Bawera ”amin” mangal᷊ene ”kariadiko kerene”, arau ”pasti”. Ene bọu bawera dasar Ibrani kụ mangal᷊ene ”kariadịe satia” arau ”kariadịe kapěngimangeng”. Pẹ̌sěnsul᷊ẹ, bawera ene nipakẹ su bidang hukum. Su apang sěngkatau nẹ̌salu, i sie nẹ̌bera ”amin” gunang mapakal᷊ahẹ apa niwerane ene kahěngang kụ i sie sadia měnarimạ tětalu bawerane. (Bil. 5:22) Ual᷊ingu i sie seng naul᷊ị ”amin” su těngong taumata lawọ, i sie limembong mapulu měkoạ diandine.​—Neh. 5:13.

Contoh sěbạe mapaelẹ̌ soal u měpakẹ bawera ”amin” niwohẹ su Ulangan pasalẹ̌ 27. Su apang tau Israel simuẹ̌ su Ěntanang Pẹ̌dariandi, i sire harusẹ̌ mẹ̌komol᷊ẹ̌ su lantehu Wul᷊udu Ebal dingangu Wul᷊udu Gerizim gunang dumaringihẹ̌ manga Hukungu Mawu niwasa. Katewe, bal᷊inẹ kětạeng dumaringihẹ̌ manga Hukung ene, i sire lai harusẹ̌ maul᷊ị i sire mapulu tumuhụ ene. I sire harusẹ̌ maul᷊ị ”Amin!” su tempong makaringihẹ̌ tětal᷊e mạeng i sire tawe tumuhụ. (Ul. 27:15-26) Pẹ̌tiněna kerea tingihu jutane esẹ, wawine, dingangu manga rariọ su tempong simimbahẹ̌ dingangu masěmangatẹ̌! (Yos. 8:30-35) I sire tantu tawe miwul᷊e apa seng niwerang i sire su ěllo ene. Bangsa ene apidu někoạ dianding i sire. Alkitapẹ̌ nẹ̌bera i sire ”turusẹ̌ nẹ̌tahamawu si Yehuwa su kanandụu wiahi Yosua dingangu su kanandụu wiahu manga těmbonang apang bědang ene su tempong i Yosua seng nate dingangu apang masingkạ kěbị hal᷊ẹ̌ seng nikoạ i Yehuwa gunang Israel”.​—Yos. 24:31.

Yesus lai něpakẹ bawera ”amin” gunang měnodẹ apa niwerane ene nihino. Katewe, i sie něpakẹ bawera ene dingangu cara tawe wiasa. I sie tawe maul᷊ị bawera ene su tempong tau wal᷊inẹ bọu naul᷊ị sěmbaụ hal᷊ẹ̌. Yesus maul᷊ị ”amin”  těntal᷊ang i sie bědang tawe maul᷊ị sěmbaụ hal᷊ẹ̌ (su werang Sangihẹ̌ nitěrjemahkan nakoạ ”kahěngang-hěngang”). Pẹ̌sěnsul᷊ẹ, i sie maul᷊ị bawera ene duang sul᷊ẹ, ”amin amin”. (Mat. 5:18; Yoh. 1:51) Dingangu cara kerene, i sie makakoạ taumata mangimang apa niwerane ene kai katěngadẹ̌ tutune. Yesus botonge mẹ̌bisara dingangu cara kerene ual᷊ingu si sie piạ kawasa gunang mapakasěhụ kěbị dianding Mawu.​—2 Kor. 1:20; Why. 3:14.

Tau Israel lai maul᷊ị ”amin” su tempong nẹ̌dalo dingangu nẹ̌doa si Yehuwa. (Neh. 8:6; Mz. 41:13) Su apang i kitẹ mẹ̌bera ”amin” su pěngěnsuengu daroang taumata wal᷊inẹ, ene mangal᷊ene i kitẹ něngaku daroa ene kai daroang i kitẹ lai. Hakị u ene, kěbị apang diměnta makatol᷊e kěbị acara rohani ene. Ene nariadi su tempong Datu Daud nẹ̌bawa Tabut i Yehuwa sarang Yerusalem. Su perayaan ene, Daud nẹ̌kantarị sěmbaụ daroa dingangu kaguwạu naung, kụ ene niwohẹ su 1 Tawarikh 16:8-36. Kěbị apang diměnta nakanoạ naunge, bọu ene ”bangsa ene nẹ̌bera, ’Amin!’ kụ nẹ̌dal᷊o si Yehuwa”. Bawera ”amin” niul᷊ị i sire nakatambah karal᷊uasẹ̌ su ěllo ene.

Tau Sahani su abad humotong lai měpẹ̌pakẹ bawera ”amin” su tempong mẹ̌dalo si Yehuwa. Manga měmamohẹ Alkitapẹ̌ masau měpakẹ bawera ini su surati sire. (Rm. 1:25; 16:27; 1 Ptr. 4:11) Bukẹ̌ Wahyu nẹ̌běke soal u manga makhluk rohkẹ̌ su sorga apang měmẹ̌mantugẹ̌ si Yehuwa kụ měbẹ̌bera, ”Amin! Pẹ̌dalọe Yah!” (Why. 19:1, 4) Su acara pěngangibadang, tau Sahani su abad humotong biasane mẹ̌bera ”amin” su pěngěnsuengu daroa. (1 Kor. 14:16) Katewe, i sire bal᷊inẹ kětạeng asal᷊e mẹ̌bera ”amin”.

Su apang seng nakasingkạ kerea ělangu Mawu tempong tamai něpakẹ bawera ”amin”, i kitẹ nakaěna kawe nụe bawera ini sěbạe penting sěbạkeng su pěngěnsuengu daroa. Mạeng i kitẹ maul᷊ị ene su pěngěnsuengu daroang i kitẹ hala, ene něnodẹ daroang i kitẹ bọu dal᷊ungu naung.  Kụ mạeng i kitẹ maul᷊ị ”amin”, maning su ral᷊ungu naung su pěngěnsuengu daroang taumata wal᷊inẹ, ene něnodẹ i kitẹ setuju dingangu daroane. Pẹ̌tiněnạe alasang kawe nụe bawera ”amin” nisěbạu ene penting.

I kitẹ fokus su acara ibadang i kitẹ. I kitẹ něngibadah si Yehuwa bal᷊inẹ kětạeng setuju su lohong daroa, katewe lai bọu kakanoạ i kitẹ su tempong mẹ̌doa. Ual᷊ingu i kitẹ mapulu maul᷊ị ”amin” bọu dal᷊ungu naung, i kitẹ sarung dumaringihẹ̌ dingangu měndiagạ kakanoạ i kitẹ su tempong kạpědoane.

I kitẹ nasěmbaụ su pěngangibadang. Su tempong piạ u nẹ̌doa su pěngangibadang, kěbị anggota sidang nasěmbaụ ual᷊ingu dimaringihẹ̌ daroa mẹ̌sul᷊ung. (Kis. 1:14; 12:5) Mạeng i kitẹ mẹ̌bera ”amin” sěngkasio dingangu anạu sěmbaụ, i kitẹ sarung makoạ limembong masěmbaụ. Tawẹ soale i kitẹ maul᷊ị ”amin” dingangu tingihẹ̌ maihạ arau kětạeng su ral᷊ungu naung, bawera ”amin” niul᷊ị i kitẹ sěngkasio makakoạ si Yehuwa limembong mapulu dumaringihẹ̌ daroang i kitẹ.

I kitẹ mẹ̌dalo si Yehuwa. Yehuwa mětẹ̌tarukira kěbị bageang ibadang i kitẹ maning ene hal᷊ẹ̌ kadodọ. (Luk. 21:2, 3) I Sie makasilo alasang i kitẹ něngibadah dingangu apa su ral᷊ungu naung i kitẹ. Maning i kitẹ kětạeng nakatol᷊e pěngangibadang bọu telepon, i kitẹ mangimang bawera ”amin” niul᷊ị i kitẹ nikaringihang i Yehuwa. I kitẹ timol᷊e nẹ̌dalo si Yehuwa sěngkasio dingangu anạu sěmbaụ apang diměnta su pěngangibadang.

Bawera ”amin” niul᷊ị i kitẹ, aramanung nikaringihang tawẹ apa arěgane, katewe ene sěbạe penting. Ensiklopedia Pemahaman Alkitab naul᷊ị, ”Bọu sěmbaụ bawera ini,” ělangu Mawu botonge měnodẹ ”pangangimang, sěbạe setuju, dingangu pělaharapẹ̌ su ral᷊ungu naung i sire”. Karimạko bawera ”amin” niul᷊ị i kitẹ makal᷊uasẹ̌ si Yehuwa.​—Mz. 19:14.