Yehova Wamona Ameni Yeni Kupwa ya Seho
YEHOVA wamona kulemesa kwetu kupwa kwa seho. Co ‘akatolilila mwamubwa’ bangamba bendi. Mutukamushangazala, akabwahelela manene nameme tunalingi ngoco kamandondo lika. (Mala 3:16) Tusimutwiyeni ha lijwi litukapangesa manene. Eli lijwi linapu ameni. Kuma Yehova wamona ngwendi eli lijwi lyapwa lya seho ndi? Eyo. Tucimoneni bililumbununa nomu mubanalipangesela mu Mbimbiliya mangana tuzibisise bilyapwila lya seho.
BANU BOSHE BAKATABA NGWABO AMENI
Lijwi lya Ingilishi lya ameni lilumbununa ngwalyo “cilingiwe bene ngoco” nambe “mwa busunga bene.” Lyatunda ha lijwi lya Cihebelu lije lilumbununa ngwalyo “pweni ba kulongwa,” nambe “pweni baka-busunga.” Bisimbu bimo balipangesele mu binkuta. Munima ya kulisinga, munu wendekele ngwendi ameni kumwesa ngwendi byanendeka binapu bya busunga. Co lalo walitabelele byuma byoshe bitundamo. (Kula 5:22) Kwendeka ameni ku mbunga kwashongangeyeye munu alinge byanakulahesa.—Nehe 5:13.
Ku mukanda wa Kwituluka mu Mashiko capita 27, banamwesa mubapangeselele lijwi lya ameni. Hanima ya kukobela mu Lifuti lya Cikulaheso, Baisalele bakungulukilile mukati ka Munkinda wa Ebale na wa Ngelizime mangana batolilile ku mashiko. Kubatolilile lika, oloni bakele na kukumbulula mu kumwesa ngwabo banataba mashiko. Bakele na kukumbulula ngwabo Ameni hanima ya kubatandela bukalu butunda mu kujeneka kwononoka mashiko. (Kwitu 27:15-26) Acisinganyekeni hawakumbulwila makulukazi a banalume, banakazi na banike. (Yosh 8:30-35) Cili bene kubasele kwibala majwi abendekele lije litangwa. Baisalele balingile bibakulahesele, mwafwa Mbimbiliya ngwayo: “Omwo Yoshwa wakele na kuyoya, banu ba Isalele bapangelele Shukulu Kalunga. Co munima ya kutsa [kwa Yoshwa] bakele na kupangela Shukulu Kalunga noho bantwama baje batsile baje balimwenenene bakebo babenya byuma byoshe bije byalingile Shukulu Kalunga hali Baisalele.”—Yosh 24:31.
Yesu nendi wapangesele lijwi lya ameni mangana amwese busunga bwa byuma byendekele. Oloni walipangesele mu ngila ya kulitila. Yesu kalyendekele kumamaneselelo a majwi anendeka munu, oloni wabangele kwendeka lijwi lya ameni (lije libanalumbununa mu Mbunda ngwabo “mwa busunga”) mangana amwese ngwendi byuma byendeka binapu bya busunga. Bisimbu bimo welukilile kwendeka ngwendi ameni ameni (ibanalumbununa mu Mbunda ngwabo “mwa busunga”). (Mateo 5:18; Yowa 1:51) Wamwesele baka-kumutolilila ngwendi majwi endi apwile a busunga. Yesu wapandele kwendeka ngoco mwafwa ikeye ibanene moko ya kushulisilila bikulaheso bya Njambi.—2 Koli 1:20; Kujo 3:14.
“BANU BENDEKELE NGWABO, [AMENI], CO BASHANGAZALELE YEHOVA”
Baisalele bapangesele lijwi lya ameni mubashangazalele na kulombela kuli Yehova. (Nehe 8:6; Myaso 41:13) Mubakele na kukumbulula ngwabo ameni hanima ya lilombelo, Baisalele bamwesele ngwabo banataba lije lilombelo. Ngeci, kukumbula ngwabo ameni kwakwasele boshe balizibe ngwabo bali na kulikuwa ciwano. Omu mukemwo mubalingile banu ha simbu yatwalelele Mwene Ndabiti Cikasha ca Yehova ku Yelusalema. Omwo kwakele cilika, Ndabiti walombelele lilombelo lya kutundilila kwisi ya mbunge, lije lili ku 1 Mizimbu 16:8-36. Majwi endi etele banu ku bimbunge, co “boshe bendekele ngwabo, [Ameni], co balemesele Shukulu Kalunga.” Kukumbulula kwabo mu kulikwatasana kwalingisile ciwano cabo cipwe cacibwa.
Baka-Kilisitu ba mu simbu ya tupositolo bapangesele lijwi lya ameni mubashangazalele Yehova. Baka-kusoneka Mbimbiliya nabo bapangesele eli lijwi mu mikanda yabo. (Loma 1:25; 16:27; 1 Petu 4:11) Mukanda wa Kujombolola unendeka hali tungelo baje bali na kuzumbangeya Yehova, ngwabo: ‘Ameni shangazaleni Njambi.’ (Kuj 19:1, 4) Kakangi ku biwano bya Baka-Kilisitu ba Kulibanga bapangesele lijwi lya ameni hanima ya lilombelo. (1 Koli 14:16) Oloni kubapandele kutaba lika ngoco kwa kujeneka kuzibisisa.
AMENI YETU YAPWA YA SEHO
Kuzibuka mubapangeselele bangamba ba Yehova lijwi lya ameni, kunatukwasa tumone seho ya kulyendeka ku mamaneselelo a lilombelo. Nga twendeka ameni hanima ya lilombelo lyetu, co tumwesa ngwetu bitunalombo bya busunga. Nameme tutabela mu mbunge ngwetu ameni ku lilombelo lya mbunga, tumwesa ngwetu twataba byuma bibanendeka mu lilombelo. Tucisimutwiyeni lalo bikwapwila kwa seho kwendeka ameni.
Ikamwesa ngwayo tunaka mbunge ku kulemesa Yehova. Tushaka ngwetu ameni yetu ipwe ya busunga, mukemwo tukamwesa kasingimiko na kutolilila mwamubwa ku lilombelo. Ha simbu ya lilombelo tukalemesa Yehova keti ha kutaba lika ameni, oloni na byuma bitulinga ha simbu ya lilombelo.
Ikatulingisa tulikwatasane. Ha simbu ya lilombelo lya mbunga banu boshe baje banakunguluka bakatolilila hamo ku lilombelo. (Vili 1:14; 12:5) Nga tukumbulwila hamo na bandolome na bandokazi betu, co tunalikwatasana. Co lalo nga tubaboshe tutabela hamo ngwetu ameni, ipwe mu kutambakana nambe mu mbunge yetu, co oku kwasa kulingisa Yehova atwane bitunamulombo.
Ameni yetu ikabwezelela ku kushangazala Yehova
Tukashangazala Yehova. Yehova akamono byoshe bitukalingi mu kumulemesa. (Luka 21:2, 3) Akamono byuma bikatulingisa tumulemese na bije bili mu mbunge yetu. Nameme tutolilila ku ciwano kupangesa foni, tuzibuka ngwetu Yehova aziba ameni yetu. Nga twendeka ngwetu ameni, co tulikwatasana na baje bali ku ciwano mu kushangazala Yehova.
Nameme tuliziba ngwe ameni yetu kuyesi na seho, oloni yapwa ya seho. Libulu limo lyendekele ngwalyo lijwi lya ameni limwesa ngwalyo bangamba ba Njambi bali na likulahelo, banalitabasana, banataba bibanendeka mu lilombelo, co lalo bali na lilabelelo. Ngeci, ameni yetu inapande kushangazala Yehova.—Myaso 19:14.
