“Amen” yoye oya simana kuJehova
NGELE tatu longele Jehova, oha kala e shi hokwa. Oha “pulakene nokuuva” aapiya ye, nokwa lenga kehe shoka haya ningi ye mu longele kutya nduno oshishona. (Mal. 3:16) Pashiholelwa, dhiladhila koshitya shoka tashi vulika twa popya iikando oyindji. Oshitya shoka osho “amen.” Mbela Jehova okatya hono okwe ka tala ko ngaa ka simana? Eeno! Opo tu mone kutya omolwashike, natu taleni kutya oshitya shoka otashi ti ngiini nosha longithwa ngiini mOmbiimbeli.
“NAANTU AYEHE NAA YAMUKULE TAA TI: ‘AMEN!’”
Oshitya shOshindonga “amen,” otashi ti “nashi kale ngaaka” nenge “oshoshili.” Osha za koshitya shOshihebeli shoka tashi ti “kala omudhiginini” nenge “kala omwiinekelwa.” Omathimbo gamwe osha li hashi longithwa miinima yopampangu. Konima ngele omuntu a gana, okwa li ha ti “amen,” opo a ulike kutya shoka a popi oshi li mondjila nokwi ilongekidha okutaamba ko iilanduliko yaashoka a popi. (Num. 5:22) Ngele okwa ti “amen” montaneho yaantu, shoka otashi ulike kutya okwa li ta ka dhiginina shoka a popi. — Neh. 5:13.
Oshiholelwa oshiwanawa shankene oshitya “amen” sha longithwa, oshi li muDeuteronomium ontopolwa 27. Konima sho Aaisraeli ya yi mEvi lyEuvaneko, oya gongala pokati kondundu Ebal nondundu Garizim, opo ya leshelwe Ompango. Kaya li owala ya yi ko ya ka pulakene, ihe onelalakano wo lyoku yi taamba ko. Shoka oye shi ningi, mokuyamukula ya ti “Amen!” sho ya leshelwa iizemo mbyoka hayi zi mokwaavulika. (Deut. 27:15-26) Dhiladhila owala nkene aalumentu, aakiintu naanona omayuvi ya li ya yamukula newi lyopombanda! (Jos. 8:30-35) Osha yela kutya kaya li ya dhimbwa shoka ya popile esiku ndyoka. Aaisraeli mboka oya li ya gwanitha po oohapu dhawo, molwaashoka Ombiimbeli otayi ti: “Josua manga a li e na omwenyo, oshigwana shalsrael osha longele Omuwa. Osho sha li pethimbo lyaawiliki ayehe mboka ya li ya mono yo yene shoka Omuwa e shi ningile Israel.” — Jos. 24:31.
Jesus naye okwa li a longitha oshitya “amen,” opo a zimine kutya shoka sha popiwa oshoshili, ihe okwa li he shi ningi momukalo gwi ikalekelwa. Pehala lyoku shi longitha mokuyamukula shoka sha popiwa, okwa li a longitha oshitya “amen” (shoka mOshindonga sha tolokwa “oshoshili”) petameko lyaashoka ta popi, opo a koleke kutya oshoshili. Omathimbo gamwe, oshitya shoka okwa li he shi endulula ta ti: “amen amen.” (Mat. 5:18; Joh. 1:51) Kungawo, okwa li ha shilipaleke aapulakeni ye kutya oohapu dhe odhoshili lela. Jesus okwa li ha vulu okupopya momukalo ngoka, oshoka oye a li a pewa oshinakugwanithwa shokugwanitha po omauvaneko agehe gaKalunga. — 2 Kor. 1:20; Eh. 3:14.
“AANTU AYEHE OYA TI: ‘AMEN,’ NOYA SIMANEKE OMUWA”
Aaisraeli oya li wo haya longitha oshitya “amen,” uuna taya hambelele Jehova nongele taye mu galikana. (Neh. 8:6; Eps. 41:13) Uuna mboka ya pulakena ye shi popi pehulilo lyegalikano, oya li haya ulike kutya otaya tsu kumwe naashoka sha popiwa. Ayehe mboka ya li po, oya li haya kutha ombinga nokunyanyukilwa okulongela Jehova momukalo ngoka. Shoka osho sha li sha ningwa po, sho omukwaniilwa David a eta Oshikethahangano shaJehova kuJerusalem. Pethimbo lyoshituthi shoka sha ka landula ko, okwa galikana egalikano tali zi komutima molupe lweimbilo, ndyoka li li mOndjalulo yotango 16:8-36. “Aantu ayehe oya ti: ‘Amen,’ noya simaneke Omuwa,” oshoka oya li ya gumwa lela koohapu ndhoka. Sho ya yamukula ngawo ayehe, osha gwedha ko kenyanyu lyawo.
Aakriste yomethelemimvo lyotango nayo oya li haya ti “amen,” uuna taya hambelele Jehova. Aanyoli yOmbiimbeli nayo oye shi longitha olundji moontumwafo dhawo. (Rom. 1:25; 16:27; 1 Pet. 4:11) Membo lyEhololo omwa popiwa nokuli iishitwa yopambepo tayi hambelele Jehova tayi ti: “Amen! Simanekeni Kalunga!” (Eh. 19:1, 4) Aakriste yopetameko oya li haya ti “amen,” konima ngele ya galikana pokugongala. (1 Kor. 14:16) Nonando ongawo, kaya li owala haye shi popi inaaya dhiladhila.
OMOLWASHIKE “AMEN” YOYE YA SIMANA?
Ngashingeyi sho twa konakona kutya oshitya “amen” osha li hashi longithwa ngiini, oshe tu kwathela tu mone kutya osha simana oku shi popya pehulilo lyegalikano. Uuna tatu shi popi pehulilo lyegalikano lyetu lyopaumwene, ohatu ulike kutya otwa zimina shoka twa ti. Uuna tatu ti “amen” kegalikano lyomontaneho nokuli nuuna kaatu uvitike, ohatu ulike kutya otwa tsa kumwe naashoka sha popiwa. Natu ka taleni ishewe kutya omolwashike “amen” yetu ya simana.
Ohatu kala twa pulakena nawa, uuna gumwe ta galikana, molwaashoka oshi li oshitopolwa shetu shokulongela Jehova. Ihatu longele owala Jehova mwaashoka tatu popi megalikano, ihe nomeihumbato lyetu wo pethimbo lyegalikano. Okupopya kwetu “amen” tashi zi komutima, otashi vulika ku tu kwathele tu ihumbate momukalo omwaanawa nokukala twa gandja eitulomo kegalikano.
Otwa hangana tu li aalongeli yaJehova. Egalikano lyomontaneho, ohali tu ningitha tu gandje eitulomo kwaashoka tashi popiwa mo shi uvitike kegongalo alihe. (Iil. 1:14; 12:5) Uuna egalikano ndyoka lye tu inyengitha atuhe tu tye “amen,” tu li aamwatate naamwameme, ohashi tu hanganitha nokuli shi vulithe nale. Kutya nduno otu shi popye muule nenge momitima, ohashi ningitha Jehova a ninge shoka twe mu pula.
Ohatu hambelele Jehova, uuna tatu ti “amen”
Ohatu hambelele Jehova. Jehova oha mono kehe shimwe shoka tatu ningi, sho tatu mu longele. (Luk. 21:2, 3) Oha mono omainyengotompelo getu naashoka shi li momitima dhetu. Nonando otu kale twa pulakena kegalikano lyopokugongala okupitila mongodhi, e tatu ti “amen,” Jehova ote tu uvu. Kungawo, otatu hambelele Jehova naamboka ye li pokugongala.
“Amen” yetu otashi vulika yi kale ya fa kaayi na ongushu, ihe oya simana. Embo Bible encyclopedia otali ti kutya “oshitya shoka ngele tashi longithwa,” aapiya yaKalunga ohaya vulu “okuulika kutya oya inekela, oya taamba ko lela noyi itaala momitima dhawo” shoka sha popiwa. Onkee ano, aluhe tatu ti “amen,” nashi simanekithe Jehova. — Eps. 19:14.
