene ga ọle ehọ.’ Emhin rebhe nin ele lu rẹ gẹn ọlẹn, ọle daghe ọle aharẹmiẹn ọ dia khere. (Mal. 3:16) Bhi ọsi ijiẹmhin, bha ji mhan tẹmhọn ukpọta nin mhan kẹ wo noo. Ọne ọta hi “isẹ.” Ọne ukpọta nan manman ghan bhi ẹlo nọnsi Jehova. Bha ji mhan zilo nyan ebi ọne ukpọta mundia nan, bi uwedẹ nin ẹbho rẹ ha noo ọle yẹ bhi Baibo. Bhiriọ, mhan ki sabọ lẹn ebezẹle nọn da manman ghan bhi ẹlo nọnsi Jehova.
ENE ẸBHO REBHE KI YỌLE ‘ISẸ!’
Ukpọta nin Esan tiọle “isẹ,” “amẹn” a tiọle bhi urolo Ebo. Ebi a re “isẹ” ta hi, “ji ọle sẹ bhi iriọ” la “gene gene.” Bhi urolo iHebrew, ebi ọ mundia nan hi, “ha yi ọne a gba ẹkẹ ọle,” bi “ha yi ọnan sabọ mun udu tẹ.” Ẹgheso, a noo ọle bhi kotu ahamiẹn ọria ve ive. Ọne ọria ha ve ive fo, ọle ki yọle “isẹ” nin ọle rẹ rẹman ghe ẹmhọanta ọle tale, bi nin ọle rẹ rẹman ghe, ọle muegbe nin ọle rẹ miẹn emhin nọn iki rẹ khin nọn ha nabhọre ọbhi egbe. (Num. 5:22) Ọle ha re inian ve ọne ive fo bhi sira ẹbho rebhe, ọle ki ranmhude ọnan lu beji ọle ve.—Neh. 5:13.
Deuteronomy 27 tẹmhọn uwedẹ ọkpa nin ibhokhan Izrẹl rẹ noo “isẹ” bhi Baibo. Ẹghe nin ibhokhan Izrẹl rẹ sẹbhi otọ nan ve nin ele, a da yọle nin ele si koko bhi oke ọsi Ebal bi Gerizim. Bhi enin, a ki tie man ele Uhi nin Osẹnobulua na bhi obọ iMoses gbe. Ele bha wo gheghe vae dọ kaehọ. Ele dẹ yẹ rẹman si ele dẹ re obọ rẹkhan ọlẹn. Be ele ha rẹ rẹman yẹ si ele muegbe nin ele rẹ rẹkhan ọlẹn? Uwedẹ nin ele ha rẹ lu ọle hi, a ha sounun bhi emhin nọn ha nabhọre sade ele gbobọ ra ene Uhi, ele ki yọle “Isẹ!” (Deut. 27:15-26) Re ọkhọle ẹ riale ebi ọ diayẹ ẹghe nin usun ẹbho ne sikoko rẹ wo kugbe reso yọle “isẹ!” (Josh. 8:30-35) Bhi ọsi ẹmhọanta, ele ida yele ọne ukpẹdẹ a ghee. Ene ibhokhan Izrẹl da gene wo lu rẹkhan ebi ele ta. Baibo taman mhan yọle: “Ibhokhan Izrẹl da wo ha ga iJehova ikpẹdẹ rebhe nin Joshua rẹ ha nyẹnlẹn, bi ikpẹdẹ rebhe ọsi ewanlẹn ne tọ gbera iJoshua, ne yẹ lẹn emhin rebhe nin Jehova lu nin Izrẹl.”—Josh. 24:31.
Jesu yẹ noo “isẹ” rẹ rẹman ghe, ẹmhọanta ọta nan ta khin. Ọkpakinọn, uwedẹ ikẹ ọle rẹ ha noo ọle. Jesu bha ha gbe “isẹ” rẹ wanniẹn ọta ọsi ẹbho. Ọkpakinọn, ọle noo “isẹ” rẹ munhẹn ha ta ọta, nin ọle rẹ rẹman ghe ẹmhọanta ene ọta khin (bhi urolo Ebo, ebi a re ọne “isẹ” nan ta hi “bhi ọsi ẹmhọanta”). Ẹghe eso, ọle ki tale igba eva yọle, “isẹ, isẹ.” (Matt. 5:18; John 1:51) Ọle re ọnan taman ene ka ọle ehọ ghe, ẹmhọanta tee, ọle ene ọta khin. Jesu wo sabọ re inian ha talọ, ranmhude, ọle Osẹnobulua re ahu nan nọn rẹ mun ive nesọle rebhe sẹ.—2 Cor. 1:20; Rev. 3:14.
ENE ẸBHO DA YỌLE “ISẸ!” ELE DA YẸ HA GẸN IJEHOVA
Ibhokhan Izrẹl yẹ ha noo “isẹ” sade ele gẹn Osẹnobulua yẹ nan erọnmhọn ji ọle. (Neh. 8:6; Ps. 41:13) Ele noo “isẹ” rẹ kpẹn erọnmhọn, nin ele rẹ rẹman ghe, ele re obọ ọbhi ọne erọnmhọn. Bhiriọ, ọrebhe ki sabọ ha mhọn obọ bhi oga nọn zẹle ele sikoko, ele ki yẹ manman sọnyẹnmhẹn bhọ. Ọnan sunu ẹghe nin David nin Ojie rẹ mun ẹkpẹti natiọle Ark vae bhi Jerusalẹm. Ẹghe nin ele ki rẹ ha lu iluemhin ranmhude ele mun ọne Ark re bhi Jerusalem, David da so illo rẹ nan erọnmhọn. 1 Chronicles 16:8-36, ọle ọne erọnmhọn ye bhi Baibo. Ọnan da wo manman rẹso ene ka ehọ. Bhiriọ, ele da yọle, ‘Isẹ!’ ele da yẹ ha gẹn iJehova. Bhi ọsi ẹmhọanta, okugbe nin ele rẹ gbe “isẹ” ọbhi ọne erọnmhọn da wo kie re ba eghọnghọn nọnsele ọne ukpẹdẹ nin.
Kristiẹn bhi ore nin ọhẹnhẹn noo “isẹ” rẹ gẹn iJehova. Ẹbho ne gbẹn iBaibo yẹ ha noo ọle bhi ebe nin ele gbẹn bhi Baibo. (Rom. 1:25; 16:27; 1 Pet. 4:11) Bhi ebe nọnsi Revelation, a da tale ghe, ẹhi ne ribhi okhun gẹn Jehova yọle: ‘Isẹ! Ogẹn ọsi Jah!’ (Rev. 19:1, 4) Kristiẹn bhi ore nin ọhẹnhẹn yẹ ha gbe “isẹ” ọbhi erọnmhọn bhi ikolo oga. (1 Cor. 14:16) Ọkpakinọn, ele bha wo gheghe ha noo ọne ukpọta nan.
EBEZẸLE NỌN DA YI EMHIN KPATAKI NAN RẸ YỌLE “ISẸ”
Uwedẹ nin ene ga Osẹnobulua bhi ẹghe ẹdẹlẹ rẹ ha noo “isẹ” rẹman ghe, emhin kpataki nọn nan rẹ ha re “isẹ” kpẹn erọnmhọn. Ahamiẹn mhan tale rẹ kpẹn erọnmhọn nin mhan tobọmhan nan, mhan ki rẹman ghe, ẹkẹ ọkhọle ọne erọnmhọn na vae, ghe mhan bha gheghe nanlẹn. Sẹyẹ, ahamiẹn mhan tale dagbare, la mhan tale bhi ẹkẹ ọkhọle nọnsẹmhan sade ọria rẹ mhan nan erọnmhọn, mhan ki rẹman ghe mhan re obọ bhi erọnmhọn nin ọle nanlẹn. Bha ji mhan zilo nyan emhin ebhebhe ne rẹman ghe emhin kpataki nọn nan rẹ ha gbe “isẹ” ọbhi erọnmhọn.
Mhan gbehọkotọ nọnsẹn sade ọria rẹ mhan nan erọnmhọn, beji mhan ha da sabọ yọle “isẹ.” Ọkhẹke nin mhan gbẹhokotọ nọnsẹn yẹ ha mun ekpẹn ọbhi egbe sade a nan erọnmhọn, ranmhude oga ọnan khin rẹji Jehova. Ranmhude mhan ho nin mhan sabọ re ọkhọle rebhe rẹ gbe “isẹ” ọbhi erọnmhon, ọkhẹke nin mhan fẹkẹ mun ekpẹn ọbhi egbe, yẹ denọ ọkhọle ọbhi ọne erọnmhọn.
Mhan mhọn okugbe bhi oga. Emhin ọkpa mhan bi ibhio mhan nekẹle bhi ẹkẹ agbotu koko re ehọ ọi, sade ọria rẹ mhan nan erọnmhọn. (Acts 1:14; 12:5) Ahamiẹn mhan rebhe kugbe gbe “isẹ” ọbhi erọnmhọn, okugbe nin mhan mhọn bhi ẹwẹ mhan ki tuẹn okhun. Aharẹmiẹn ẹkẹ ọkhọle mhan da gbe “isẹ,” la mhan tale dagbare, Jehova dẹ ranmhude ọne “isẹ” lu beji mhan rebhe kugbe bhii ọle.
“Isẹ” nin mhan ta deba ogẹn nin mhan gẹn iJehova
Mhan re ogẹn ji Jehova. Jehova daghe emhin rebhe nin mhan lu rẹ ga ọle. (Luke 21:2, 3) Ọle daghe ebe re imhan bhi ọkhọle, rẹsẹbhi ebezẹle nin mhan da lu emhin nin mhan lu. Aharẹmiẹn foni mhan rẹ sabọ deba ikolo oga ranmhude mhan bha sabọ yo, mhan lẹn sẹbho ghe Jehova dẹ họn “isẹ” nọnsẹmhan. Gene gene, ọ yẹ deba ogẹn nin mhan kugbe re nin Jehova.
Arẹmiẹn ukpọta ọkpa “isẹ” khin, ọta nọn wo mhanmhan ghan nọn. Ebe ọkpa da tale ghe, ene ga Osẹnobulua dẹ sabọ noo ọne ukpọta nan rẹ rẹman ghe, ele mhọn iruduba, urẹọbhọ, bi ikhuaẹloghe. Mhan nan erọnmhọn ghe, nin “isẹ” rebhe nin mhan ta ha ti Jehova bhọ.—Ps. 19:14.
