Lentsoe la Senyesemane e leng, “amen” le bolela “ha ho be joalo,” kapa “kannete.” Le tsoa lentsoeng la Seheberu le bolelang “botšepehi.” Ka linako tse ling, le ne le sebelisoa ka makhotleng. Ka mor’a hore motho a hlapanye o ne a re “amen,” e le ho tiisa hore ntho eo a e buileng ke ’nete le hore o tla phelela mantsoe a hae. (Num. 5:​22) Ka mor’a hore a hlapanye, o ne a tlangoa ke molao hore a bue ’nete.​—Neh. 5:13.

Mohlala o motle oa moo lentsoe “amen” le sebelisitsoeng ka Bibeleng ke ho Deuteronoma khaolo ea 27. Ka mor’a hore Baiseraele ba kene Naheng e Tšepisitsoeng, ba ile ba ema pakeng tsa Thaba ea Ebale le Thaba ea Gerizime eaba ba balloa Molao. Ba ne ba lokela ho o mamela le ho lumela hore ba utloile Molao oo. Ba ile ba bontša hore ba utloile ka hore ba re “Amen!” ha ho qetoa ho baloa liphello tsa ho se mamele. (Deut. 27:​15-26) E tlameha ebe e ile ea e-ba mohoo o moholo ha bohle, banna, basali le bana ba cho joalo hong! (Josh. 8:​30-35) Ha ho potang hore ha baa ka ba hlola ba lebala mantsoe ao ba ileng ba a bua letsatsing leo. Baiseraele bao ba ile ba fela ba phelela mantsoe a bona, kaha Bibele e re: “Ba tsoela pele ho sebeletsa Jehova ka matsatsi ’ohle a Joshua le ka matsatsi ’ohle a banna ba baholo ba ileng ba atisa matsatsi a bona ka mor’a Joshua le ba neng ba tsebile mosebetsi oohle oa Jehova oo a ileng a o etsetsa Baiseraele.”​—Josh. 24:31.

Jesu le eena o ile a sebelisa lentsoe “amen” e le ho netefatsa taba eo a e buileng empa eena o ne a sebelisa lentsoe lena ka tsela e fapaneng. Ho e-na le hore a sebelise  lentsoe “amen” (e fetoletsoeng e le “kannete” ka Sesotho) ka mor’a taba e builoeng, Jesu o ne a sebelisa “amen” pele a bua e le ho bontša hore taba eo a tl’o e bua ke ’nete. Ka linako tse ling, o ne a pheta lentsoe leo ka makhetlo a mabeli. (Mat. 5:​18; Joh. 1:​51) Ka ho etsa joalo, o ne a netefaletsa bamameli ba hae hore taba eo a ba bolellang eona e fela e le ’nete. Jesu o ne a kholisehile kaha ke eena ea fuoeng tokelo ea ho phethahatsa litšepiso tsa Molimo.​—2 Bakor. 1:​20; Tšen. 3:14.

Baiseraele le bona ba ne ba sebelisa lentsoe “amen” ha ba rapela le ha ba binela Jehova. (Neh. 8:6; Pes. 41:​13) Ha batho ba ne ba re “amen” ba ne ba bontša hore ba lumellana le se builoeng thapelong. ’Me kaofela ba ne ba thabela ho rorisa Jehova. Ho ile ha etsahala ntho e tšoanang ha Morena Davida a ne a isitse Areka ea Jehova Jerusalema. Moketeng o ileng oa etsoa, Davida o ile a etsa thapelo e tsoang botebong ba pelo ka mokhoa oa ho e bina ’me mantsoe a eona a tlalehiloe ho 1 Likronike 16:​8-36. Bohle ba neng ba le teng ba ile ba angoa maikutlo ke thapelo ea hae, kahoo “batho bohle ba re, ‘Amen!’ ’me ba rorisa Jehova.” Kannete ba ile ba thabela ho rorisa Jehova hammoho.

Bakreste ba mehleng ea boholo-holo ba ne ba sebelisa lentsoe “amen” ha ba rorisa Jehova. Bangoli ba Bibele le bona ba ne ba sebelisa lentsoe lena hangata mangolong a bona. (Bar. 1:​25; 16:​27; 1 Pet. 4:​11) Lengolong la Tšenolo ho tlalehoa hore Mangeloi le ’ona a sebelisa lentsoe lena ha a rorisa Jehova ka hore: “Amen! Rorisang Jah!” (Tšen. 19:​1, 4) Ha ba le libokeng, Bakreste ba pele le bona ba ne ba re “amen” ka mor’a thapelo. (1 Bakor. 14:​16) Leha ho le joalo, ba ne ba sa re “amen” ho phetha molao feela.

Ka mor’a ho hlahloba hore na lentsoe lena le tsoa hokae, re bona bohlokoa ba ho re “amen” ka mor’a thapelo. Ha re re “amen” ka  mor’a ho iketsetsa thapelo, re bontša hore re lumellana le mantsoe ao re a buileng. Ha re susumelletseha hore re re “amen” ka pelong ha motho e mong a etsa thapelo, re bontša hore re lumellana le seo a se buileng. A re hlahlobeng mabaka a mang ao ka ’ona ho re “amen” ho leng bohlokoa.

Re mamela ka hloko ha motho e mong a rapela. Lintho tseo re li buang le tsela eo re itšoarang ka eona ke karolo ea borapeli ba rona ho Jehova. Re mamela ka hloko ha motho e mong a rapela kaha re batla hore ha re re “amen” re be re utloile hantle hore na o itse’ng.

Re bontša hore re ntsoe-leng. Ha re rapella phutheho re ameha haholo ka lintho tseo bohle ba tšoenyehileng ka tsona. (Lik. 1:​14; 12:5) Ho re “amen” qetellong ho bontša hore kaofela rea lumellana. Ebang re re “amen” ka lentsoe le phahameng kapa re buela ka pelong, ho cho joalo ho ka ’na ha susumetsa Jehova hore a phethahatse likopo tsa rona.

Re rorisa Jehova. Jehova o ela hloko ntho e ’ngoe le e ’ngoe eo re e etsang ha re mo rapela. (Luka 21:​2, 3) O bona sepheo sa rona le se ka lipelong tsa rona. Esita le haeba re mamela liboka ka thelefono, re ka kholiseha hore ha re re “amen” Jehova oa re utloa. Ha re cho joalo, re ba karolo ea ba libokeng ba ntseng ba rorisa Jehova.

Ho re “amen” ho ka ’na ha bonahala e le ntho e sa reng letho, empa ke habohlokoa haholo. Buka e ’ngoe e hlalosang mantsoe a Bibele e re: “Ha bahlanka ba Molimo ba sebelisa lentsoe lena ba bontša hore baa mo tšepa ba bile ba kholisehile hore o tla ba thusa.” E se eka kamehla ha re re “amen” e ka ba e thabisang Jehova.​—Pes. 19:14.