Yu “Emɛn” Impɔtant to Jiova!
WI WƆSHIP impɔtant to Jiova. I “de pe atɛnshɔn ɛn lisin” to in savant dɛn, ɛn ɛnitin we wi de du fɔ prez am rili impɔtant to am, ilɛksɛf na smɔl tin wi du. (Mal. 3:16, NW) Fɔ ɛgzampul, tink bɔt wan wɔd we wi go mɔs dɔn tɔk bɔku bɔku tɛm. Di wɔd na “emɛn.” Yu tink se da simpul wɔd de impɔtant to Jiova? Yɛs, i impɔtant to am! Fɔ no wetin mek i impɔtant to Jiova, lɛ wi si wetin di wɔd “emɛn” min ɛn aw dɛn yuz am na di Baybul.
“ƆLMAN FƆ ANSA, ‘EMƐN!’”
Di Inglish wɔd fɔ “emɛn” min “lɛ i bi,” ɔ “fɔ tru.” Dɛn pul am frɔm wan Ibru wɔd we min “fɔ fetful,” “fɔ abop ɔ trɔst.” Dɛn bin de yuz am sɔntɛnde na kɔt. Afta we pɔsin dɔn tek ot, i go se “emɛn” fɔ sho se wetin i dɔn tɔk na tru ɛn i gri wit ɛnitin we go apin to am fɔ wetin i tɔk. (Nɔm. 5:22) We i se “emɛn” bifo ɔlman, dat de mek i gɛt mɔ rizin fɔ du wetin i dɔn prɔmis.—Nɛi. 5:13.
Wan fayn ɛgzampul usay pipul dɛn yuz di wɔd “emɛn” de na Ditarɔnɔmi chapta 27. Afta we di Izrɛlayt dɛn ɛnta di land we Gɔd bin dɔn prɔmis dɛn, dɛn bin kam togɛda bitwin Mawnt Ebal ɛn Mawnt Garizim fɔ yɛri we dɛn de rid di Lɔ. Dɛn nɔ bin jɔs go de fɔ lisin we dɛn de rid di Lɔ, bɔt dɛn go de bak fɔ gri se dɛn go obe di Lɔ. Dɛn bin du dat bay we dɛn bin de se “Emɛn” we dɛn bin de rid to dɛn wetin go apin if dɛn nɔ obe di Lɔ. (Dit. 27:15-26) Imajin di sawnd we dɛn bɔku bɔku man, uman, ɛn pikin dɛn bin de mek as dɛn de ansa lawd wan! (Jɔs. 8:30-35) Dɛn nɔ bin ɛva fɔgɛt di wɔd dɛn we dɛn bin tɔk da de de. We di Izrɛlayt dɛn bin de du wetin dɛn bin dɔn prɔmis, di Baybul tɔk se: “We Jɔshwa day, di Izrɛlayt dɛn bin stil de waka wit PAPA GƆD [“Jiova,” NW], te ivin afta ɔl di bigman dɛn we day afta Jɔshwa, we bin si ɔl wetin PAPA GƆD [“Jiova,” NW] du fɔ Izrɛl, bin day.”—Jɔs. 24:31.
Jizɔs bin yuz di wɔd “emɛn” fɔ sho se wetin i de tɔk na tru, bɔt i bin du dat wan spɛshal we. Bifo Jizɔs yuz di wɔd “emɛn” (we dɛn translet insay Krio as “fɔ tru”) fɔ ansa to sɔntin we pɔsin tɔk, i bin de yuz am bifo i tɔk sɔntin fɔ sho se na tru i de tɔk. Sɔntɛnde, i bin de ripit di wɔd bay we i de se “emɛn emɛn.” (Mat. 5:18, NW; Jɔn 1:51) Jizɔs bin mek di wan dɛn we de lisin to am no se ɔl di tin dɛn we i bin de tɔk na tru. Jizɔs bin shɔ bɔt wetin i bin de tɔk bikɔs na in Gɔd dɔn gi di pawa fɔ du ɔl di tin dɛn we Gɔd dɔn prɔmis.—2 Kɔr. 1:20; Rɛv. 3:14.
‘DI PIPUL DƐN SE, “EMƐN!” ƐN DƐN PREZ JIOVA’
Di Izrɛlayt dɛn bin de yuz bak di wɔd “emɛn” we dɛn bin de prez ɛn pre to Jiova. (Nɛi. 8:6; Sam 41:13) We di wan dɛn we bin de lisin se “emɛn” afta dɛn pre, dat de sho se dɛn gri wit wetin dɛn yɛri. Ɔl di pipul dɛn we bin de we dɛn bin de pre bin ebul fɔ tek pat, ɛn dɛn bin de ɛnjɔy fɔ wɔship Jiova da we de. Na dat bin apin we Kiŋ Devid bin briŋ Jiova in Ak na Jerusɛlɛm. We dɛn bin de sɛlibret, Devid bin siŋ frɔm in at wan prea we de na Fɔs Kronikul 16:8-36. Devid in wɔd dɛn bin rili tɔch di pipul dɛn at, ɛn “ɔl di pipul dɛn se, ‘Emɛn!’ Ɛn prez PAPA GƆD [“Jiova,” NW].” Fɔ tru, dɛn bin gladi fɔ wɔship Jiova togɛda.
Di fɔstɛm Kristian dɛn bak bin de yuz di wɔd “emɛn” we dɛn bin de prez Jiova. Di wan dɛn we bin rayt di Baybul bin de yuz di wɔd “emɛn” bɔku tɛm insay dɛn lɛta dɛn. (Rom 1:25; 16:27; 1 Pit. 4:11) Di Baybul buk we nem Rɛvɛleshɔn bin sho enjɛl dɛn na ɛvin we bin de gi glori to Jiova bay we dɛn bin de se: “Emɛn! . . . Prez Gɔd!” (Rɛv. 19:1, 4) Bɔku tɛm, di fɔstɛm Kristian dɛn bin de se “emɛn” afta we dɛn dɔn pre na dɛn mitin dɛn. (1 Kɔr. 14:16, NW) Bɔt nɔto wɔd we dɛn fɔ jɔs de ripit we dɛn nɔ tink bɔt am.
WETIN MEK YU “EMƐN” IMPƆTANT?
Afta we wi dɔn lan aw Jiova in savant dɛn bin de yuz di wɔd “emɛn,” wi kin si wetin mek i impɔtant fɔ se “emɛn” we wi dɔn fɔ pre. We pɔsin dɔn fɔ pre ɛn se “emɛn,” dat de sho se i rili min wetin i se. Ɛn we wi se “emɛn” to ɔda pɔsin in prea ilɛksɛf na insay wi at, wi de sho se wi gri wit wetin di pɔsin se. Tink bɔt wetin mek wi “emɛn” impɔtant bak.
Wi de pe atɛnshɔn we ɔda pɔsin de pre bikɔs prea na pat pan wi wɔship. Nɔto bay wetin nɔmɔ wi de tɔk we wi de pre wi de wɔship Jiova, bɔt ivin di we aw wi de biev we wi de pre. Bikɔs wi want fɔ se “emɛn” frɔm wi at, dat de ɛp wi fɔ biev fayn ɛn pe atɛnshɔn we wi de pre.
Wi gɛt wanwɔd as wi de wɔship Gɔd. Pɔblik prea de mek wi pe atɛnshɔn to wetin ɔlman na di kɔngrigeshɔn de yɛri. (Akt 1:14; 12:5) We wi de ansa togɛda wit wi brɔda ɛn sista dɛn, dat de mek wi gɛt wanwɔd mɔ ɛn mɔ. We wi se “emɛn” togɛda ilɛk na lawd wan ɔ insay wi at, wi prea de mek Jiova du wetin wi aks am.
Wi “emɛn” we wi de se de prez Jiova
Wi de prez Jiova. Jiova de si ɔl wetin wi de du we wi de wɔship am. (Lyuk 21:2, 3) I de si wetin mek wi de wɔship am ɛn wetin de insay wi at. Ivin we wi de lisin di mitin na fon, wi shɔ se Jiova de notis di “emɛn” we wi de se. We wi de se “emɛn” wi de jɔyn di wan dɛn we de na di mitin fɔ prez Jiova.
I kin tan lɛk se di “emɛn” we wi de tɔk nɔ impɔtant, bɔt nɔto so i bi. Wan Baybul encyclopedia bin tɔk se Gɔd in savant dɛn de “yuz dis wangren wɔd fɔ sho wetin de na dɛn at, dat na kɔnfidɛns, op, ɛn fɔ se Gɔd gladi fɔ dɛn.” Lɛ ɛni “emɛn” we wi tɔk mek Jiova gladi.—Sam 19:14.
