‏«اۋمين» دەگەن ٴ‌سوز «سولاي بولسىن»،‏ «راس» دەگەندى بىلدىرەدى.‏ بۇل ٴ‌سوز «ادال بولۋ»،‏ «سەنىمدى بولۋ» دەگەندى بىلدىرەتىن ەۆرەي سوزىمەن تۇبىرلەس كەلەدى.‏ كەيدە ول سوت ىستەرىندە دە قولدانىلعان.‏ انت بەرگەندە ادام «اۋمين» دەۋىمەن ايتقاندارىنىڭ راس ەكەنىن دالەلدەيتىن.‏ سونداي-‏اق انتىنىڭ سالدارى قانداي بولاتىنىن ٴ‌تۇسىنىپ،‏ ونىمەن كەلىسەتىنىن كورسەتەتىن (‏مۇس.‏ 4-‏ج.‏ 5:‏22‏)‏.‏ جۇرت الدىندا «اۋمين» دەپ ايتقانى ادامنىڭ ٶز سوزىندە تۇرۋعا دەگەن شەشىمىن قاتايتاتىن (‏نەح.‏ 5:‏13‏)‏.‏

مۇسانىڭ 5-‏جازباسىنىڭ 27-‏تاراۋىندا ەرەكشە ٴ‌بىر وقيعا جازىلعان.‏ يسرايلدىكتەر ۋادە ەتىلگەن جەرگە كىرگەن سوڭ،‏ ەۆال مەن گاريزيم تاۋلارىنىڭ اراسىنا جينالدى.‏ ولار سول جەردە داۋىستاپ وقىلعان زاڭدى تىڭداۋ كەرەك ەدى.‏ حالىق جاي تىڭداۋ ٷشىن عانا ەمەس،‏ زاڭدى ۇستاناتىندارىن جاريالاۋ ٷشىن دە جينالدى.‏ زاڭدى ورىنداماعان جاعدايدا ولاردى قانداي جازا كۇتىپ تۇرعانى ايتىلعاندا،‏ جۇرت ٴ‌بىر اۋىزدان «اۋمين» دەپ جاۋاپ بەردى (‏مۇس.‏ 5-‏ج.‏ 27:‏15—‏26‏)‏.‏ ٴ‌جۇز مىڭداعان ەرلەر مەن ايەلدەردىڭ،‏ بالالاردىڭ بار داۋىستارىمەن «اۋمين» دەپ جاتقاندارىن كوز الدىڭىزعا ەلەستەتىپ كورىڭىزشى!‏ (‏ەشۋا 8:‏30—‏35‏)‏.‏ سول كۇنى بەرگەن انتتارىن يسرايلدىكتەر ەش ۇمىتپاسا كەرەك.‏ ولاردىڭ ۋادەلەرىندە تۇرعاندارى كيەلى كىتاپتاعى مىنا سوزدەردەن كورىنەدى:‏ «يسرايل حالقى ەشۋانىڭ،‏ سونداي-‏اق ودان ۇزاعىراق جاساعان ٵرى ەحوبانىڭ يسرايلدىڭ يگىلىگى ٷشىن جاساعان بارلىق ىستەرىن كورگەن اقساقالداردىڭ كوزى تىرىسىندە ەحوباعا قىزمەت ەتىپ ٴ‌جۇردى» (‏ەشۋا 24:‏31‏)‏.‏

يسا دا ايتقان سوزىنىڭ راستىعىن دالەلدەۋ ٷشىن «اۋمين» دەپ ايتقان.‏ ٴ‌بىراق ول مۇنى ايرىقشا جولمەن ىستەگەن.‏ يسا «اۋمين» دەگەندى ايتىلعان سوزدەرگە جاۋاپ رەتىندە ەمەس،‏ كەرىسىنشە،‏ العى ٴ‌سوز رەتىندە قولدانعان.‏ وسىلايشا ايتقالى جاتقاندارى شىندىق ەكەنىنە  نازار اۋدارعان *‏.‏ كەيدە ول «اۋمين،‏ اۋمين» دەپ قايتالاپ ايتقان *‏.‏ وسىلايشا يسا سوزدەرىنىڭ بۇلتارتپاس شىندىق ەكەنىنە تىڭداۋشىلارىنىڭ كوزىن جەتكىزگەن.‏ يسا زور سەنىمدىلىكپەن سويلەي العان،‏ ويتكەنى ول قۇدايدىڭ بار ۋادەلەرىن جۇزەگە اسىرماق ەدى (‏قور.‏ 2-‏ح.‏ 1:‏20؛‏ ايان 3:‏14‏)‏.‏

يسرايلدىكتەر ەحوبانى ماداقتاعاندا دا،‏ دۇعا ەتكەندە دە «اۋمين» دەپ ايتاتىن بولعان (‏نەح.‏ 8:‏6؛‏ ٴ‌زاب.‏ 41:‏13‏)‏.‏ جينالعان حالىق دۇعادان كەيىن «اۋمين» دەۋىمەن ايتىلعان دۇعانى ٶز دۇعاسىنداي جولدايتىنىن كورسەتكەن.‏ ەحوباعا وسىلاي ٴ‌بارى بىرگە عيبادات ەتكەندە،‏ رۋحاني شارا ودان سايىن بايي تۇسكەن.‏ وسىنداي وقيعا ٴ‌داۋىت پاتشانىڭ تۇسىندا بولدى.‏ ول ەحوبانىڭ كەلىسىم ساندىعىن يەرۋساليمگە اكەلىپ،‏ وسى قۋانىشتى جايتتىڭ ارتى تويعا ۇلاستى.‏ شەجىرەلەر 1-‏جازبا 16:‏8—‏36 تارماقتاردان وقيتىنىمىزداي،‏ ٴ‌داۋىتتىڭ ولەڭ جولدارىمەن جازىلعان جۇرەك تولقىتار دۇعاسىن اساپ پەن ونىڭ باۋىرلارى جىرلادى.‏ سول سوزدەردەن كەيىن تولقىپ كەتكەن حالىق «اۋمين» دەدى دە،‏ ەحوبانى ماداقتادى.‏ ولاردىڭ ٴ‌بىر اۋىزدان «اۋمين» دەگەنى سول كۇننىڭ قۋانىشىن ەسەلەي ٴ‌تۇستى.‏

ٴ‌بىرىنشى عاسىرداعى ماسىحشىلەر دە ەحوبانى ماداقتاعاندا «اۋمين» دەيتىن بولعان.‏ كيەلى كىتاپتى جازعان ادامدار دا ٶز حاتتارىندا بۇل ٴ‌سوزدى ٴ‌جيى قولدانعان (‏ريم.‏ 1:‏25؛‏ 16:‏27؛‏ پەت.‏ 1-‏ح.‏ 4:‏11‏)‏.‏ ايان كىتابىندا كوكتەگى رۋحاني جاراتىلىستاردىڭ دا:‏ «اۋمين!‏ ەحوبانى ماداقتاڭدار!‏»—‏ دەپ قۇدايدى داڭقتاپ جاتقانى سۋرەتتەلگەن (‏ايان 19:‏1،‏ 4‏)‏.‏ العاشقى ماسىحشىلەر جينالىستارىندا دۇعا ايتىلعاندا دا «اۋمين» دەيتىن بولعان (‏قور.‏ 1-‏ح.‏ 14:‏16‏)‏.‏ الايدا ولار بۇل ٴ‌سوزدى ويلانباستان ايتا بەرمەگەن.‏

جوعارىدا «اۋمين» سوزىنىڭ قايدان باستاۋ العانىنا ۇڭىلگەن سوڭ،‏ دۇعادان كەيىن «اۋمين» دەۋدىڭ ٴ‌مانى زور ەكەنىن تۇسىندىك.‏ ٶز دۇعامىزدان كەيىن «اۋمين» دەگەندە،‏ ايتقاندارىمىز جۇرەگىمىزدەن شىققانىن كورسەتەمىز.‏ ال كوپشىلىكتىڭ الدىندا ايتىلعان دۇعادان كەيىن «اۋمين»  دەۋىمىزبەن،‏ ٴ‌تىپتى ىشتەي ايتساق تا،‏ دۇعاداعى سوزدەرگە قوسىلاتىنىمىزدى پاش ەتەمىز.‏ «اۋمين» دەگەنىمىز تاعى قاي جاعىنان ماڭىزدى ەكەنىن كورەيىك.‏

عيباداتىمىز جاندانادى.‏ ەحوباعا عيبادات ەتۋگە دۇعانىڭ سوڭىندا «اۋمين» دەگەنىمىز عانا ەمەس،‏ دۇعا ايتىلىپ جاتقاندا ٶزىمىزدى قالاي ۇستاعانىمىز دا جاتادى.‏ دۇعانىڭ ماڭىزدىلىعىن تەرەڭ تۇسىنسەك جانە دۇعادا ايتىلعانداردى دەن قويىپ تىڭداساق،‏ «ٵۋمينىمىز» جان دۇنيەمىزدەن شىعاتىن بولادى.‏

ىنتىماعىمىز نىعايادى.‏ كوپشىلىك الدىندا ايتىلاتىن دۇعادا قاۋىمداعىلاردىڭ ٴ‌بارى ٴ‌بىر سوزدەردى جۇمىلا تىڭدايدى (‏ەل.‏ ٸس.‏ 1:‏14؛‏ 12:‏5‏)‏.‏ باۋىرلاستارمەن بىرگە ٴ‌بىراۋىزدان «اۋمين» دەگەندە،‏ بىرلىگىمىز بەكي تۇسەدى.‏ داۋىستاپ ايتساق تا،‏ ىشتەي ايتساق تا،‏ «ٵۋمينىمىزدى» ەستىگەندە،‏ ەحوبا ٶتىنىشىمىزدى ورىنداۋعا ودان بەتەر اسىق بولادى.‏

ەحوبانى ماداقتايمىز.‏ وعان عيبادات ەتۋ ٷشىن جاساپ جاتقان كىشكەنە ىستەرىمىزدىڭ ٶزى ەحوبانىڭ كوزىنەن تاسا قالمايدى (‏لۇقا 21:‏2،‏ 3‏)‏.‏ ول ٴ‌بىزدىڭ نيەتىمىز بەن جۇرەگىمىزدى كورەدى.‏ كەيدە قاۋىم كەزدەسۋىن تەلەفون ارقىلى تىڭداۋعا تۋرا كەلسە دە،‏ ٴ‌بىزدىڭ «اۋمين» دەگەن ٴ‌بىراۋىز ٴ‌سوزىمىزدى ەحوبا ەلەۋسىز قالدىرمايدى.‏ بۇل ٴ‌سوزىمىز ەحوباعا ارنالعان ماداقتى ۇستەمەلەيدى.‏

‏«اۋمين» دەگەن سوزىمىزدىڭ اسا ٴ‌بىر سالماعى جوقتاي كورىنگەنمەن،‏ ونىڭ استارىندا تەرەڭ ٴ‌مان جاتىر ەكەن.‏ ٴ‌بىر ەنسيكلوپەديادا ايتىلعانداي،‏ وسى ٴ‌بىراۋىز سوزدىڭ كومەگىمەن قۇدايدىڭ قىزمەتشىلەرى جۇرەكتەرىن كەرنەگەن سەنىمدەرىن،‏ ۇمىتتەرىن،‏ سونداي-‏اق دۇعادا ايتىلعاندارمەن تولىقتاي كەلىسەتىندەرىن پاش ەتە الادى.‏ ەندەشە،‏ اۋزىمىزدان شىققان ٵربىر «ٵۋمينىمىز» ەحوباعا جاعىمدى بولعاي!‏ (‏ٴ‌زاب.‏ 19:‏14‏)‏.‏