Zritu dzra ku “amen” dzri tlhamuxela leswaku “a swi ve tanu,” kumbe “nakunene”. Dzri buya hi ka zritu dzra xiheberu ledzri tlhamuxelaka leswaku “ku dumbeka”. Minkama yin’wana a dzri tizrisiwa ka ku thetha timhaka. Loko mhunu a heta ku hlambanya, a a ku “amen” akuva a funga leswaku leswi a swi hlayiki a swi li ntiyiso nakone a a tiboha leswaku a lulamele ku zrwala wutiyanguleli hi mazritu yakwe. (Tin 5:22) Hi ku hlaya livaleni leswaku “amen”, mhunu a a tiboha leswaku a ta yentxa leswi a swi dumbisaka.​—Neh 5:13.

Xikombiso lexi bekaka livaleni matizrela ya “amen” xi tsraliwe ka Deuteronoma ndzrima 27. A ntsrhaku ka loko va-Israyele va nghene a Tikweni dzra Xidumbiso, va vitaniwe ku ya hlengeletana a makazri ka Nhava ya Ebali ni Nhava ya  Gerizimi akuva va ta yingela Nawu wu dondzriwa. Kambe ku yingiseta ntsena a swi nga dzringananga. A swi djula leswaku va tihlayela ha byavu leswaku va wu yamukela Nawu lowo. Va yentxe leswo hi ku yangula va ku “Amen!” loko va dondzreliwa leswaku va ta humeleliwa ha yini loko va nga yingiseti Nawu. (Dt 27:15-26) Yanakanya hi ku pfuma ka xitsrhungu lexi patsraka vavanuna, vavasati ni vatsrongwana loko va ku “Amen” hi zritu dzra le henhla! (Yš 8:30-35) Handle ka ku ganaganeka a va ha zanga va dzrivala mazritu lawa va ma hlayiki siku ledzro. Nakone va-Israyele va hlayise xidumbiso xavu, hikusa wudzrunguli byi li a va-Israyele va tizrele Yehovha ‘hi masiku ya Yehoxuwa hinkwawu, ni masiku hinkwawu ya vakulu, lava va saliki va hanya a ntsrhaku ka ku fa ka Yehoxuwa, lava faka va tive ntizro wa Yehovha hinkwawu, lowu a nga wu yentxela va-Israyele’.​—Yš 24:31.

Yesu na yene a tizrise zritu “amen” ku komba leswaku leswi a a swi hlaya a swi li ntiyiso. Kambe, a a dzri tizrisa hi ndlela leyi nga fanikiki ni ya vambeni. Loko a ku “amen”, a a nga hlamuli ntxhumu lowu hlayiwiki. A matsrhan’wini ya leswo, a tizrise zritu  ledzro (ledzri ndzruluteliwiki dzri ku “ndzri hlayela mfuzri” hi xizronga) ku sungula mazritu ya ntiyiso lawa a a ma hlaya. Minkama yin’wana, a phindhe zritu ledzri, a ku “amen, amen”. (Mt 5:18; Yh 1:51) Hi yentxela ledzro a tiyise vayingiseti vakwe leswaku mazritu yakwe a ma tiyile hi ku helela. Yesu a a khanela hi ku tiyiseka koloko hikusa a a li lweyi a nyikiwiki ntamu wa ku hetisisa swidumbiso hinkwaswu swa Xikwembu Nkulukumba.​—2Ko 1:20; Mpf 3:14.

Va-Israyele va tlhele va tizrisa zritu “amen” loko va dzrumisa Yehovha ni loko va hamba swikhongoto. (Neh 8:6; Ps 41:13) Hi ku hlaya leswaku “amen” a ntsrhaku ka xikhongoto, lava yingisetaka ntsena a va komba leswaku va pfumelelana ni mazritu ya xikhongoto lexo. Hi ndlela leyo, hinkwavu lava a va li kone va kote ku hlengela ka xikhongoto, leswi yentxiki leswaku va nyonxa hi ku gandzrela Yehovha. Hi swoleswo swi nga yentxeka loko Hosi Davhida a tise Areka dzra Yehovha a Yerusalema. Loko vhanu va ha da ni ku tlangela hi kola ka leswo, a hambe xikhongoto xa ntamu swinene, lexi kombisiwiki swanga lisimu ka 1 Makronika 16:8-36. Lava a va li kone va khumbeke swinene hi mazritu yakwe lakakuva ‘a tiko hinkwadzru dzri ku: Amen, dzri dzrumisa Yehovha’. Ina, hi ku yangula hi wumun’we va ku “amen” va kume ku nyonxa lokukulu hi siku ledzro.

Vakriste va dzana dzra ku sungula na vone a va tizrisa zritu dzra ku “amen” loko va dzrumisa Yehovha. Vatsrali va Bibele a va tekisa ku dzri patsra ka mapapela yavu. (Ro 1:25; 16:27; 1Pe 4:11) Buku dzra Apfuletelo dzri khanela hi swivumbiwa swa moya leswi nga tilweni na swi dzrumisa Yehovha, swi ku: “Amen! Halleluya!” (Mpf 19:1, 4) Vakriste va ku sungula a va hamba va ku “amen” loko ku gama xikhongoto a mintlhanganwini yavu. (1Ko 14:16) Nambitanu, a dzri nga li zritu dzra ku dzri phindha hi nhloko ntsena.

A ntsrhaku ka ku pfuxeta masungulu ni matimu ya zritu dzra ku “amen”, hi nga swi vona leswaku ha yini dzri li ndlela leyinene ya ku pfala xikhongoto. Loko hi dzri hlaya a wugan’wini bya xikhongoto xa ka kwezru, hi komba leswaku hi tiyisile ka leswi hi swi hlayaka. Nakone loko hi susumeteleka ku hlamula  hi ku “amen” ka xikhongoto lexi yentxeliwaka ntlawa, nambi ho hlaya hi zritu dzra le hansi, hi komba leswaku ha ma seketela mazritu lama hlayiwiki. Vona swivangelo swin’wana leswi ha swone a “amen” wezru a nga wa lisima.

Hi komba leswaku ha yingiseta nakone ha patsreka ku gandzreleni kwezru. Loko ku yentxiwa xikhongoto, hi gandzrela Yehovha ku nge ntsena hi leswi hi swi hlayaka, kambe ni hi leswi hi swi yentxaka. Loko hi swi xuva hi mbilu ku hlaya “amen” wa ku phela, swoswo swi nga hi pfuna ku kombisa xitxhavu ni ku yingiseta loko mumbeni a hamba xikhongoto.

Hi tlhanganisiwa swanga vagandzreli-kulozri. Ka xikhongoto lexi hambiwaka hi ntlawa hi yingela swo swa swin’we ni leswi yingeliwaka hi van’wana a bandleni. (Min 1:14; 12:5) Loko hi susumeteleka ku hlamula hi zritu dzrin’we ni vamakwezru, hi kumeka na hi li lava tlhanganisiwaka. Nambi hi hlamula hi zritu dzra le henhla kumbe hi hlamulela a mbilwini, “amen” wezru a nyika Yehovha xivangelo lexi yengetelekiki xa ku yamukela xikombelo xezru swanga ntlawa.

Hi dzrumisa Yehovha. Yehovha awa swi vona swiyentxo swezru swa wugandzreli leswi nga gamikiki mbangu. (Lk 21:2, 3) Awa swi vona a timbilwini tezru leswaku ha yini hi yentxa xantxhumu. Nambi loko swi sindzrisa kuva hi yingiseta ntlhanganu hi fone, hi nga tiyiseka leswaku Yehovha awa swi twa loko hi ku “amen” hi ku titsrongahata. Hi kumeka na hi hlengela xikan’we a ku mu dzrumiseni.

A “amen” wezru a nga ha voneka ingiki a nga nyawuli, kambe a ni lisima dzrikulu. Buku dzrin’wana dzra ku tlhamuxela Bibele dzri li: “Hi ku tizrisa zritu ledzri dzra dzrin’we”, malandzra ya Xikwembu Nkulukumba ma nga swi kota ku kombisa “ku dumba, ku pfumelelana hi mbilu hinkwayu ni ku lavisela loku nga timbilwini tavu.” Ingiki Yehovha a nga nyonxa hi ku hi twa loko hi ku “amen”!​—Ps 19:14.