Jehova oha kala a hafa ngeenge to ti “amen”
JEHOVA okwa lenga onghedi yetu yoku mu longela. Oha ‘dimbulukwa noha udu’ ovapiya vaye, nokwa lenga keshe osho hatu ningi, opo tu mu hambelele, kashi na nee mbudi kutya oshinini unene. (Mal. 3:16) Pashihopaenenwa, diladila koshitya “amen” osho hatu popi lwoikando ihapu. Mbela Jehova okwa lenga ngoo outumbulilo oo wanafangwa? Heeno. Opo tu shiive kutya omolwashike, natu ka konakoneni kutya oshitya osho osha hala okutya shike, nosha longifwa ngahelipi mOmbiibeli.
‘OVANHU AVESHE NAVA TYE: “AMEN!”’
Oshitya “amen” otashi ti “nashi kale ngaho, ile “oshoshili.” Osha dja koshitya shOshiheberi tashi ti, “kala omudiinini,” “kala omulineekelwa.” Omafimbo amwe, osha li hashi longifwa moinima yopaveta. Shimha omunhu a li a ninga eano, okwa li ha ti “amen,” opo a koleke kutya osho a popya oshoshili nonokutya ota ka tambula ko oilanduliko yaasho a popya. (Num. 5:22) Ngeenge okwa ti “amen” moipafi, okwa li ha kala e na etomheno la kola lokuwanifa po eudaneko laye. — Neh. 5:13.
Oshihopaenenwa sha denga mbada shanghee oshitya “amen” sha longifwa, oshi li muDeuteronomion etukulwa 27. Konima eshi Ovaisrael va ya mEdu lEudaneko, ova li ve na okwoongala pokati komhunda yaEbal nosho yo omhunda yaGerisim, opo va ka ude eshi Omhango tai leshwa mokule. Kava li ashike tava pwilikine, ndele ova li yo tava ulike kutya ova tambula ko Omhango. Eshi oidjemo yokuhadulika ya leshwa, ova li va tya “Amen.” (Deut. 27:15-26) Diladila nee ovanhu omayovi tava nyamukula ngaho mokule. (Jos. 8:30-35) Kava li va dimbwa oitya oyo va li va popya efiku olo. Ovaisreal ovo ova li metwokumwe neendjovo davo, nOmbiibeli oya ti: “Ndele Ovaisraeli va longela Omwene omafiku aeshe fimbo Josua kwa li e nomwenyo nomafiku aeshe fimbo ovakulunhu ava va kala efimbo lile nomwenyo konima yefyo laJosua ava va shiiva nawa oilonga aishe yOmwene, Ye e i ningila Israel.” — Jos. 24:31.
Jesus okwa li yo a longifa oshitya “amen,” opo a koleke oushili waasho sha li sha popiwa, ashike okwa li e shi ninga monghedi ye likalekelwa. Jesus ka li ha ti “amen” ngaashi ovanhu hava ti konima ngeenge umwe a popya sha, ndele ponhele yaasho, okwa li ha ti “amen” (osho sha tolokwa mOshiingilisha kutya “oshoshili”) ofimbo ina popya sha, opo a divilike kutya osho ta ka popya oshoshili. Omafimbo amwe, okwa li ha endulula oshitya osho ta ti, “amen amen.” (Mat. 5:18; Joh. 1:51) Okwa li ha shilipaleke ovapwilikini vaye kutya eendjovo daye odoshili. Jesus okwa li ha popi e na oushili, molwaashi oye a li a pewa eenghono dokuwanifa po omaudaneko aKalunga. — 2 Kor. 1:20; Eh. 3:14.
“NOVANHU AVESHE TAVA TI: ‘AMEN!’ NOVA HAMBELELA OMWENE”
Ovaisrael navo ova li hava longifa oshitya “amen” ngeenge tava hambelele nokwiilikana kuJehova. (Neh. 8:6; Eps. 41:13) Eshi ovo va li tava pwilikine va ti “amen” konima yeilikano, ova li va ulika kutya ova dimina osho sha popiwa. Kungaho, aveshe ovo va li po ova li tava dulu okukufa ombinga nokulongela Jehova nehafo. Osho osho sha li sha ningilwa ohamba David eshi ya li ya twala oshikefa shaJehova kuJerusalem. Pefimbo loshivilo, okwa li a ilikana eilikano tali di komutima li li moludi leimbilo, olo li li mo 1 Omafimbo 16:8-36. Ovo va li po ova li va kumwa keendjovo daye, “novanhu aveshe tava ti: ‘Amen!’ nova hambelela Omwene.” Ova li va hafa okulongela Jehova pamwe.
Ovakriste vomefelemudo lotete navo ova li hava longifa oshitya “amen” ngeenge tava hambelele Jehova. Ovashangi vOmbiibeli ove shi longifa luhapu meenhumwafo davo. (Rom. 1:25; 16:27; 1 Pet. 4:11) Embo lEhololo ola popya kutya oishitwa yopamhepo meulu oya fimaneka Jehova ya ti: “Amen, Halleluya!” (Eh. 19:1, 4) Ovakriste vonale ova li hava ti “amen” konima yeilikano pokwoongala kwavo. (1 Kor. 14:16) Ashike kava li hava longifa oshitya osho lwoikando nopehe na okudiladila kusho.
OMOLWASHIKE OKUTYA “AMEN” KWOYE TAKU TI SHA?
Konima eshi twe lihonga nghee ovapiya vaJehova vali hava longifa oshitya “amen,” otwa mona kutya oshi li pandunge okutya “amen” pexulilo leilikano. Ngeenge hatu ti “amen” pexulilo leilikano letu lopaumwene, ohatu ulike kutya osho twa popya oshoshili. Nongeenge hatu ti “amen” momutima, ohatu ulike kutya otwa dimina osho sha popiwa meilikano. Diladila vali kutya, omolwashike okutya “amen” tashi ti sha.
Ohatu yandje elitulemo ngeenge umwe ta ilikana molwaashi eilikano oli li oshitukulwa shelongelokalunga letu. Ngeenge hatu ilikana kuJehova, ihatu ulike ashike kutya ohatu mu longele mwaasho hatu popi, ndele ohatu shi ulike yo melihumbato letu. Molwaashi otwa hala okutya “amen” tashi di komutima, otashi ke tu kwafela tu kale tu na elihumbato liwa nokuyandja elitulemo keilikano.
Otwa hangana tu li ovalongeli vaJehova. Atushe meongalo ohatu yandje elitulemo keilikano lomoipafi. (Oil. 1:14; 12:5) Ngeenge hatu nyamukula oshita novamwatate novamwameme, ohashi tu hanganifa unene. Ngeenge otwa ti “amen” mokule ile momutima, otashi ke linyengifa Jehova e tu pe osho twe mu pula.
Ngeenge hatu ti “amen” ohatu hambelele Jehova
Ohatu hambelele Jehova. Jehova oku shii oilonga yetu aishe oyo hatu mu longele. (Luk. 21:2, 3) Oku shii omalinyengotomheno etu naasho shi li momutima wetu. Nokuli nonande otashi dulika tu pwilikine okwoongala okupitila mongodi, ohatu dulu okukala noushili kutya ngeenge twa ti “amen,” Jehova ohe tu udu. Ngeenge twa ti “amen,” atushe pamwe naavo ve li pokwoongala ohatu hambelele Jehova.
Oshitya “amen” otashi dulika tashi monika sha fa sha nafangwa, ashike otashi ti sha. Ombiibeli yo-encyclopedia oya popya kombinga yovapiya vaKalunga ya ti: “Okutala kunghee oshitya osho sha longifwa, ohava popi osho shi li momutima wavo ve na elineekelo, oushili nosho yo eteelelo.” Okutya kwetu “amen” naku kale ta ku wapalele Jehova. — Eps. 19:14.
