Yeova Wacindika Sana Izwi Lyakuti ‘Ameni’
YEOVA wacindika sana ukupepa kwitu. ‘Akauvwa nu kutezya’ uku yaomvi yakwe, nupya wacindika na vyonsi vino tukacita pa kumulumbanya nanti vingaya ivinono uli. (Malaki 3:16) Tale elenganyini api izwi lino twalanda imiku iingi. Izwi lilyo i lyakuti ‘Ameni.’ Uzye Yeova wacindika izwi kwene lii nanti likaloleka ilyanguke? Ee! Pakuti tumanye umulandu uno walicindikila, katulande pa upiliulo wi izwi kwene lii na vino lyaomviwa muli Baibo.
‘ANTU YONSI YALALANDA UKUTI AMENI!’
Izwi lya Cizungu lyakuti “Ameni” likapiliula ukuti “ciye vivyo kwene,” nanti “ica cumi.” Izwi kwene lii lyafuma ukwi izwi lya Ciyebulai ilikapiliula ukuti “ya uwa cumi” nanti “ya umutailwe.” Nupya insita zimwi lyaomviwanga mu cilye. Ndi icakuti umwi walapa umulapo, walandanga ukuti ‘ameni’ pakuti cisininkiziwe ukuti vino watalanda ivya cumi nu kuti watazumilizya ivili vyonsi ivingamucitikila ndi wafilwa ukusunga umulapo uwo. (Mpe. 5:22) Ndi walanda ukuti ameni, ale watakwata usininkizyo wakuti alafikilizya vino walapa.—Neem. 5:13.
Inzila isuma iya kuomvezyamo izwi lyakuti ‘ameni’ yalembwa pa Malango cipande 27. Lino aina Izlaeli ingile mu Mpanga ya Ulayo, yali nu kuyakongana pakasi ka mwamba wa Ebali na Gelizimu pakuti yuvwe Masunde ali nu kuwelengwa. Yataali sile nu kuvwa lelo yali nu kuzumila ukuti yamalondelanga Amasunde kwene yayo. Nupya lino ivyali nu kuyacitikila ndi yatuvwilile vyawelenzilwe, yonsi pamwi yalanzile ukuti ‘Ameni!’ (Malan. 27:15-26) Elenganyini pali vino aonsi, anaci na ana imintapendwa yaswike mwi zwi likulu! (Yoswa 8:30-35) Yatatazile ilile umulapo uno yalafile uwanda uuwa. Nupya aina Izlaeli yasungilile umulapo wao, pano yayanenyile ukuti: ‘Yalinzile ukutumikila Yeova mu nsita yonsi lino Yoswa na ikolo amucizile imyaka yali nu umi. Aikolo kwene yaya yamanyile imilimo yonsi ino Yeova wacitiile aina Izlaeli.’—Yoswa 24:31.
Yesu nawe waomvyangako izwi lyakuti ‘ameni’ ku kupeela usininkizyo wa kuti vino walandanga vyali ivya cumi, nomba waliomvyanga mu nzila iiyele. Mu cifulo ca kuliomvya ku kwasuka vino umwi walanda, waomvyanga ‘ameni’ (izwi lino umu Cizungu lyasenulwa ukuti “ica cumi”) pa kutandika ukulanda amazwi yamwi ukulangilila ukuti vino akulanda ivya cumi. Alino insita zimwi waswilizyangapo nu kuti “ameni ameni.” (Mate. 5:18; Yoa. 1:51) Fwandi aakutikanga yamanyanga ukuti vino akulanda ivya cumi. Yesu walandanga ivisininkiziwe pano aliwe wakweti amaka yakulenga amalayo yano Leza walaya antu ukufikiliziwa.—2 Kol. 1:20; Umbw. 3:14.
‘ANTU YALANZILE YATI AMENI NUPYA YALUMBANYIZYE YEOVA’
Aina Izlaeli yaomvyanga izwi lyakuti ameni pa kulumbanya Yeova na pa kupepa kuli aliwe. (Neem. 8:6; Masa. 41:13) Ndi yasuka ameni pacisila ci pepo, akutikanga yalanganga ukuti yatiyazumilizya ivyativilandwa umwi pepo. Fwandi yonsi azanyilweko yaalinzile ukwasukako, nupya yaipakizyanga ukupepa Yeova umu nzila kwene ii. Cikwene i cacitiike lino Umwene Davidi waleesile imbokosi ya upangano yakwe Yeova uku Yelusalemu. Lyene lino ukuzevya ukwalondelilepo kwacitikanga, Davidi wapefile ipepo ilyafisile sana antu pa mwenzo ilyalembwa pali 1 Milandu 16:8-36. Azanyilweko yatemilwe pa mazwi yano walanzile “nga antu yonsi yavwanga yati, ‘Ameni.’ Alino yalumbanya Yeova.”
Umu nsita ya yatumwa namo izwi lyakuti ‘ameni’ lyaomviwanga pa kulumbanya Yeova. Ya kalemba yakwe Baibo yalemvile izwi kwene lii umu makalata imiku iingi. (Loma 1:25; 16:27; 1 Pet. 4:11) Ibuku lya Umbwilo likalanda pali vino angeli yakalumbanya Yeova ala yakuti: ‘Ameni! Lumbanyini Jah!’ (Umbw. 19:1, 4) Aina Klistu ya kutandikilako yaomvyanga sana izwi lyakuti ‘Ameni’ pa cisila ci pepo lya kumalilila ukulongana. (1 Kol. 14:16) Nomba yataomvyanga izwi lii ukwaula nu kwelenganyapo.
UMULANDU UNO UKULANDA ‘AMENI’ KWACINDAMILA
Ndi twasambilila vino aomvi yakwe Yeova yaomvyanga izwi lyakuti ‘ameni’ alino tungamanya umulandu uno cacindamila ukuomvya izwi lii pa cisila ci pepo. Ndi twaliomvya pa cisila cipepo lya pa lwitu, tukalanga ukuti itusininkizya vino itulanda. Nupya ndi twalanda ‘ameni’ nanti sile umu mwenzo, lino umwi wapepa api umba, tukalanga ukuti ituzumilizya ivyativilandwa. Lolini imilandu na yuze iikalanga vino izwi lya kuti ‘ameni’ lyacindama.
Tukasumbako mano lino umwi akupepa pano ipepo nalyo lyaya pali vino tukacita umu kupepa kwitu. Tukacindika Yeova lino tukupepa muli vino tukalanda nu kucita. Vino tukalondesya ukulanda ‘ameni’ ukufuma pansi ya mwenzo, cikalenga tukwate amelenganyo yasuma nu kwika sana mano kuli vino vikulandwa umwi pepo.
Tukaya alemane lino tukupepa Yeova. Amapepo aakapepwa lino tuli pa kulongana yakatwazwa ukwika mano pali vino yonsi umu cilongano yakuuvwa. (Mili. 1:14; 12:5) Ndi twasukila capamwi na ina itu na ya nkazi, tukaya alemane sana. Ukwasuka umu mwenzo nanti ukufumya izwi lino tukulanda ‘ameni’ capamwi kungalenga Yeova asuke ipepo litu.
Ukulanda ‘ameni’ kukalenga twalumbanya Yeova
Tukalumbanya Yeova. Yeova akamanya vyonsi vino tukacita lino tukumupepa. (Luka 21:2, 3) Akalola vino tukayuvwa ni ivili umu mwenzo witu. Nanti sile lino tukukutika ukulongana pali foni, tutanga tutwisike ukuti Yeova akauvwa ndi twalanda ‘ameni’ pa cisila ci pepo. Ndi twalanda ‘ameni,’ tukalumbanyizizya capamwi Yeova na yano iyazanwa umu kulongana.
Limwi ukulanda ‘ameni’ kungaloleka kwati kutacindime, lelo kwacindama sana. Ibuku limwi (Bible encyclopedia) likalanda ukuti: “Ukuomvya izwi lii,” kukalenga aomvi yakwe Leza ukulanda “vino yakuyuvwa, ukwaula ukutwisika, na vino yakwelenganyapo.” Lekini lyonsi lino tukulanda ‘ameni’ twazanzya Yeova.—Masa. 19:14.
