Jehovha Anoreremeja Kuita Kwenyu “Ameni”
JEHOVHA anoreremeja maningi kunamata kwedu. Iyena ‘anopurukira zve anozwa’ vashandiri vake, azvinenyi zvese zvavanoita kuitira kumukuja, dangani zvakakura kana kuti haiwa iyena anozvivona. (Malakia 3:16) Inga muezaniso, ngativone gama ratinoshandisaya maningi, ro kuti “ameni.” Kunanga kuti Jehovha anotoreremejavo gama iri here? Hina, anorireremeja! Ngenyi anorireremeja? Ngativone kuti gama iri rinorevenyi zve rinoshandiswa kudini mu Bhaibheri.
“VANDHU VESE VANOZODAVIRA VECITI, ‘AMENI!’”
Ku cingezi gama rokuti “ameni,” rinoreva ‘ngazviitike kudaro’ kana ‘zvokadi.’ Gama iri rinobva ku ciHebheri recireva ‘kuva wakagondeka’ kana ‘kuthembeka.’ Nguva jimweni raishandiswa pa kutonga ndava. Mundhu paaipera kuita mbhiko, waidikana kuita “ameni,” ngo kuita kudaro, mundhuwo waitendera muviyo wo mbhikoyo. (Bziverengo 5:22) Paainanga “ameni” pakawanda vandhu, mundhuwo wainga no thangwe ro kuvangisa cisungo cake.—Neemia 5:13.
Muezaniso unonasa kuzwisisika wo kushandiswa ko gama rokuti “ameni” unowanika mu bhuku ra Deuteronòmio cipauko 27. Pavakangwina mu Nyika yo Cipikihwa, vaIziraeri vaidikana kusongana pa dundhu Ebhari no pa dundhu Garizimi kuitira kuti vazwe kuverengwa ko Mutemo. Ivona avacaidikana kupurukira basi, asi vaidikana kukhombija kuti vaitenderana nawo. Kuti vaite zvondhozvo vaidikana kudavira kuti “ameni” povaizwa muviyo wo kutama kupurukira. (Deuteronòmio 27:15-26) Amborangariranyi zviuru zvo vanarume, vanakaji no vana vadoko vecipa mupinguro ngo izvi guru! (Joxwa 8:30-35) Zvokadi kamare, ivona avazivi kukanganwa mupinguro wo vakapa dhiya yondhoyo. VaIziraeri vondhovo vakakwanirisa cigondiso cavo, inga zvakatahwa: “VaIsraeli vakaxandira Tenji pa kurarama kwese ka Joxwa, no pa kurarama kwese ko madoda akasara sure ka Joxwa, akaziva bziito bzese bzaakaitira Tenji vaIsraeli.”—Joxwa 24:31.
Jesu wakashandisavo gama ro kuti “ameni” kuitira kukohomejera zvaainanga, asi wairishandisa mu njira inosisira. Kusiyapo kushandisa “ameni” (kucingezi rakasandujwa kuti “zvokadi”) kuitira kupingura zvainga zvapera kunangwa, iyena wairishandisa kuitira kutangisa zvokadi zvaainga ecinanga. Kazinji iyena wainanga kuti “ameni, ameni” kana kuti “zvokadi.” (Mateu 5:18; Johani 1:51) Ngokudaro, iyena waiita kuti vandhu vaimupurukiraya vave no cokwadi co kuti zvaainangaro zvainga zvokadi. Jesu waibhuya no kuthemba kwese ngo kuti wainga no citendehwa co kukwanirisa zviporofita zvese zva Mwari.—2 VaKorinto 1:20; Apokalipsi 3:14.
‘VANDHU VESE VAKATI ‘AMENI’ ZVE VAKAKUJA JEHOVHA’
VaIziraeri vaishandisavo gama ro kuti “ameni” pavaiita mukumbiro no kukuja Jehovha. (Neemia 8:6; Nduyo 41:13) Ngo kunanga “ameni” pasure po kuita mukumbiro, zvaitatija kuti ivona vaipurukira zve vaitenderana nazvo. Vese vaitoraro rutivi pa kuita zvondhozvo, vaidakara ngo kunamata Jehovha mu njira yondhoyo. Izvo ndizvona zvakaitika na Mambo Dhavhidhi paakaendesa Arka ya Jehovha ku Jerusalema. Pakati po mabuso akatevera, iyena wakadakara ngo mwoyo wese zvokuti wakaita mukumbiro mu njira yo ndumbo, inga zvatinovona pana 1 Kronike 16:8-36, Bhaibheri Mazwi Akacena aMwari. Vese vainga pondhopo vakandundihwa ngo magama ondhowo zvokuti ‘vandhu vese vakati ‘ameni’ zve vakakuja Jehovha.’ Hina, ivona vakadakara zvokuti vakanamata Jehovha pamwepo.
MaKristu o muzana ro kutanga o makore vaishandisavo gama ro kuti “ameni” povaikuja Jehovha. Vatari vamweni vo Bhaibheri vakatoribatanijavo mu karata javo. (VaRoma 1:25; 16:27; 1 Pedru 4:11) Bhuku ra Apokalipsi rinotonangavo ngo pamusoro po zvisikwa zvo mugore, zvecikuja Jehovha ngo mazwi okuti: ‘Ameni! kujanyi Jehovha.’ (Apokalipsi 19:1, 4, Shanduro yeNyika Itsva) Kazinji maKristu o muzana ro kutanga ainanga “ameni” pakupera kuita mukumbiro musongano powaipera. (1 VaKorinto 14:16) Asi, iri asipi gama ro kuti rinodikana kundonangwavo haro.
NGENYI KUITA KWENYU “AMENI” KUNOSISIRA?
Tapera kuvona kuti vashandiri va Jehovha vaishandisa kudini gama ro kuti “ameni,” tavona kuti i njira inorevo yo kupejisa ndiyona mukumbiro. Patinorinanga pakupera kuita mukumbiro wedu, tinokhombija kuti tinothemba kamare zvotanangaro. Zve patinondundihwa kuti tiite “ameni,” pikija mu cinyararire, pakawanda vandhu, tinokhombija kuti tinotenderana no zvanangwaro. Vonanyi kuti ngenyi “ameni” wedu unosisira.
Tinokhombija kuti tiri kunasa kupurukira ngo kuti i divi ro kunamata kwedu. Tinonamata Jehovha paunonga uciitwa mukumbiro, haiwa basi ngo zvatinonanga asi ngo mugariro wedu. Cido cedu co kuda kuita “ameni” cingatibesera kuti tirambe tino mugariro wakanaka zve toramba teciita kuti murangariro wedu unase kupurukira mukumbiro.
Itusu takabatana inga vanamati. Mukumbiro unoitwa pakawanda vandhu, unotiita kuti titeye njeve ku ciro ciri kupurukihwa ngo ungano yese. (Maitiro o Vapostori 1:14; 12:5) Patinodavira pamwepo no hama no hambzaji, tinokhombija kuti takabatana. Azvinenyi dangani tadavira ngo izwi guru kana ngo mu mwoyo mwedu, “ameni” wedu unopa Jehovha thangwe kuti aite mukuzwirana no mukumbiro wedu.
Kuita kwedu “ameni” kunoita kuti tikuje Jehovha
Tinokuja Jehovha. Jehovha anovona zvese zvatinoita mu kunamata kwedu. (Luka 21:2, 3) Iyena anovona zvinotindundiraro no zviri mu mwoyo mwedu. Pikija patinonga tecizwa musongano ngo mu foni, tingava no cokwadi co kuti “ameni” wedu unozika ndi Jehovha. Patinonanga “ameni” tinobatana pamwepo inga ungano kuti tikuje Jehovha.
“Ameni” wedu ungavoneka inga ciro cicikasisiri, asi unosisira maningi. Encyclopedia imweni inobhuya ngo zvo Bhaibheri yakati: Ngo kushandisa gama iro, vashandiri va Mwari vangakhombija “kuthemba, kuvangisa kutendehwa kwavo pomwe no soterero inonga iri mu mwoyo mwavo.” Kuita kwedu “ameni” kunodakajisa Jehovha.—Nduyo 19:15.
