“Amen” nispanchikqa Diostam kusichinchik
DIOSNINCHIKQA qawamuwachkanchikmi, hinaspapas yachanmi yupaychananchikpaq tukuy ima ruwasqanchikta (Mal. 3:16). “Amen” nisqanchiktapas uyarinmi. Achka kutitachá “amen” nirqanchik, ¿aw? Chayna nisqanchikta uyarispanmi Diosqa kusikun. ¿Imanasqataq kusikun? Chaymanta yachanapaqyá yachaykusun ima ninantaq “amen” nisqanchikqa hinaspa imanasqa “amen” nispa bibliapi qillqasqankumanta.
‘LLAPA RUNAKUNAÑATAQMI NINQAKU: ¡AMEN! NISPANKU’
Castellanopi amen ninanqa “chaynayá kachun”, ninanmi. Hebreo rimaypim “amen” nispa puntata rimarqaku, chay rimaypiqa amen ninanqa “mana iskayrayanapaq” ninanmi. Ñawpaqpiqa imatapas ruwanankupaq rimanakuspankum “amen” ninakuqku. Chaynata ninakuspankuqa rimasqankuman hinam nisqankuta ruwarqaku (Num. 5:22). Imatapas ruwanankupaq runakunapa qayllanpi “amen” nispankuqa rimasqankutam imaña kaptinpas ruwananku karqa (Neh. 5:13).
Deuteronomio qillqapa 27 capitulonmi willawanchik Israel runakuna “amen” nisqankumanta. Prometesqa allpaman chayaruspankum huñunakurqaku Ebal hinaspa Gerizim sutiyuq urqukunapa chawpinpi, chaypim Diospa kamachikuyninkunamanta leemusqankuta uyarirqaku, mana kasuptinku ñakarinankumanta nimuptinkupas kallpawanmi “amen” nirqaku, huk rimaypiqa “chaynayá kachun” nichkarqakum (Deut. 27:15-26). ¡Mayna karukamachá uyarikurqa Waranqantin runakunapa “amen” nisqankuqa! (Jos. 8:30-35). Manachá haykapipas qunqarqakuchu “Diostam kasukusaqku” nisqankutaqa. ¿Nisqankuman hinachu ruwarqaku? Bibliam nin: ‘Josueypa kawsanankamaqa chaynataq wiñaymasin ancianonkunapas kawsanankamaqa, Israelpa mirayninkunam tayta Diosta servirqaku, chay ancianokunaqa rikurqakum Israelpa mirayninkunapaq tayta Diospa tukuy ima ruwasqanta’, nispa (Jos. 24:31).
Jesuspas rimayta qallarinanpaqmi “amen” utaq “chiqaptapunim nikichik” nirqa. Chaynataqa nirqa manam hukpa nisqanwan acuerdopi kasqanta qawachinanpaqchu, aswanmi imapas nisqan chiqap kasqanmanta mana iskayrayanankupaq (Mat. 5:18). Chaynata niptinmi uyariqninkunaqa nisqanmantaqa manaña iskayrayarqakuchu. Diospa tukuy nisqankuna ruwakunanpaq yanapakuq kasqanraykum, Jesusqa imam kaqta imamantapas willakuq (2 Cor. 1:20; Apo. 3:14).
‘¡AMEN! NISPANKUM TAYTA DIOSTA YUPAYCHARQAKU’
Diosta yupaychaspankupas hinaspa mañakuspankupas Israel runakunaqa “amen” niqkum (Neh. 8:6; Sal. 41:13). Pipas Diosta mañakuyta tukuruptin “amen” nispankum, mañakusqanman hina ruwakunanta nichkarqaku. Mañakuspanku “amen” niptinkum Diosta yupaychanankupaq huñunakusqankupas aswan sumaqraq karqa. Chaynam karqa Jehova Diospa carpanta David Jerusalenman apaptin. Aparuspanmi Davidqa tukuy sunqumanta Diosta mañakurqa, chay mañakusqanmi Cronicas qillqapi kachkan, chaytam Diospaq takirqaku (1 Cron. 16:8-36). Davidpa mañakusqanqa suma-sumaqmi karqa, chaymi ‘llapa runakunapas ¡amen! nispanku tayta Diosta yupaycharqaku’. “Amen” nisqankuwanqa anchataraqchá kusikurqaku.
Jesuspa tiemponpi iñiqkunapas Diosta yupaychaspankum “amen” niqku. Bibliata qillqaspankupas wakinkuqa “amen” niqkum (Rom. 1:25; 16:27; 1 Ped. 4:11). Apocalipsis qillqapa nisqanman hinapas, hanaq pachamantam uyarikurqa kayna niq: “¡Amen! ¡Jah sutiyuqtayá yupaychaychik!”, nispa (Apo. 19:1, 4). Jesuspa tiemponpi iñiqkunaqa huñunakusqankupi Diosta mañakuspankum “amen” nispanku tukuqku (1 Cor. 14:16). Ichaqa manam yanqapas-yanqachu “amen” niqku.
¿IMANASQATAQ “AMEN” NINANCHIK?
Yachamusqanchikman hinam pipas mañakuyta tukuruptin “amen” niyqa ancha allin. Diosta sapallanchik mañakuspanchik “amen” nispaqa qawachinchikmi sunqumanta mañakusqanchikta. Pipas llapallanchikpaq mañakuptin, kallpawan utaq sunqullanchikpi “amen” nispanchikñataqmi mañakusqanman hina ruwakunanta nichkanchik. Ichaqa, ¿imanasqaraqtaq “amen” ninanchik?
Munasqanman hina Diosta yupaychasqanchiktam qawachinchik. Diostaqa yupaychanchik manam huñunakuypi mañakuyta tukuruptin “amen” nispallachu, aswanqa mañakusqankuta allinta uyarispam. Sunqumanta “amen” niyta munaspaqa sumaqtam rantinchikpi mañakusqankuta uyarinanchik.
Qawachinchiktaqmi iñiqmasinchikkunawan huk sunqulla kasqanchikta. Huñunakuykunapi mañakusqankutaqa llapallanchikmi huk sunqulla uyarinchik (Hech. 1:14; 12:5). Huñunakuypi hukllata llapallanchik “amen” nispanchikqa huk sunqulla kasqanchiktam qawachinchik. Kallpawan utaq sunqullanchikpi amen niptinchikqa taytanchik Diosqa astawanchá llapanchikpa mañakusqanchiktaqa uyariwasun.
“Amen” nispaqa Diostam hatunchanchik.
“Amen” nispaqa Diostam hatunchanchik. Diosninchikqa yachanmi payta hatunchananchikpaq tukuy imata ruwasqanchikta (Luc. 21:2, 3). Yachanmi imayna sunquyuq kasqanchiktapas, chaymi telefonontakama huñunakuyta uyarispa “amen” nisqanchiktapas uyariwanchik. “Amen” nispanchikqa iñiqmasinchikkunawan kuskam Diosta hatunchachkanchik.
Yachamusqanchikman hinam “amen” niyqa ancha allin. Perspicacia qillqapa nisqanman hinapas, rantinchikpi mañakuyta tukuruptinku “amen” nispaqa, qawachichkanchikmi mañakusqanman hina ruwakunanmanta mana iskayrayasqanchikta hinaspa mañakusqanqa allin kasqanta. Chaynaqa, “amen” nispanchikqa Jehova Diosninchiktam kusichisun (Sal. 19:14).
