“Amen” isumaqar­poq “taama pili” imaluun­niit “ilumut”. Oqaatsimit hebræerisuumit ima isumaqar­tumit naggueqar­poq: “Aalajaap­poq”, “tatiginar­poq”. Biibilip nalaani inatsisilerinermut tun­ngatil­lugu ator­neqar­tar­poq. Inuk up­per­narsaariarluni oqaatsini ilumoor­nerar­niarlugit kingunis­saalu akueriniarlugit oqar­tar­poq: “Amen.” (4 Mos 5:22) Inuit tamaasa tusaatil­lugit taamatut oqareerluni oqaatsimi eq­qor­tin­nis­saan­nut pis­sutis­saqar­nerusar­poq. – Neh 5:13.

Mosesimik al­lak­kani tal­limaan­ni kapitali 27-mi “amen”-ip maluginiar­nar­tumik ator­neqar­nera al­laatigineqar­poq. Israelik­kut nunamut neriorsuutigisamut isereer­nermik kingor­na Inatsisit atuar­neqar­nerat tusar­naarumal­lugu qaq­qap Ebalip qaq­qal­lu Garizimip akor­nan­ni katersuup­put. Tusar­naar­nis­sap saniatigut Israelik­kut Inatsisit akueriniarlugit nalunaar­tus­saap­put. Inatsisinik maleruaan­ngin­nerup kingunis­sai atuar­neqareeraangata akuerinerar­tar­paat akil­lutik: “Amen.” (5 Mos 27:15-26) Angutit, ar­nat meeq­qal­lu tuusintilip­pas­suit nipituumik taamatut akisar­nerat takorlooruk. (Jos 8:30-35) Ul­lormi tas­sani akisar­ner­tik puiun­ngisaan­narsimas­savaat. Oqaatsitil­lu eq­qor­tip­paat, imami al­las­simavoq: “Israelik­kut Naalagaq kif­far­tuup­paat Josva inuutil­lugu utoq­qaal­lu Josvamit inuum­mersor­nerusut Naalak­kal­lu Israelimut qanoq ilior­nerinik tamanik ilisimasut suli inuutil­lugit.” – Jos 24:31.

Aam­ma Jiisusip oqaatsimi ilumoor­nerat up­per­narsar­niarlugu “amen” ator­tar­paa. Oqaatigineqar­tul­li kingor­na “amen” (kalaal­lisut “ilumut”mik nutser­neqar­toq) oqaatiginagu oqaatsimi ilumoor­nerat erseq­qis­sar­niarlugu oqaasis­sani sioq­qul­lugit ator­tar­paa. Ilaan­nik­kut oqaaseq  taan­na marloriarluni oqaatigisar­paa. (Matt 5:18; Joh 1:51) Taamatut oqaatsimi ilumoorluin­nar­neran­nik tusar­naar­tini qularun­naarsit­tar­pai. Guutip neriorsuutaanik tamanik piviusun­ngor­titsinis­samut Jiisusi pigin­naatin­neqarami taamatut qularisas­saan­ngitsumik oqalus­sin­naasar­poq. – 2 Kor 1:20; Saqq 3:14.

Aam­ma Jehovamik un­nersiutigin­nin­nermin­ni taas­sumun­ngalu qinunermin­ni Israelik­kut “amen”-eer­tar­put. (Neh 8:6; Tuss 41:14) Qinunerup kingor­na taamaalior­nik­kut tusar­naar­tut qin­num­mi oqaatigineqar­tut isumaqatigalugit up­per­narsar­tar­paat. Taamaalil­lutik najuut­tut tamarmik Jehovamik pal­lorfigin­nin­nermut peqataaner­tik nuan­naarutigisin­naavaat. Kun­ngip Daavip angerutsip il­lerfia Jerusalemimukaam­magu taama pisoqar­poq. Nalunaarsuutit siul­liit 16:8-36 eq­qaaneqar­tutut tamatuma nal­liut­torsiutiginerani Daavi tus­siaasiorluni qaman­nga pisumik qinuvoq. Najuut­tut Daavip oqaasii kil­litsis­sutigingaarlugit “tamarmik akip­put: ‘Amen’, Naalagarlu un­nersiutigaat”. Aap, Jehovamik pal­lorfigin­neqatigiin­ner­tik nuan­naarutigaat.

Aam­ma kristumiut siul­liit Jehovamik un­nersiutigin­nin­nermin­ni “amen” ator­tar­paat. Biibilimik al­lat­tut al­lak­kamin­nut ilan­nguk­kajup­paat. (Rom 1:25; 16:27; 1 Petr 4:11) Saq­qum­mersitani al­laatigineqar­tutut al­laat qilam­mi pin­ngor­titat anersaajusut Jehova naalan­narsisip­paat ima oqarlutik: “Amen, hal­leluja!” (Saqq 19:1, 4) Kristumiut siul­liit ataatsimiin­nermin­ni qin­nutip kingor­na “amen”-eer­neq ileq­qoraat. (1 Kor 14:16) Imaan­ngilarli eq­qarsaatiginagu oqaatigiin­nar­taraat.

Jehovap kif­faasa “amen” qanoq ator­tarsimaneraat misis­soreerlugu qin­num­mik naggasiinermi “amen”-eer­nerup pingaaruteqar­nera paasinar­poq. Nam­mineq qinunitsin­ni qin­nut naggaserlugu   “amen”-eer­nik­kut up­per­narsar­tar­par­put oqaaserisavut ilumooruk­kivut. Aam­ma katersorsimasuni qin­nus­sereer­toqaraangat eq­qarsaatik­kut tusaaneqarsin­naasumil­luun­niit “amen”-eer­nik­kut ersersit­tar­par­put oqaaserineqaq­qam­mersut isumaqatigalugit. Pingaaruteqar­neranut pis­sutaasut al­lat eq­qarsaatigik­kit.

Malin­naal­luta qinoqataasar­pugut. Qin­num­mi oqaaserineqar­tunik isumaqataanik­kut pis­susitsigul­lu Jehova pal­lorfigisar­par­put. Ilumoorluta “amen”-eerusuk­kat­ta qinusoqar­til­lugu ajun­ngitsumik pis­suseqarluta eq­qarsaativut al­lamut saatsin­naveersaar­tar­pavut.

Pal­lor­figin­nin­nit­sin­ni ataasius­suseqar­pugut. Katersorsimasut sin­nerlugit qin­nutini ilagiit ataasioqatigiil­lutik as­sigiim­mik tusagaqar­tar­put. (ApS 1:14; 12:5) Qatan­ngutivul­lu “amen”-eeqatigiin­ner­put suli ataasius­suseqar­nerulis­sutigisar­par­put. Nipilim­mik eq­qarsaatik­kul­luun­niit “amen”-eerut­ta Jehova qin­nutit­ta akinis­saanut pis­sutis­saqarluar­nerus­saaq.

Jehova un­ner­siutigisar­par­put. Jehovap pal­lorfigin­nin­nitsin­ni iliuutsivut tamaasa maluginiar­tar­pai. (Luk 21:2, 3) Pis­sutiginiagar­put uum­mam­miuvul­lu nalun­ngilai. Aam­ma oqarasuaatik­kut ataatsimeeqataanitsin­ni “amen”-eer­ner­put pingaar­tit­tar­paa. “Amen”-eer­nitsigut ilagiit pal­lorfigin­neqatigiin­neran­nut akuusar­pugut.

“Amen” oqaasiin­naagaluar­toq pingaaruteqangaar­poq. Biibilimik qinerlerfis­siami al­las­simavoq Guutip kif­faasa “oqaatsimik tamatumin­nga atuinermik­kut qaman­nga pisumik tatigin­nin­ner­tik, isumaqatigin­nil­luin­nar­ner­tik piviusumil­lu neriuuteqar­ner­tik up­per­narsarsin­naasaraat”. Qanor­toq “amen”-eer­nivut tamarmik Jehovamut iluarinarilit! – Tuss 19:15.