ယဟိဝၤယွၤပာ်လုၢ်ပာ်ပှ့ၤ ပတၢ်ကတိၤလၢအမ့ၢ် “အၤမ့ၣ်”
ယဟိဝၤယွၤ ပာ်လုၢ်ပာ်ပှ့ၤ ပတၢ်ဘူၣ်ထီၣ်ဘါထီၣ်အီၤလီၤ. တၢ်ခဲလၢာ်လၢပမၤအီၤ လၢပကစံးထီၣ်ပတြၢၤအီၤအဂီၢ်န့ၣ် မ့ၢ်ဆံးထဲလဲၣ်ဂ့ၤထဲလဲၣ်ဂ့ၤ အဝဲ “ကနၣ်ဝဲ, ဒီးနၢ်ဟူဝဲ” ဒီးပာ်လုၢ်ပာ်ပှ့ၤဝဲလီၤ. (မၤလကံ ၃:၁၆) အဒိ ဆိကမိၣ်ကွၢ် တၢ်ကတိၤလၢအမ့ၢ် “အၤမ့ၣ်” န့ၣ်တက့ၢ်. တၢ်ကတိၤတဖျၢၣ်အံၤ ပတဲဝံၤတဲက့ၤအီၤ တဘျီဝံၤတဘျီလီၤ. ဒီးတၢ်ကတိၤတဖျၢၣ်အံၤ မ့ၢ်တၢ်ကတိၤယိယိဖိ ဘၣ်ဆၣ်ယဟိဝၤယွၤ ပာ်လုၢ်ပာ်ပှ့ၤဝဲလီၤ. ဘၣ်မနုၤအဃိလဲၣ်. ပကဃုသ့ၣ်ညါကွၢ် တၢ်ကတိၤတဖျၢၣ်အံၤ အခီပညီ ဒီးဘၣ်ဃးဒီး တၢ်ကတိၤတဖျၢၣ်အံၤန့ၣ် လံာ်စီဆှံသူဝဲဒ်လဲၣ်န့ၣ်လီၤ.
“ပှၤဂီၢ်မုၢ်ခဲလၢာ် ကစံး, အၤမ့ၣ်”
တၢ်ကတိၤလၢအမ့ၢ် “အၤမ့ၣ်” န့ၣ်အခီပညီမ့ၢ်ဝဲ “မ်အမ့ၢ်ဒ်န့ၣ်” မ့တမ့ၢ် “မ့ၢ်သပှၢ်တၢၢ်” လီၤ. တၢ်ကတိၤတဖျၢၣ်အံၤ ဟဲလၢဧ့ၤဘြံၤတၢ်ကတိၤလၢ အခီပညီမ့ၢ်ဝဲ “အမ့ၢ်အတီ,” “နာ်န့ၢ်အီၤသ့” န့ၣ်လီၤ. တဘျီတခီၣ် တၢ်ကတိၤတဖျၢၣ်အံၤ ပှၤသူအီၤဖဲ ပှၤထီၣ်ရူထီၣ်တ့အခါန့ၣ်လီၤ. ဖဲပှၤတဂၤ အၢၣ်လီၤအသးဝံၤအလီၢ်ခံ အဝဲကတဲဝဲ “အၤမ့ၣ်” ဒ်သိး ကပာ်ဂၢၢ်ပာ်ကျၢၤဝဲလၢ တၢ်လၢအတဲဝဲတဖၣ်န့ၣ် မ့ၢ်တၢ်လၢအဘၣ်လီၤတံၢ်လီၤဆဲး ဒီးတၢ်မ့ၢ်ကဲထီၣ်တမံၤမံၤန့ၣ် အဝဲကဟံးမူဒါလီၤ. (၄ မိၤၡ့ ၅:၂၂) ဖဲပှၤတဂၤ တဲဝဲဒ်န့ၣ်အခါ မ့ၢ်ဒၣ်အမၤလီၤတံၢ်ဒိၣ်ထီၣ်ဝဲလၢ ကမၤဝဲဒ် အတဲဝဲအသိးလီၤ.—နဃ့မယၤ ၅:၁၃.
ဆိကမိၣ်ကွၢ် ဘၣ်ဃးဒီး တၢ်ကတိၤလၢအမ့ၢ် “အၤမ့ၣ်” န့ၣ် ၅ မိၤၡ့ ၂၇ ပာ်ဖျါထီၣ်ဝဲဒ်လဲၣ်န့ၣ်တက့ၢ်. ဖဲပှၤအံၣ်စရ့လးဖိတဖၣ် လဲၤနုာ်လီၤဆူ ကီၢ်တၢ်စံးပာ်ဝံၤအလီၢ်ခံ အဝဲသ့ၣ် ပာ်ဖှိၣ်ထီၣ်အသးလၢ ကစၢၢ်ဧ့ၤဘါလး ဒီးကစၢၢ်ကရံးစံၣ် အဘၢၣ်စၢၤ ဒ်သိးကဒိကနၣ်ဝဲ ပှၤဖးထီၣ် စီၤမိၤၡ့အတၢ်သိၣ်တၢ်သီန့ၣ်လီၤ. ဒီးတမ့ၢ်ထဲလၢ အဝဲသ့ၣ် ကလဲၤဒိကနၣ်ဝဲ တၢ်သိၣ်တၢ်သီန့ၣ်ဘၣ်, အဝဲသ့ၣ်လဲၤဝဲဒ်သိး ကပာ်ဖျါထီၣ်လၢ အတူၢ်လိာ်ဝဲ တၢ်သိၣ်တၢ်သီန့ၣ်လီၤ. အဃိ ဖဲပှၤဖးဖျါထီၣ်လၢ အဝဲသ့ၣ်မ့ၢ်တမၤထွဲ ကစၢ်ယွၤအတၢ်သိၣ်တၢ်သီန့ၣ် အဝဲသ့ၣ် ကတူၢ်ဘၣ်တၢ်ဒ်လဲၣ်အခါ အဝဲသ့ၣ်တဲဝဲလၢ “အၤမ့ၣ်” န့ၣ်လီၤ. (၅ မိၤၡ့ ၂၇:၁၅-၂၆) ဆိကမိၣ်ကွၢ် ဖဲပှၤပိာ်မုၣ်, ပိာ်ခွါ ဒီးဖိသၣ်တဖၣ် တဲဝဲဒ်န့ၣ်အခါ ကသီၣ်ဝဲဒ်လဲၣ်န့ၣ်တက့ၢ်. (ယိၤၡူ ၈:၃၀-၃၅) ဒီးအဝဲသ့ၣ် ကနီၣ်ဘၣ်တၢ်ကတိၤလၢ အတဲဝဲဖဲမုၢ်နံၤအဝဲန့ၣ် ထီဘိလီၤ. လံာ်စီဆှံ ပာ်ဖျါထီၣ်ဝဲလၢ “အံၣ်စရ့လးမၤယွၤအတၢ် လၢစီၤယိၤၡူအမုၢ်နံၤအပူၤခဲလၢာ်, ဒီးလၢပှၤသူၣ်က့သးပှၢ်လၢ အမူဒံးလၢစီၤယိၤၡူအလီၢ်ခံ, ဒီးသ့ၣ်ညါယွၤအမၤတၢ်ခဲလၢာ်, လၢအမၤတ့ၢ်လၢအံၣ်စရ့လးအဂီၢ်တဖၣ် အမုၢ်နံၤခဲလၢာ်န့ၣ်လီၤ.” (ယိၤၡူ ၂၄:၃၁) လၢတၢ်န့ၣ်အဃိ ပသ့ၣ်ညါဘၣ်လၢ အဝဲသ့ၣ် မၤထွဲဝဲဒ် အတၢ်ကတိၤအသိးလီၤ.
ယ့ၣ်ၡူးစ့ၢ်ကီးသူဝဲ တၢ်ကတိၤလၢအမ့ၢ် “အၤမ့ၣ်” ဒ်သိးကပာ်ဂၢၢ်ပာ်ကျၢၤဝဲလၢ တၢ်လၢအတဲဝဲတဖၣ်န့ၣ် မ့ၢ်အမ့ၢ်အတီလီၤ. ဘၣ်ဆၣ် အဝဲတဲဝဲလၢ ကျဲလီၤလီၤဆီဆီန့ၣ်လီၤ. ယ့ၣ်ၡူးသူဝဲတၢ်ကတိၤအံၤ ဖဲအတဲတၢ်ဝံၤအခါတမ့ၢ်ဘၣ်. လၢတၢ်န့ၣ်အလီၢ် တချုးလၢ အဝဲတဲတၢ်န့ၣ် အဝဲတဲဝဲ “အၤမ့ၣ်” (လၢကညီကျိာ်န့ၣ် ပှၤကွဲးကျိးထံအီၤလၢ “တီတီ”) ဒ်သိးကဒုးသ့ၣ်ညါဆိ ပှၤဂၤလၢ တၢ်ကတိၤလၢ အတဲဝဲတဖၣ် မ့ၢ်တၢ်လၢအမ့ၢ်အတီန့ၣ်လီၤ. တဘျီတခီၣ်န့ၣ် ယ့ၣ်ၡူးတဲဝဲလၢ “အၤမ့ၣ် အၤမ့ၣ်” လီၤ. (မးသဲ ၅:၁၈; ယိၤဟၣ် ၁:၅၁) အဝဲမၤဝဲဒ်အံၤန့ၣ် မ့ၢ်ဒ်သိးကဒုးသ့ၣ်ညါဝဲ ပှၤဒိကနၣ်တၢ်ဖိတဖၣ်လၢ တၢ်လၢအတဲဝဲတဖၣ်န့ၣ် မ့ၢ်တၢ်မ့ၢ်တၢ်တီအနီၢ်ကီၢ်လီၤ. ယ့ၣ်ၡူးအိၣ်ဒီး တၢ်စိတၢ်ကမီၤလၢ ကမၤလၢပှဲၤထီၣ် ယွၤအတၢ်အၢၣ်လီၤခဲလၢာ်အဃိ အဝဲတဲဝဲတၢ်ကတိၤအံၤသ့လီၤ.—၂ ကရံၣ်သူး ၁:၂၀; လီၣ်ဖျါ ၃:၁၄.
“ပှၤဂီၢ်မုၢ် . . . စံးဝဲဒၣ်, အၤမ့ၣ်, ဒီးစံးထီၣ်ပတြၢၤယွၤလီၤ”
ဖဲပှၤအံၣ်စရ့လးဖိတဖၣ် စံးပတြၢၤယဟိဝၤယွၤ ဒီးဃ့ထုကဖၣ်တၢ်လၢ အအိၣ်အခါ အဝဲသ့ၣ်တဲဝဲ “အၤမ့ၣ်” စ့ၢ်ကီးလီၤ. (နဃ့မယၤ ၈:၆; စံးထီၣ်ပတြၢၤ ၄၁:၁၃) ဖဲပှၤဃ့ထုကဖၣ်ဝံၤအခါ ခီဖျိလၢအဝဲသ့ၣ် တဲဝဲအၤမ့ၣ်အဃိ အဝဲသ့ၣ်ပာ်ဖျါထီၣ်ဝဲလၢ အတူၢ်လိာ်တၢ်ကတိၤလၢ အနၢ်ဟူဘၣ်ဝဲတဖၣ်န့ၣ်လီၤ. တကးဒံးဘၣ် ပှၤဖဲန့ၣ်ကိးဂၤဒဲး ပၣ်ဃုာ်ဘၣ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ လၢတၢ်သူၣ်ခုသးခုအပူၤသ့လီၤ. ဖဲစီၤပၤဒၤဝံး ဆှၢက့ၤဝဲ ယဟိဝၤယွၤ အတလါစီဆှံ လၢဝ့ၢ်ယရူၤၡလ့ၣ်အခါ တၢ်မၤအသးဒ်န့ၣ်စ့ၢ်ကီးလီၤ. ဖဲပှၤမၤမူးပွဲအံၤအဆၢကတီၢ် စီၤဒၤဝံး ဃ့ဘါထုကဖၣ်တၢ်လၢ အသးဒီဖျၢၣ် ဒီးအတၢ်ထုကဖၣ်အံၤ ဘၣ်တၢ်ကွဲးနီၣ်အီၤဖဲ ၁ ကွဲးနီၣ်တၢ် ၁၆:၈-၃၆ အပူၤလီၤ. အဝဲအတၢ်ကတိၤတဖၣ်န့ၣ် ထုးန့ၢ်ပှၤဂီၢ်မုၢ်တဖၣ်အသးဒိၣ်မးအဃိ “ပှၤဂီၢ်မုၢ်ခဲလၢာ်စံးဝဲဒၣ်, အၤမ့ၣ်, ဒီးစံးထီၣ်ပတြၢၤယွၤလီၤ.” အဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤလၢ တၢ်သူၣ်ခုသးခုအပူၤလီၤ.
ခရံာ်ဖိလၢ တၢယၤဖှိၣ်အစိၤတဖၣ်စ့ၢ်ကီး ဖဲအဝဲသ့ၣ် စံးထီၣ်ပတြၢၤယဟိဝၤယွၤအခါ တဲဝဲ “အၤမ့ၣ်” လီၤ. ပှၤကွဲးလံာ်စီဆှံ အါဂၤစ့ၢ်ကီး မၤကတၢၢ်အလံာ်လၢ တၢ်ကတိၤအံၤလီၤ. (ရိမ့ၤ ၁:၂၅; ၁၆:၂၇; ၁ ပ့းတရူး ၄:၁၁) လံာ်လီၣ်ဖျါ ပာ်ဖျါထီၣ်ဝဲဒၣ်လၢ ပှၤနီၢ်သးဖိလၢ မူခိၣ်တဖၣ်ဒၣ်လဲာ် မၤလၤကပီၤ ယဟိဝၤယွၤ ခီဖျိတဲဝဲလၢ “အၤမ့ၣ်, စံးထီၣ်ပတြၢၤယွၤတက့ၢ်.” (လီၣ်ဖျါ ၁၉:၁, ၄) ဖဲခရံာ်ဖိလၢ တၢ်မၢဖိအစိၤတဖၣ် မၤဝဲတၢ်အိၣ်ဖှိၣ်ဒီး ဃ့ဘါထုကဖၣ်တၢ်ဝံၤအခါ ညီနုၢ်န့ၣ် အဝဲသ့ၣ်တဲဝဲ “အၤမ့ၣ်” လီၤ. (၁ ကရံၣ်သူး ၁၄:၁၆) ဘၣ်ဆၣ် တမ့ၢ်လၢ အဝဲသ့ၣ်တဆိကမိၣ်ထံ တၢ်ကတိၤအံၤဒီး တဲဝံၤတၢ်မံၤန့ၣ်ဘၣ်.
ပကဘၣ်တဲ “အၤမ့ၣ်” န့ၣ်မ့ၢ်တၢ်လၢအရ့ဒိၣ်
ပမ့ၢ်ကွၢ် ယဟိဝၤယွၤ အခ့အပှၤလၢပျၢၤတဖၣ် သူဝဲတၢ်ကတိၤလၢအမ့ၢ် “အၤမ့ၣ်” ဒ်လဲၣ်န့ၣ် ပသ့ၣ်ညါဘၣ်လၢ ဖဲပှၤဃ့ဘါထုကဖၣ် ဝံၤအခါ ပကဘၣ်မၤကတၢၢ်က့ၤအီၤလၢ “အၤမ့ၣ်” န့ၣ်မ့ၢ်တၢ်လၢ အရ့ဒိၣ်ဒိၣ်မးန့ၣ်လီၤ. ဒီးဖဲပဃ့ထုကဖၣ်တၢ်ဝံၤအခါ ပမ့ၢ်တဲအၤမ့ၣ်န့ၣ် မ့ၢ်ဝဲပပာ်ဖျါထီၣ်လၢ တၢ်လၢပဃ့အီၤတဖၣ်န့ၣ် ဟဲထီၣ်လၢပသးပူၤအနီၢ်ကီၢ်လီၤ. တကးဒံးဘၣ် ဖဲပှၤဃ့ဘါထုကဖၣ်တၢ်လၢ ကမျၢၢ်မဲာ်ညါအခါ ပမ့ၢ်တဲ “အၤမ့ၣ်” လၢပသးပူၤဒၣ်လဲာ် မ့ၢ်ပတူၢ်လိာ် တၢ်လၢပှၤတဲအီၤတဖၣ်န့ၣ်လီၤ. ပကတဲသကိး ဘၣ်မနုၤအဃိ ပကဘၣ်တဲ “အၤမ့ၣ်” န့ၣ်မ့ၢ်တၢ်လၢ အရ့ဒိၣ်လဲၣ်န့ၣ်လီၤ.
မၤစၢၤပှၤဒ်သိး ပကသးစၢၢ်ဆၢ တၢ်ဘူၣ်ထီၣ်ဘါထီၣ်. ဒ်သိးပတဲ အၤမ့ၣ် ကအိၣ်ဒီးအခီပညီအဂီၢ် ဖဲပှၤဃ့ဘါထုကဖၣ်အခါ ပကဘၣ်ပာ်ပသးမူာ်မူာ်နီၢ်နီၢ် ဒီးဒိကနၣ်လီၤတံၢ်လီၤဆဲးလီၤ. ပဘူၣ်ထီၣ်ဘါထီၣ် ယဟိဝၤယွၤန့ၣ် တမ့ၢ်ထဲပတဲ “အၤမ့ၣ်” ဖဲပှၤဃ့ဘါထုကဖၣ်တၢ်ဝံၤအလီၢ်ခံဘၣ်. ပကဘၣ်ဒိ ကနၣ်အတၢ်ထုကဖၣ် စးထီၣ်လၢအခီၣ်ထံး တုၤလၢအတကတၢၢ် လီၤတံၢ်လီၤဆဲးလီၤ.
မၤဃူမၤဖိး ပှၤလၢအဘူၣ်ထီၣ်ဘါထီၣ်တၢ်တဖၣ်. ဖဲပှၤဃ့ဘါထုကဖၣ်တၢ်လၢ ကမျၢၢ်အမဲာ်ညါအခါ တၢ်အိၣ်ဖှိၣ်ဖိခဲလၢာ် နၢ်ဟူတၢ်ဂ့ၢ်တမံၤဃီအဃိ ကမၤစၢၤအဝဲသ့ၣ် ဒ်သိးကအိၣ်ဒီး တၢ်ဃူတၢ်ဖိးအဂီၢ်လီၤ. (မၤတၢ် ၁:၁၄; ၁၂:၅) ဖဲပတဲအၤမ့ၣ် ဃုာ်ဒီးပဒီပုၢ်ဝဲၢ်မုၣ်ခွါတဖၣ် တပူၤဃီအခါ ပတၢ်ဃူတၢ်ဖိး အါထီၣ်လီၤ. ပမ့ၢ်တဲအၤမ့ၣ်လၢ ပကလုၢ်ဒိၣ်ဒိၣ်မ့ၢ်ဂ့ၤ လၢပသးပူၤမ့ၢ်ဂ့ၤ ယဟိဝၤယွၤ ကအဲၣ်ဒိးစံးဆၢဝဲ ပတၢ်ထုကဖၣ်န့ၣ်လီၤ.
ပမ့ၢ်တဲ “အၤမ့ၣ်” န့ၣ်မ့ၢ်ဝဲကျဲတဘိလၢ ပစံးထီၣ်ပတြၢၤ ယဟိဝၤယွၤ
ပစံးထီၣ်ပတြၢၤ ယဟိဝၤယွၤ. တၢ်ကိးမံၤဒဲးလၢ ပမၤအီၤလၢ ပတၢ်ဘူၣ်ထီၣ်ဘါထီၣ်အပူၤန့ၣ် ယဟိဝၤယွၤ ပာ်သူၣ်ပာ်သးဝဲလီၤ. (လူၤကၣ် ၂၁:၂, ၃) အဝဲထံၣ်ဝဲ ပတၢ်ပာ်သူၣ်ပာ်သးဒီး တၢ်လၢအအိၣ်လၢ ပသးပူၤတဖၣ်န့ၣ်လီၤ. ဖဲပဒိကနၣ် တၢ်အိၣ်ဖှိၣ်လၢ လီတဲစိပူၤအခါဒၣ်လဲာ် ပမ့ၢ်တဲ “အၤမ့ၣ်” န့ၣ်ယဟိဝၤယွၤ ပာ်သူၣ်ပာ်သးဝဲလီၤ. ဒီးပပၣ်ဃုာ်လၢ ပှၤစံးထီၣ်ပတြၢၤ ယဟိဝၤယွၤလၢ တၢ်အိၣ်ဖှိၣ်အကျါ စ့ၢ်ကီးလီၤ.
ဖဲပတဲ “အၤမ့ၣ်” အခါဖျါလၢ အမ့ၢ်တၢ်လၢ အလုၢ်အပှ့ၤ တအိၣ်အါအါဘၣ်. ဘၣ်ဆၣ် ပကဘၣ်တဲတၢ်ကတိၤအံၤန့ၣ် မ့ၢ်တၢ်လၢ အရ့ဒိၣ်လီၤ. လံာ်ပီညါဂံၢ်ထံးတဘ့ၣ်လၢ ဘၣ်ဃးဒီး လံာ်စီဆှံန့ၣ် တဲဝဲလၢ ယွၤအခ့အပှၤတဖၣ် ပာ်ဖျါထီၣ်ဝဲလၢအအိၣ်ဒီး “တၢ်နာ်, တူၢ်လိာ်တၢ် ဒီးအိၣ်ဒီးတၢ်မုၢ်လၢ်လၢ အဂၢၢ်အကျၢၤ လၢအသးပူၤ” သ့ဝဲ “ခီဖျိလၢအသူဝဲ တၢ်ကတိၤတဖျၢၣ်အံၤ” န့ၣ်လီၤ. မ်ယဟိဝၤယွၤ ကဘၣ်သူၣ်ဘၣ်သး “အၤမ့ၣ်” လၢပတဲအီၤ ကိးထံၣ်ဒဲးန့ၣ်တက့ၢ်.—စံးထီၣ်ပတြၢၤ ၁၉:၁၄.
