Ο λάφι «αμήν» μανγκέλα τι βακερέλ «αντικάς τι αβέλ-πες» ή «σίγουρα». Αβέλα εκχέ λαφίσταρ κατά εβραϊκή τσσιπ σο μανγκέλα τι βακερέλ «ισινόμ πιστός», «μπεσαλής». Μπάζιμα χρησιμοποιήντιβελας σε νομικές συμφωνίες. Κάνα εκ τζενό χάλας σοβέλ, βακερέλας «αμήν» για τι σικαβέλ ότι οντουλά σο βακερέλας ισινέ μπαγιά ντα ότι κα δεχτίνελας σο-ντα αποτελέσματα κα αβένας. (Αριθ. 5:​22) Κάνα βακερέλας «αμήν» ανγκλάλ κο τζενέ, τθερέλας ατζέκ εκ λόγος τι ατσσικιαρέλ πο λάφι.​—Νεεμ. 5:13.

Εκ μπουτ σουκάρ παράδειγμας ισί κο Δευτερονόμιο κεφάλαιος 27. Αφού ο Ισραηλίτες τσσουντέ-πες κο Υποσχεμέ Τθεμ, έπρεπε τι γκιντίντιβεν οτθέ σο ισινέ ο βες Εβάλ ντα ο βες Γαριζίν, ντα τι μπεσέν κο μασκάρ για τι ασουνέν ο Νόμος σο διαβάντιβελας. Έπρεπε, όχι σάντε τι ασουνέν ο Νόμος, αλλά τι βακερέν ότι δεχτιντέας-λες ντα. Κερντέ-λες ανταβά κάνα βακερένας «Αμήν!», καζόμ διαβάντιβενας ο μπέτι αποτελέσματα σο κα τθερένας άμα να κα ντένας καν. (Δευτ. 27:​15-26) Ανέν τουμαρέ γκοντιάτε ι χιλιάδες μουρσέν, τζουβλίν ντα τσσαβέν σο απαντίνενας ζουρανές! (Ιησ. Ναυή 8:​30-35) Σίγουρα ποτές να μπισταρντέ ο λάφια σο βακερντέ οντουβά ντιβές. Οντουλά Ισραηλίτες ατσσικιαρντέ πουμαρό λάφι, σόσκε η Γραφή βακερέλα: «Ο Ισραηλίτες να τσσιναντέ τι υπηρετίνεν ι Ιεχωβάς σαρέ ο ντιβεσά ι Ιησούσκε ντα σαρέ ο ντιβεσά ι πρεσβυτερόνγκε σο συνεχιντέ τι τζουβντιόν σοράν κατά μεριπέ ι Ιησούσκο ντα τζανένας σαρέ ο πράγματα σο κερντάς ο Ιεχωβά ι Ισραηλιτένγκε».​—Ιησ. Ναυή 24:31.

Ο Ιησούς-ντα βακερέλας «αμήν» για τι σικαβέλ ότι λέσκε λάφια ισινέ μπαγιά, αλλά κερέλας-λες ανταβά με εκ ξεχωριστός τρόπος. Αντίς τι χρησιμοποιήνελ ο «αμήν» (σο μεταφρασάλο «μπαγιά») για τι απαντίνελ κο τζενέ,  χρησιμοποιήνελας-λες πριν τι βακερέλ εκ αλήθεια. Ισινέ φαρ σο βακερέλας «αμήν αμήν». (Ματθ. 5:​18· Ιωάν. 1:​51) Αντικάς σικαντάς κο τζενέ ότι λέσκε λάφια ισινέ ντιπ μπαγιά. Ο Ιησούς μπορίνελας τι κερέλ λάφι με αζόμ σιγουριά σόσκε βοβ κα κερέλας τι νικιόν μπαγιά ο υποσχέσεις ι Ντεβλέσκε.​—2 Κορ. 1:​20· Αποκ. 3:14.

Ο Ισραηλίτες βακερένας «αμήν» αζομάν-ντα σο δοξάνενας ι Ιεχωβάς ντα προσευχίντιβενας λέστε. (Νεεμ. 8:6· Ψαλμ. 41:​13) Κάνα οντουλά σο ασουνένας ι προσευχή βακερένας κο τέλος ανταβά λάφι, σικαβένας ότι συμφωνίνενας οντουλέντζαρ σο ασουντέας. Αντικάς συμμετεχίνενας σαρέ ντα χαιρίνενας σο ντένας λατρεία ι Ιεχωβάς ανταλέ τροπόσαρ. Ανταβά αβιλό-πες κάνα ο βασιλιάς Δαβίδ αντάς ι Κιβωτός ι Ιεχωβάσκι κι Ιερουσαλήμ. Κι γιορτή σο αβιλί-πες πιο σοράν, γκιλιαντέ εκ προσευχή σο γραφιντάς ο Δαβίδ ντα αρακχάσα-λα κο εδάφια 1 Χρονικών 16:​8-36. Λέσκε λάφια ερεσλέ ντιπ αντρέ κι τζενένγκο γκι, οτθάρ «σαρό ο λαός βακερντάς: “Αμήν!” ντα ντινέ δόξα ι Ιεχωβάς». Βα, ισινέ χαρούμενοι σο ντένας λατρεία ι Ιεχωβάς σαρέ γιεκ.

Ο Χριστιανοί κο πρώτος αιώνας βακερένας βον-ντα «αμήν» κάνα ντένας δόξα ι Ιεχωβάς. Ο τζενέ σο γραφιντέ ι Γραφή τσσουβένας ανταβά λάφι μπουτ φαρ κο επιστολές. (Ρωμ. 1:​25· 16:​27· 1 Πέτρ. 4:​11) Κο βιβλίος Αποκάλυψη διαβάνασα ότι οντουλά σο δοξάνενας ι Ιεχωβάς κο ουρανός βακερένας: «Αμήν! Ντεν δόξα κο Γιαχ!» (Αποκ. 19:1, 4) Ο πρώτοι Χριστιανοί βακερένας «αμήν» κο τέλος κι προσευχιένγκο σο βακέρντιβενας κο συναθροίσεις. (1 Κορ. 14:​16) Αλλά ανταβά να ισινέ εκ λάφι σο βακερένας-λες χωρίς τι σκεφτίνεν.

Ακανά σο σικλιλάμ σαρ χρησιμοποιήνενας ο υπηρέτες ι Ιεχωβάσκε ο λάφι «αμήν», αγαβάσα σόσκε ισί σωστός τι βακεράς-λες κο τέλος εκχέ προσευχιάκο. Κάνα βακεράσα-λες κο τέλος αμαρέ προσευχιάκο, σικαβάσα ότι οντουλά σο βακερντάμ ισινέ μπαγιά αντράλ αμαρέ γκίσταρ. Κάνα βακεράσα-λες, ατζέ-ντα αντρ’ αμένταρ,  εκχέ προσευχιάτε σο κερέλα εκ γιαβέρ τζενό, σικαβάσα ότι συμφωνίνασα οντουλέντζαρ σο βακέρντιλε. Ντικχέν γιαβερά-ντα πράγματα σο σικαβένα ότι αμαρό «αμήν» ισί σημαντικός.

Ασουνάσα προσεκτικά ο προσευχές επειδή αντικάς ντάσα λατρεία ι Ιεχωβάς. Κάνα κεράσα προσευχή, ντάσα λατρεία ι Ιεχωβάς, όχι σάντε αμαρέ λαφίντζαρ, αλλά οντουλέντζαρ-ντα σο κεράσα. Μανγκάσα τι βακεράς «αμήν» αντράλ αμαρέ γκίσταρ, οτθάρ σικαβάσα σεβασμός ντα νανέ γιαβερτθέ αμαρί γκοντί κάνα βακέρντιβελα η προσευχή.

Ισινάμ ενωμέ σαρ πφραλά να πφενιά. Κάνα βακέρντιβελα εκ προσευχή, σαρέ ο πφραλά ντα ο πφενιά ασουνένα ο ίδια λάφια. (Πράξ. 1:​14· 12:5) Κάνα βακεράσα «αμήν» γιεκ αμαρέ πφραλέντζαρ ντα πφενίντζαρ, αβάσα πιο ενωμέ. Σαρ-ντα τι βακεράς-λες, ζουρανές ή αντρ’ αμένταρ, αμαρό «αμήν» ντέλα ι Ιεχωβάς ατζέκ εκ λόγος τι κερέλ οντουβά σο μανγκλάμ λέσταρ.

Ντάσα δόξα ι Ιεχωβάς. Ο Ιεχωβά ντικχέλα σο-ντα κεράσα για τι ντας-λες λατρεία. (Λουκ. 21:2, 3) Ντικχέλα σόσκε ντάσα-λες λατρεία ντα σο ισί αμαρέ γκίστε. Ατζέ-ντα κάνα πρέπει τι ασουνάς ι συνάθροιση κατά τηλέφωνος, μπορίνασα τι αβάς σίγουροι ότι αμαρό «αμήν» τθερέλα αξία ι Ιεχωβάσκε. Κάνα βακεράσα-λες, ντάσα δόξα ι Ιεχωβάς γιεκ ι γιαβερέντζαρ σο ισί κι κχανγκιρί.

Μπορεί τι ντικχίντιβελα ότι αμαρό «αμήν» τθερέλα χάνικ αξία αλλά σίγουρα ισί σημαντικός. «Ανταλέ εκχέ λαφίσαρ», βακερέλα εκ εγκυκλοπαίδεια ι Γραφιάκι, ο υπηρέτες ι Ντεβλέσκε μπορίνενα τι σικαβέν «αντράλ πουμαρέ γκίσταρ ότι ισί σίγουροι, συμφωνίνενα [ι λαφίντζαρ σο βακέρντιλε] ντα πακιάνα ότι κα αβέν-πες». Μανγκάσα ο κάθε «αμήν» σο βακεράσα τι κερέλ ι Ιεχωβάσκο γκι.​—Ψαλμ. 19:14.