Yehova nanvaha ifayita “Amem” nonromoleenyu
YEHOVA naavaha ifayita cinene unswalela wihu. Uyo ‘naaweheeha ni naaviriyana’ ukati unttottopeliyaawe ni ale anonswalela, hataa yapankaka iyo ni citthu cankani. (Mal. 3:16) Wootakihera, muupuwele nuulumo atthunaka ninromolaseehu imaara cinci—“amem”. Niireke Yehova naawacera naromolaka nuulumo nankaaninno ukati ninlompeehu? Iyee! Masi wiira nicuwele kontha isiyani novahaawe ifayita, nihaana nipacaka ucuwela nuulumo “amem” ninhimya isiyani ni ninvareliya nteko manannani mbiiblyani.
“APOOVU OTHEENE ANAAHALA WIIRA: ‘AMEM!’”
Nuulumo “amem” maanaaya wiira “ikhale yeeyo” awula “phi ciicammo”. Nno nuulumonno niphattuwacale ni nuulumo noluka iheperewu ninaaca “ukhala ookhuluvelya”, “ukhala eekhweeli”. Ukati nkiina, nno nuulumonno naavareliya nteko coolumaceriyaka myaha. Ntthu alaphaka, aaneeraka “amem” apheelaka uthoonyera wiira citthu cotheene cuulumalyaawe ikhweeli ni uthoonyera wiira naakupali citthu cotheene cinhala unkhumelela nlattu wo itthu ilaphalyaawe. (Manu. 5:22) Eeraka “amem” waatthuni, uyo ntthuuyo aathoonyera wiira aalamuliya upanka itthu yuulumalyaawe.—Nem. 5:13.
Deuteronomiyu, ikapiitulu 27, inaahimya ukati wootikhiniha waavareliyaaya nteko nuulumo “amem”. Asarayeli yahokela ilapo yaakhuluvelihiyaaya ni yaarwaa uthukumana wamwaakoni Epali ni wamwaakoni Gerizim wiira yaviriyane Nlamulo na Nluku nasomiyaka. Asarayeli khayaarwaale uviriyana paasi, masi ciicammo yaarwaale uhimyeeha wiira yaanaatthuna Nlamulo na Nluku. Weewalyaaya yahimiyaka mahusi yaarwaa waakhumelela ale yaahala ukhotta wiiwelela Nlamulo, asarayeli yahohimyeeha yeeraka “amem”. (Deut. 27:15-26) Muupuwele malove menci aalopwana, aathiyana ni aanamwane yeeraka “amem”! (Jos. 8:30-35) Khweeliini, ayo khayaaliyanle mena vakaani moolumo yoolumalyaaya nne nihukunne. Ni asarayeli yahopanka itthu yoolumalyaaya: “Atthu o Isarayeli khayaahiyale unswalela Yehova mahuku otheene a Josuwe ni mahuku otheene yaaryaaya akumi mahumu, nakhwileene Josuwe ni mahuku otheene yaakhalaaya yacuwelaka miteko ca Yehova caakavihenre atthu o Isarayeli.”—Jos. 24:31.
Yesu ciicammo aanawiiraka “amem” apheelaka woonihera wiira moolumwaawe okhweeli, masi kheera “amem” khampa cineereehu ilelo. Yesu kheera “amem” namalihale wiiwa nuulumo, masi eeraka “amem” hinaaya wuuluma itthu. (Ni Emakhuwa, nuulumo “amem” toko naaromolakaawe Yesu, naalikana wiira “nkhuluvele” awula “kinoohimyerani ikhweeli”.) Ukati nkiina, Yesu aanawaakuleliha nno nuulumonno, eeraka “amem, amem”.(Mat. 5:18; Joau 1:51) Yaari mananna owaakhuluveliha mayooviriyana wiira yoolumaawe yaari ikhweeli. Yesu pooti woolumaawe akhuluvelaka cinene kontha citthu cotheene cilakenlyaawe Nluku upanka, cinhala umaliheriya ni Yesu.—2 Akor. 1:20; Apoka. 3:14.
“APOOVU OTHEENE YAHEERA: “AMEM!” NI YAHONTTOTTOPELA YEHOVA”
Asarayeli ciicammo yaaneeraka “amem” ukati wonttottopela Yehova ni woolompa. (Nem. 8:6; Isaa. 41:13) Yeeraka “amem” wuumaleloni nivekelo, ayo yaathoonyera wiira ahaamini itthu yoolumiye. Yaari mananna atthu otheene ookela nnivekeloni, ni uyo ukatyuuyo waanaakhalana ifayita. Iyo phi itthu yaakhumelenle ukati Davidi waatthapalyaawe nlattu woorwaaniya uYerusalemu ikasa yo nleehano ya Yehova. Ule ukatyuule, Davidi ahopanka nivekelo no ncipo nomaana nihimiye nhina 1 Ikoronika 16:8-36. Atthu yaari nne nipuronne, yahotteeliya cinene nlattu wo nivekelo na Davidi mpaka “apoovu otheene yaheera: “Amem!” ni yahonttottopela Yehova.” Khweeliini, nlattu wo nno nivekelonno, ule ukatyuule wahokhala wootteeliha nrima.
Makristau oopacera ciicammo yaaneeraka “amem” wiira anttottopele Yehova. Phimaana anamantikha Ibiiblya yahantikha nno nuulumonno imaara cinci mmawarakhani waya. (Aroo. 1:25; 16:27; 1 Pet. 4:11) Ilivuru ya Apokalipise ciicammo inaahimya cowumpiya co wiirimu coominepani canttottopelaka Yehova ni ceeraka: “Amem! Munttottopele Yehova!” (Apoka. 19:1, 4) Makristau oopacera yaaneeraka “amem” wiimaleloni mavekelo yaapankesiya wamikutthaanoni. (1 Akor. 14:16) Masi nno khaanaari nuulumo naalamuliyaaya wuuluma paasi, woohuupuwela inhimyaaya.
“AMEM” NONROMOLEENYU HAANA IFAYITA
Vano niitthucaleehu itthu inhimyaaya ni mananna ninvareliyaaya nteko nuulumo “amem”, nihocuwela nlattuni ninlamuliyeehu wiira “amem” wiimaleloni nivekelo. Neeraka “amem” wiimaleloni nivekelo nimpankeehu hiivano, ninaathoonyera wiira moolumweehu okhweeli. Neeraka “amem” wiimaleloni nivekelo nimpankiya waatthuni, hataa nihiiwiyaka ni ntthu, ninaathoonyera wiira nihokupali itthu yuulumiye nnivekeloni. Ciicammo ninlamuliya wiira “amem” nlattu wo citthu cikiina.
Ninaathoonyera wiira khanineetthaala ukati wooswali. Hiiva nimpheela wiira “amem” nonromoleehu akhalane ifayita. Phimaana, nihaana woonihera ihisima ni uhiitthaala ukati woopankiya nivekelo. Uswali wihu khunakhala wiira “amem” paasi, masi ciicammo mananna cinkhaleehu ukati woopankiya nivekelo.
Ninaakhala owiiwanana naasuulupaleehu ni asirokorihu. Ukati woopankiya nivekelo waatthuni, atthu otheene o wanlokoni anaakhala owiiwanana yaviriyanaka itthu imocaaru. (Mite. 1:14; 12:5) Atthu otheene neeraka “amem”, hataa niiraka wanrimani wihu paasi, ninaatepa ukhala owiiwanana naasuulupaleehu ni asirokorihu. Iyo phi itthu ikiina immwiiriha Yehova waakhula nivikelo nimpankiya.
Wiira “amem” ankhala mananna onttottopela Yehova
Ankhala mananna onttottopela Yehova. Yehova nawoona citthu cankani cimpankeehu wiira ninswalele. (Luka 21:2, 3) Uyo naacuwela inoopuweleehu ni irineehu wanrima wihu. Hataa ukhalaka wiira nineewelela nkutthaano ntelefooneni, “amem” mwankani ninonromoleehu Yehova nanviriyana. Neeraka “amem”, ninaathoonyera ukhala wamoca ni atthu ari umikutthaanoni wiira ninttottopele Yehova.
“Amem” nonromoleehu pooti ukhala itthu yankani, masi Yehova nanvaha ifayita. Toko cineeraaya ilivuru ineehaniya enciclopédia inoopela mwaha Ibiiblya, ale anonswalela Nluku “yaromolaka nna nuulumonna, anthoonyera ukhuluvela, ukupaleeha ni niweherero nuulupale nirinaaya wanrimani waya.” Khweeliini, khula “amem” ninonromoleehu nantteeliha nrima Yehova venci!—Isaa. 19:14.
