Quichua shimipi ‘shina cachun’ nishpaca ‘amén’ ningapami munan. Bibliata escribij punllacunapica chai shimitaca juiciocunapimi utilizan carca. Punda tiempopi israelitacunaca na llullajushcata, paipa nishcacuna ciertopacha cashcata ricuchingapami “shina cachun” nin carca (Núm. 5:22). Shuj juramentota nijushca jipa “shina cachun” nishpaca juramentota pactachinapacha cashcatami ricuchijurca (Neh. 5:13).

Deuteronomio libropi capítulo 27​pica, israelitacuna “shina cachun” shimicunata imashina utilizan cashcata ricupashunchi. Jehová carashca alpacunaman israelitacuna yaicushca jipaca Ebal, Guerizim urcucunapi Diospa Leycunata uyangapami paicunaca tandanajurca. Shinallata israelitacunaca chai Leycunata cazushunbacha ningapajpashmi chaipi tandanajurca. Paicunaca chai Leycunata na cazushpa ima llaquicunata chari ushashcata uyashca jipami “shina cachun” nishpa caparirca (Deut. 27:15-26). Chaipica ashtaca ashtaca huahuacuna, huarmicuna, jaricunapashmi tandanajushca carca. Paicunaca shujllashna “shina cachun” nishpa shinllita caparishcamandami caru caruta uyarishcanga (Jos. 8:30-35). Israelitacuna chai Leycunata cazushunbacha nishcataca na cungashcangachu. Bibliapica ninmi: “Israelcunaca, Josué causajui tucui huatacunapica, Mandaj Diostalla servishpami causanajurca. Shinallata Josué huañushca jipapi, mandaj rucucuna causanajushca punllacunapipashmi, Diosta servishpa causanajurca. Chai runacunami, israelcunaman Mandaj Dios tucui imatalla rurashcataca ricushca carca” nishpa. Imashinami ricupanchi israelitacunaca paicunapa nishcataca pactachircami (Jos. 24:31).

Jesuspashmi “shina cachun” shimitaca utilizarca. Jesusca paipa nishca shimicuna cierto cashcata ricuchingapami “shina cachun” nin carca. Paillami chai shimitaca shina utilizarca. Chai tiempopi gentecunaca pipash imagutapash nishca jipami “shina cachun” nin carca. shinapash Jesusca nara imagutapash  nishpallatami “shina cachun” nishpa parlai callarin carca. Paica ciertota nijushcata ricuchingapami shina ruran carca. Shinapash cai viajeca “shina cachun” shimitaca “na llullashpa” nishpami traducishca. Huaquimbica Jesusca “amén, amén” o “napacha llullashpami” nin carca (Mat. 5:18; Juan 1:51). Jesús shina nishpaca paipa nishcacuna ciertopacha cashcatami ricuchijurca. Jesusca Jehová Dios imata carasha nishcata paimanda pactarina cashcata yachaimandami Jesusca “napacha llullashpami” cashna nini nin carca (2 Cor. 1:20; Apoc. 3:14).

Israelitacunaca Jehovata mañashca jipa, paita alicachingapaj candashca jipami “shina cachun” nin carca (Neh. 8:6; Sal. 41:13). Jehovata mañashca jipa “shina cachun” nishpaca israelitacunaca chai mañashca paicunapash alipacha cashcatami ricuchinajurca. Israelitacuna shina rurashpami Jehová Diosta ali sirvinajushcata ricuchin carca. Rey Davidpa punllacunapi Jehová Diospa arcata Jerusalén llactaman apashpami Jehová Diosta ali sirvinajushcata ricuchirca. Jehová Diospa arcata Jerusalenman apashcamandami, Rey Davidca candashpami Jehová Diosta alicachishpa mañarca (1 Crón. 16:8-36). Rey Davidpa nishca shimicuna juyaillagupacha uyarishcamandami: “tucui gentecuna: “Shina cachun” nishpa, Mandaj Diosta alicachinajurca”. Tucuicunallata Jehová Diosta shina alicachinajushcamandaca ninandami cushijushcanga.

Apostolcunapa punllacunapipashmi Jesusta catijcunaca Jehovata alicachishpa candashca jipaca “shina cachun” nin carca. Bibliapa cartacunata huaquin escribijcunapashmi “shina cachun” shimita escribishpa saquirca (Rom. 1:25; 16:27; 1 Ped. 4:11). Apocalipsis libropica, jahua cielopi shuj angelcuna Jehovata alicachishpa “¡Shina cachun! ¡Mandaj Diosta alicachinguichi!” nishcatami ricuchin (Apoc. 19:1, 4). Punda Jesusta catijcunaca tandanajuicunapi Jehovata mañashca jipami “shina cachun” nin carca (1 Cor. 14:16). Shinapash “shina cachun” nina cashcamandallaca na ninllu carca.

Imashinami ricupashcanchi pipash Jehovata mañashca jipaca “shina cachun” ninaca minishtirishcapachami can. Ñucanchicuna Jehovata mañashca jipa  “shina cachun” nishpaca tucui shunguhuan mañajushcatami ricuchinchi. Shinallata pipash Jehovata mañashca jipa, ñucanchipash shimi ucupilla o shinllillaguta “shina cachun” nishpaca chai mañashcacuna pactarichun munajushcatami ricuchinchi. Cunanga “shina cachun” nina imamanda minishtirishca cashcata ashtahuan ricupashunchi.

“Shina cachun” nishpaca Jehovata sirvijushcatami ricuchinchi. Mañashca jipa yangamanda “shina cachun” nishpaca Jehovata tucui shunguhuan sirvijushcataca na ricuchinchimanllu. Shinaca tucui shunguhuan “shina cachun” ningapaca pipash Jehovata mañajujpica ali alimi uyana capanchi.

“Shina cachun” ninaca huauquipanicunahuan shujllashna cachunmi ayudan. Huauquicuna Jehovata mañanajujpica ali alimi uyana capanchi (Hech. 1:14; 12:5). Mañashca jipa tucuicunallata “shina cachun” ninaca huauquipanicunahuan shujllashna cachunmi ayudan. Shinaca shimi ucupilla o shinllillaguta “shina cachun” nijpica Jehová Diosca chai mañashcata pactachingapami munanga.

“Shina cachun” nishpaca Jehovatami jatunyachinajunchi. Jehová Diosca paita sirvingapaj ñucanchicuna imacunatalla rurashcataca ninandami alicachin (Luc. 21:2, 3). Jehová Diosca ñucanchi munaicunata, ñucanchi shungu ucupi imata charishcataca ali alimi yachan. Telefonopi tandanajuicunata uyajujpipash, mañashca jipa “shina cachun” nijpica Jehová Diosca alimi uyajun. Shinaca huauquipanicunahuan mañashca jipa “shina cachun” nishpaca Jehovatami jatunyachinajunchi.

Imashinami ricupashcanchi, mañashca jipa “shina cachun” ninaca minishtirishcapachami can. Perspicacia libropica ninmi: “Shina cachun” nishpaca “confianzata charishcata, ninanda alicachishcata, tucui shunguhuan pactarinata crinami” ningapaj munan. Shinaca mañashca jipa “shina cachun” nishpaca Jehovatami agradicinajunchi (Sal. 19:14).