Yehova Onnamvaha esisapo “Aamee” Anyu
YEHOVA onnacicimiherya malapelo ahu. “Apwiya [Yehova] eniiwa sooloca” sa akapuro aya, nave onnacicimiherya soothene nnapakaahu wi nimuhakalalihe moohipwacha oyeva waya. (Malak. 3:16) Ntoko yootakiherya, muthokororye nsu nenlo nikhovelenlaahu oloca mu ilukuluku sincipale. Nsu nlo ti “aamee.” Apwanne Yehova onnacicimiherya nsu nenla nikhaani? Chiryene, onnacicimiherya! Wi nsuwele nthowa nene, hankooni nthokororye yootaphulela ya nsu nla nnataphulelaaya ni mukhalelo nnaphariheliwaaya Mpiipiliyani.
‘ATXHU OTHENE ANAHAALA WAKHULELA: AMEN!’
Masu awi “aamee” anataphulela “okhale hiiha,” naari “chiryene.” Masu ala anarweela mu elocelo ya Ehepiri anataphulela “okhala oororomeleya,” “okhala eeparipari.” Wiiliwiili yaaphariheliwa mu miyaha sa othoriha. Muchu amanle olipela, owo aaphwanela oloca “aamee” wi aroromelihe wi yeeyo aaloceiye ti yaweemereryeya nave wi aahaala weemererya sookhumelela saya. (Nam. 5:22) Vaava muchu aaloceiye “aamee” vanlakani owo aanakhalano nthowa ntokotoko na waakhwaniherya yoororomeliha awe.—Neh. 5:13.
Yootakiherya yootannya murima erempwale mu Malamulo ecima 27. Aisarayeli emanle ovolowa mu Elapo ya Nlakano, awo yaathukumanne va Mwaako Epali ni Mwaako Kerisimu wi yiiwe nlamulo nenlo naalakhanyiwa. Tahi wi awo yaari vaavaale wi yeeremoona owiriyana pahiru nyenya wi elokohe vanlakani wi yaaneemererya nlamulo. Awo yaaheerano yeeyo moorweela wa oloca “amen!” vaavaa saalakhanyiwaaya sookhumelela sa ohiiwelela. (Malam. 27:15-26, BNM) Nkaanyiheryani nsu na alopwana ancipale, athiyana, ni anamwane elocaka moovuwa evahaka naakhulo naya! (Yos. 8:30-35) Mweeparipari awo hiyaacuwala masu yaawo yaaloncaaya mu nihiku nenle. Nave Aisarayeli yaawo yaahikhapelela masu aya, ntakhara wi yoorepiwa: “Aisarayeli yaahaalapa Apwiya Yooshuwa ari mukumi ni elukuluku yoothene ya asitokweene yaakhala ni yoowo, yoonne soothene Apwiya yaaweerenlaaya aIsarayeli.”—Yos. 24:31.
Yesu aahipharihelatho nsu nawi “aamee” wi eemererye yeeyo aaloceiye, nyenya eenreno mmukhalelo wavameekhaaya. Ohiya opharihela nsu nla wi araceelihe nsu nikina, owo aanampharihela “aamee” (mu Elomwe nnataphulela “eparipari ene”) wi apacerihe masu eeparipari. Ikwaha ikina, owo aanuuluulela nsu nla alocaka “aamee aamee.” (Mat. 5:18; Yoh. 1:51) Mwa yeela, owo aanaaroromeliha alipa oowiriyana awe wi masu awe yaari chiri eeparipari. Yesu aanwerya oloca eparipari yeela nthowa nawi ti yoowo pahiru ovahiwe owerya wa okhwaaniherya soororomeliha sa Muluku.—2 Kor. 1:20; Wup. 3:14.
“ATXHU OTHENE YAHI: ‘AMEN!’ NAVE YAHATXITXIMIHA APWIYA”
Aisarayeli yaanapharihelatho nsu nawi “aamee” vaavaa yaavahaaya ncicimiho ni mavekelo wa Yehova. (Neh. 8:6; Sal. 41:13) Mu oloca nsu nawi “aamee” emanle ovekela, yaale yaawiriyana yaanooniherya wi awo yaaneemererya yeeyo yaalociwe. Achu oothene yaakhala vaava yaanapaka makupa mu nivekelo, nave yaanapuha omulapela Yehova mmukhalelo yoola. Ti yeeyo yeeren’ye elukuluku Mwene Tavite aamuruuhaleiye Aarka a Yehova o Yerusalemu. Variyari va yawuupuserya yeeyo yeeren’ye ohoolo waya, owo aahipaka nivekelo mmukhalelo wa ncipo nenlo nrempwale mu 1 Matharihelo 16:8-36, BNM. Achu yaawo yaari vaavaa yaahiceenyeryeya ni masu yaawo ophiyerya wi “atxhu othene yahi: “Amen!” Nave yahatxitximiha Apwiya.” Aai, waakhula waya mwawiiwanana waahaaceererya ohakalala mu nihiku nenle.
Moolikana, Akristu a nsana noopacerya yaanapharihela nsu “aamee” elukuluku yaamucicimihaaya Yehova. Alipa oomurepa Piipiliya wiiliwiili yaanaphitaanyerya nsu nenla mu ikaarata saya. (Aro. 1:25; 16:27; 1 Ped. 4:11) Mu liivuru a Wuupulula onnaloca sa soopatusiwa soomunepani wirimu sinamucicimiha Yehova iriki: “Aamee, Apwiya ecicimihiwe!” (Wup. 19:1, 4) Akristu oopacerya wiiliwiili yaanaloca “aamee” mmavekelo yaapakiwa imanle mithukumano saya. (1 Kor. 14:16) Nyenya, nla hinaari nsu awo yaamoonaaya opharihela ehipacenrye wuupuwela toko.
NTAKHARA HEENI “AAMEE” ANYU OREIYE OOCHUNEYA?
Nimanle ohuserya mukhalelo alapeli a Yehova yaapharihelaaya nsu nawi “aamee,” ninnanwerya woona ntakhara heeni ti woophwanelela oloca “aamee” omakuchuwelo wa nivekelo. Elukuluku nnalocaahu nsu nenla omakuchuwelo wa nivekelo nahu, nnooniherya wi ninnaroromela chiryene yeeyo nloncaahu. Nave vaavaa nnaakhulelaahu nriki “aamee” naamwi nlocaka ni mmurima murima, naari mu nivekelo na vanlakani, nnooniherya wi ninneemererya yeeyo elociwe. Muthokororye mathowa makina “aamee” ahu oreiye oochuneya.
Ninnakhala a mvai ni oomaaleleya mmalapelo ahu. Ninnamulapela Yehova variyari va nivekelo ohiya pahiru orweela mwa yeeyo nnalocaahu nyenya orweela mwa mukhalelo nnakhalaahu. Nchuno nahu na omuloca “aamee” nnamunikhaviherya okhalano muupuwelo woophwanelela ni otikitherya muupuwelo ahu mu nivekelo.
Nnakhala awiiwanana ntoko alapeli. Nivekelo na vanlakani nnanrehererya wi ntikitheryeye wa yeeyo muloko woothene onawiriyanaaya. (Saw. 1:14; 12:5) Vaavaa nnaceenyeryeyaahu waakhulela vamoha ni anna ni arokora ahu, nnakhala awiiwanana. Moohipwacha waakhanle wi nnaloca moovuwa naari mmurima murima, “aamee” ahu onnamvaha Yehova mathowa a weeravo echu mwa yeeyo nivenkaahu.
“Aamee” ahu onnapaka makupa mu omucicimiha Yehova
Ninnamucicimiha Yehova. Yehova onnoona soothene nnapaakaahu mmalapelo ahu. (Luka 21:2, 3) Owo onnoona echu enanceenyerya ovekela ni echu eri mmurimani mwahu. Naamwi niwiriyanaka mithukumano mu telefoni, nnaphwanela ororomela wi “aamee” ahu onniiwiiwa ni Yehova. Vaavaa nnalocaahu “aamee” nnakhala vamoha ni yaale ari mmithukumano nimucicimihaka Yehova.
“Aamee” ahu onanwerya wooneya ntoko wi haano esisapo, nyenya owo ookhalano yootaphulela yamphurelo. Piipiliya mmoha a encyclopedia ooloca: “Orweela mwa opharihela nsu nimoha nenla,” alapeli a Muluku ananwerya wooniherya “nroromelo, weemererya woolipa, ni ewehereryo yeeyo eri mmurimani mwaya.” “Aamee” ori oothene onaphwanela omucicimihaka Yehova.—Sal. 19:14.
