A wortu „amen” wani taki „na so a de” noso „fu tru”. A wortu dati komoto fu wan Hebrew wortu di wani taki „de fu frutrow”. Sma ben e gebroiki a wortu disi furu na ini krutu-afersi. Baka te wan sma ben meki wan sweri, dan a ben e taki „amen” fu sori taki san a taki tru èn taki a ben de klariklari fu tyari den bakapisi efu den sani di a taki no ben tru (Num. 5:22). Efu wan sma ben pramisi wan sani èn a ben taki „amen” na fesi tra sma, dan a ben o du moro muiti fu du san a pramisi.​—Neh. 5:13.

Na Deuteronomium kapitel 27 wi kan leisi fu wan moi okasi pe sma gebroiki a wortu „amen”. Baka di den Israelsma go na ini a Pramisi Kondre, den kon makandra na mindri Ebal-bergi nanga Gerisim-bergi fu arki san ben skrifi na ini a Wet. Den no ben musu arki nomo, ma den ben musu sori tu taki den ben e agri nanga a Wet. Fa den ben du dati? Baka di sma leisi sortu fluku ben o miti den te den ben o trangayesi Gado den ben taki „amen!” (Deut. 27:15-26) Prakseri fa a ben de di dusundusun man, uma nanga pikin ben piki „amen!” nanga wan tranga sten (Yos. 8:30-35). Noiti den frigiti den sani di taki a dei dati. Den Israelsma dati du san den ben pramisi, fu di Bijbel e taki: „A heri pisi ten di Yosua ben de na libi, den Israelsma tan dini Yehovah. Den tan dini En sosrefi na ini a pisi ten fu den owru man di ben de na libi ete, baka di Yosua dede. Den owru man disi ben sabi ala den sani di Yehovah ben du gi Israel.”​—Yos. 24:31.

Yesus ben taki „amen” tu fu sori taki den sani di a taki tru, ma a ben e du en na wan tra fasi. Yesus no ben e piki „amen” (na ini  Sranantongo a vertaal nanga „fu tru”) baka te a ben taki wan sani, ma a ben taki „amen” fosi a ben o taki wan prenspari sani. Son leisi a ben taki a wortu tu tron baka makandra (Mat. 5:18; Yoh. 1:51). Na so a ben sori den arkiman taki den ben kan bribi san a ben e taki. Yesus ben kan taki so fu di en ben de a sma di kisi a frantwortu fu meki ala den pramisi fu Gado kon tru.​—2 Kor. 1:20; Openb. 3:14.

Den Israelsma ben e taki „amen” te den ben e prèise Yehovah èn te den ben e begi (Neh. 8:6; Ps. 41:13). Te den ben e taki a wortu disi na a kaba fu wan begi, dan den ben sori taki den ben e agri nanga a begi. Na a fasi disi den ben e anbegi Yehovah makandra èn den ben prisiri fu du dati. Na dati ben pasa di Kownu David ben tyari na Ark fu Yehovah go na Yerusalem. Na a fesa di den ben hori baka dati, David skrifi wan begi èn a meki sma singi en, soleki fa wi kan leisi na 1 Kroniki 16:8-36. A begi disi naki na ati fu den sma di ben de drape so te, taki „ala den sma taki: ’Amen!’ Dan den prèise Yehovah.” Iya, den ben breiti fu anbegi Yehovah makandra.

Den Kresten na ini a ten fu den apostel ben e taki „amen” tu te den ben e prèise Yehovah. Bijbel skrifiman gebroiki a wortu disi tu na ini den brifi fu den (Rom. 1:25; 16:27; 1 Petr. 4:11). A buku Openbaring e taki srefi fu engel na hemel di e prèise Yehovah nanga den wortu disi: „Amen! Un prèise Yah!” (Openb. 19:1, 4) Te den brada ben e begi na ini a Kresten gemeente, dan den sma ben e taki „amen” na a kaba fu den begi (1 Kor. 14:16). Ma den no ben taki a wortu disi sondro fu denki.

Now di wi luku fu san ede den futuboi fu Yehovah ben e taki „amen”, dan wi e frustan  fu san ede a prenspari fu taki „amen” tu na a kaba fu wan begi. Te wi e taki a wortu disi na a kaba fu wi eigi begi, dan wi e sori taki den sani di wi taki komoto fu wi ati. Èn te wi e taki „amen”, awinsi na ini wi ati, baka te wan tra sma begi, dan wi e sori taki wi e agri nanga san a sma taki. Meki wi luku sortu tra reide de fu san ede wi musu taki „amen”.

Wi e arki bun te wan sma e begi fu di a de wan pisi fu wi anbegi. Te wan sma e begi, dan wi no musu sori nomo taki wi e agri nanga san a taki, ma wi musu luku tu fa wi e tyari wisrefi. Fu di wi wani taki „amen” nanga wan krin ati, meki wi musu tyari wisrefi na wan lespeki fasi èn wi musu arki bun san a sma e taki na ini a begi.

Wi e sori taki wi de wán. Te wan sma e begi na ini a gemeente, dan ala sma drape de na ini wánfasi fu di den e yere a srefi begi (Tori 1:14; 12:5). Te wi e piki „amen” makandra nanga wi brada nanga sisa, dan a wánfasi e kon moro tranga. Te wi e taki „amen” nanga wan tranga sten noso na ini wi ati, dan dati kan meki Yehovah du san wi aksi en.

Wi e prèise Yehovah. Yehovah e si ala pikin sani di wi e du na ini na anbegi (Luk. 21:2, 3). A e si fu san ede wi e du sani èn san de na ini wi ati. Awinsi wi musu arki wan konmakandra nanga yepi fu telefon, wi kan de seiker taki Yehovah e yere te wi e taki „amen”. Te wi e taki „amen”, dan wi e prèise Yehovah makandra nanga den sma di de na a konmakandra.

Te wi e taki „amen”, dan kande wi e si en leki wan pikin sani di wi e du. Ma dati no de so. Wan buku di e fruklari Bijbel e taki dati te futuboi fu Gado e taki a wortu disi, dan den e sori san de na ini den ati. Den e sori taki den e agri nanga a begi èn taki den e bribi taki Yehovah e arki a begi. Meki wi prèise Yehovah ibri leisi te wi e taki „amen”.​—Ps. 19:14.