Yehova Wawona Kuti Mazu Ngakuti “Ame” Ngakukhumbika
YEHOVA wawona kuti kusopa kwidu nkhwakuzirwa. Iyu “waŵikaku gutu ndi kuvwisiya” ateŵeti ŵaki kweniso wawona kuti chechosi cho tichita pa kumuthamika ntchakuzirwa chinanga chingaŵa chimana. (Mala. 3:16) Mwakuyeruzgiyapu, wonani mazu ngo tikamba kananandi waka. Mazu yanga ngakuti “ame.” Kumbi Yehova wawona kuti mazu ngenanga ngakukhumbika? Hinya! Kuti tiziŵi chifukwa chaki, tiyeni tiwoni vo mazu ngenanga ngang’anamuwa kweniso mo ngagwiriskikiya ntchitu mu Bayibolu.
“ŴANTHU WOSI AZAMUKAMBA KUTI, ‘AME!’”
Mazu ngachingelezi ngakuti “ame” ngang’anamuwa kuti “vije viyo” pamwenga kuti “hinya nadi.” Nyengu zinyaki mazu yanga angagwiriskiyanga ntchitu pa milandu. Asani munthu walapizga, wakambanga kuti “ame” kulongo kuti vo wakamba vauneneska kweniso kuti ngwakunozgeka kukumana ndi chechosi chifukwa cha vo walapizga. (Maŵe. 5:22) Asani wakamba kuti “ame” pa gulu la ŵanthu, walongonga kuti wakhumbisiska kusunga vo walapizga.—Nehe. 5:13.
Wonani mo mazu ngakuti “ame” ngakugwiriskikiya ntchitu pa Marangu chaputala 27. Ayisirayeli ŵati asere mu Charu cho Yehova wanguŵalayizga, anguwungana pakati pa phiri la Ebala ndi Gerizimu kuti avwisiyi Dangu ndi kulongo kuti akoliyana ndi vo vingulembeka mu Dangu. Yiwu anguchita venivi mwakukamba kuti “ame” pa nyengu yo aŵerenganga vo munthu wangakumana navu asani waleka kuvwiya. (Mara. 27:15-26) Ŵanaŵaniyani mo mazu nga ŵanthu masawuzandi nganandi nganguvwikiya achimuka mwakukweza kuti “ame!” (Yoswa 8:30-35) Ayisirayeli anguluwa cha vo angukamba pa zuŵa lenili. Yiwu angusunga mazu ngawu, chifukwa Bayibolu likamba kuti: “Ayisirayeli angulutirizga kuteŵete Yehova mu mazuŵa ngosi ngaku Yoswa, ndipuso mu mazuŵa ngosi nga ŵaraŵara wo angulutirizga kuja ndi umoyu Yoswa wati wafwa kweniso wo anguziŵa vosi vo Yehova wanguchita chifukwa cha Ayisirayeli.”—Yoswa 24:31.
Yesu wagwiriskiyanga ntchitu mazu ngakuti “ame” kuti wasimikiziyi kuti vo wakhumba kukamba vauneneska nadi. Kweni wachitanga venivi munthowa yapade ukongwa. Mumalu mwakukamba kuti “ame” asani wamaliza kulongoro, Yesu wakambanga mazu yanga (ngo mu Chingelezi akungafwatuliya kuti “mbuneneska”) wechendakambi fundu kuti walongo kuti vo wakhumba kukamba vauneneska nadi. Nyengu zinyaki, Yesu wakambanga mazu ngenanga mwakuwerezawereza kuti “ame ame.” (Mate. 5:18; Yoha. 1:51) Asani wakamba viyo, wasimikiziyanga ŵanthu wo amuvwisiyanga kuti vo wakamba vauneneska nadi. Yesu wakambanga mwakusimikiza viyo chifukwa iyu wenga ndi mazaza ngakufiskiya vosi vo Chiuta wakulayizga.—2 Akori. 1:20; Chivu. 3:14.
“ŴANTHU WOSI ANGUKAMBA KUTI, ‘AME!’ NDIPU ANGUTHAMIKA YEHOVA”
Ayisirayeli akambanga so kuti “ame” asani athamika ndi kupemphera kwaku Yehova. (Nehe. 8:6; Sumu 41:13) Asani wo avwisiya akamba kuti “ame,” alongonga kuti akoliyana ndi vo vakambika. Wosi wo aŵangapu akondwanga kusopa Yehova munthowa yeniyi. Venivi ndivu vinguchitika pa nyengu yo Fumu Davidi yinguza ndi Bokosi la phanganu laku Yehova ku Yerusalemu. Pa nyengu ya chikondweleru yeniyi, iyu wangupereka pempheru lakutuliya pasi pa mtima lo le pa 1 Mikoka 16:8-36. Ŵanthu wosi wo ŵengapu angukwaskika ukongwa mwakuti “angukamba kuti, ‘Ame!’ ndipu anguthamika Yehova.” Kukamba uneneska, yiwu angukondwa ukongwa kusope Yehova limoza pa zuŵa lenili.
Akhristu a mu nyengu ya akutumika nawu akambanga kuti “ame” asani athamika Yehova. Ŵanthu wo akulembaku Bayibolu kanandi alembanga mazu ngenanga mu makalata ngawu. (Aro. 1:25; 16:27; 1 Petu. 4:11) Buku la Chivumbuzi likonkhoska kuti vakulengeka vauzimu vo ve kuchanya, navu vipereka unkhankhu kwaku Yehova mwakukamba kuti: “Ame! Thamikani Ya!” (Chivu. 19:1, 4) Akhristu a mu nyengu ya akutumika ŵenaŵa agwiriskiyanga ntchitu mazu ngakuti “ame” asani apemphera pa maunganu ngawu. (1 Akori. 14:16) Chinanga kuti venga viyo, yiwu akhumbikanga cha kukamba mazu ngenanga mwachipula mutu.
NTCHIFUKWA WULI “AME” WINU NGWAKUKHUMBIKA?
Kufika yapa, tawona mo ateŵeti aku Yehova agwiriskiyanga ntchitu mazu ngakuti “ame.” Venivi vatiwovya kuziŵa chifukwa cho titenere kukambiya mazu ngenanga pakumaliya pa pempheru. Asani tikamba kuti “ame” pakumaliya pa pempheru, tilongo kuti vo takamba mu pempheru vauneneska nadi. Ndipu asani takamba mazu ngakuti “ame” chinanga mungaŵa mumtima pa pempheru la pagulu, tilongo kuti tikoliyana ndi vo vakambika. Tiyeni tiwoni so vifukwa vinyaki vo vilongo kuti “ame” ngwakukhumbika.
Tivwisiya asani munthu munyaki wapemphera chifukwa pempheru ntchigaŵa cha kusopa kwidu. Tisopa Yehova pa nyengu ya pempheru asani tikoliyana ndi vo vakambika kweniso mo tichitiya vinthu pa nyengu yeniyi. Asani tikhumba kuti “ame” widu wajengi wakutuliya pasi pa mtima, titenere kuchita vinthu mwaulemu kweniso kuvwisiya pempheru.
Tikoliyana pakusopa Chiuta. Pa nyengu ya pempheru la pa gulu, tosi tivwisiya vo vakambika mu pempheru. (Machi. 1:14; 12:5) Asani tosi tikambiya pamoza kuti “ame,” tikoliyana ukongwa. Ndipu asani tikambiya limoza kuti “ame” mwakukweza mazu pamwenga mumtima, Yehova wamuka pempheru lidu mwakukoliyana ndi vo tapempha.
“Ame” widu watovya pakuthamika Yehova
Tithamika Yehova. Yehova wawona chechosi cho tichita pakumusopa, chinanga chingaja chimana. (Luka 21:2, 3) Iyu waziŵa chifukwa cho tipemphere kweniso vo ve mumtima widu. Chinanga kuti tingavwisiya maunganu pa foni, kweni tisimikiza kuti “ame” widu waziŵika kwaku Yehova. Asani tikamba “ame” tithamika Yehova limoza ndi anyidu wo ŵe ku maunganu.
Chinanga kuti “ame” widu wangawoneka kuti ngwambula ntchitu, kweni ngwakukhumbika ukongwa. Buku linyaki lo likonkhoska Bayibolu likamba kuti asani ateŵeti aku Chiuta “agwiriskiya ntchitu mazu yanga, alongo kuti agomezga, azomereza kweniso ŵe ndi chivwanu chakutuliya pasi pa mtima.” Mwaviyo, tiyeni tiyesesengi kuti “ame” widu wakondwesengi Yehova.—Sumu 19:14.
