Jehova Ulaubikkila Maano “Ameni” Wanu
JEHOVA ulabubikkila maano bukombi bwesu. ‘Ulabikkila maano akubaswiilila’ babelesi bakwe, alimwi ulazibikkila maano zintu zyoonse nzyotucita kutegwa tumutembaule, tacikwe makani ambozili zisyoonto. (Mal. 3:16) Mucikozyanyo, amubone bbala ndyotwaamba ziindi zinji. Ibbala eelyo ndyakuti “ameni.” Sena Jehova ulalibikkila maano bbala eeli? Inzya, ulacita oobo! Kutegwa tuzyibe kaambo ncacitila boobo, atulange-lange ncolyaamba bbala eeli alimwi ambolibelesyegwa mu Bbaibbele.
“BANTU BOONSE BAYAKWAAMBA KUTI, ‘AMENI!’”
Bbala lya Chitonga lyakuti “ameni” lyaamba kuti “akube boobo,” naa “masimpe.” Lizwa kubbala lya Chihebrayo ilyaamba “kusyomeka.” Zimwi ziindi lyakali kubelesyegwa mutwaambo tujatikizya mulawo. Ciindi muntu naakali kukonka, wakali kwaamba kuti “ameni” ikutondezya kuti ncaamba cililuzi alimwi ulilibambilide kutambula cintu cili coonse cakali kukonzya kucitika akaambo kacintu cakaambwa. (My. 5:22). Naakali kwaamba kuti “ameni” akati kabuleya, cakali kutondezya kuti ziyume zitete wakeelede kucizuzikizya cisyomezyo cakwe.—Neh. 5:13.
Cikozyanyo cibotu kapati cijatikizya mbolibelesyedwe bbala lyakuti “ameni” cililembedwe kulugwalo lwa Deuteronomo caandaano 27. Ciindi bana Israyeli nobakanjila Munyika Yakasyomezyedwe, bakeelede kubungana akati aa Cilundu ca Ebala alimwi a Cilundu ca Gerizimu kutegwa bamvwe Mulawo nowakali kubalwa. Tiibakabungana kutegwa baswiilile buyo, pele alimwi akuzumina kuti bautambula Mulawo. Bakacita oobo kwiinda mukwiingula kuti “Ameni!” ciindi majwi aakusinganya naakali kubalwa. (Dt. 27:15-26) Amuyeeyele buyo mbwaakali kulimvwisya majwi abaalumi banji, bamakaintu alimwi abana ciindi nobakali kwiingula cakupozya! (Jos. 8:30-35) Cakutadooneka kunyina nobakaaluba majwi ngobakaamba mubuzuba oobo. Alimwi bana Israyeli aabo bakaazuzikizya majwi aabo, nkaambo kulembedwe kuti: “Bana Israyeli bakazumanana kumubelekela Jehova mazuba oonse aabuumi bwa Joshua amumazuba oonse aabaalu aabo ibakasyaala naakafwa Joshua alimwi ibakazyi milimo yoonse Jehova njaakacitila bana Israyeli.”—Jos. 24:31.
Jesu alimwi wakaamba ibbala lyakuti “ameni” ikutondezya ikusyomeka kwazyeezyo zyakaambwa, pele wakacita oobo munzila iilibedelede. Muciindi cakwaamba kuti “ameni” ciindi muntu umwi naakamana kwaamba kaambo kamwi, Jesu wakaamba kuti “ameni” katanaamba cintu cimwi, ikukankaizya kuti cakali camasimpe. Zimwi ziindi wakali kuliinduluka bbala, kaamba kuti “ameni ameni.” (Mt. 5:18; Joh. 1:51) Aboobo wakabasyomezya baswiilizi bakwe kuti majwi aakwe akali aamasimpe ncobeni. Jesu wakali kukonzya kwaamba cakusinizya nkaambo ngonguwe uujisi nguzu zyakupa kuti zisyomezyo zya Leza zizuzikizyigwe.—2Kor. 1:20; Ciy. 3:14.
“BANTU BOONSE BAKAAMBA KUTI, ‘AMENI!’ AKUTEMBAULA JEHOVA”
Bana Israyeli alimwi bakali kulibelesya bbala lyakuti “ameni” ciindi nobakali kupa ntembauzyo alimwi akupaila kuli Jehova. (Neh. 8:6; Int. 41:13) Kwiinda mukwaamba bbala eeli wamana mupailo, aabo ibakali kuswiilila bakali kutondezya kuti bazizuminizya zyaambwa. Aboobo boonse ibakaliko bakali kukonzya kutola lubazu, alimwi akukkomana kukomba Jehova munzila eeyi. Eeci ncecakacitika ciindi Mwami Davida naakaleta Bbokesi lya Jehova ku Jerusalemu. Mukusekelela kwakatobela, wakapa mupailo uuzwa ansi amoyo kauli mbuli nyimbo uujanika kulugwalo lwa 1 Makani 16:8-36. Aabo ibakaswaangene akabakulwaizya majwi aakwe cakuti “bantu boonse bakaamba kuti, ‘Ameni!’ akutembaula Jehova.” Inzya, kwiingula kwabo caantoomwe kwakayungizya lukkomano mubuzuba oobo.
Banakristo bamumwaanda wamyaka wakusaanguna abalo bakalibelesya bbala lyakuti “ameni” ciindi nobakali kutembaula Jehova. Balembi ba Bbaibbele kanji-kanji bakalibikkilizya mumagwalo aabo. (Rom. 1:25; 16:27; 1Pet. 4:11) Mane buya bbuku lya Ciyubunuzyo lilaamba kujatikizya zilenge zyamuuya kujulu kazitembaula Jehova kwiinda mukwaamba kuti: “Ameni! Amumutembaule Ja!” (Ciy. 19:1, 4) Kanji-kanji Banakristo bamumwaanda wamyaka wakusaanguna bakali kwaamba kuti “ameni” kumamanino aamipailo iyakali kupegwa kumiswaangano yabo. (1Kor. 14:16) Nokuba boobo, talili bbala ndyobakali kwiinduluka buyo kakunyina kuyeeya ncolyaamba.
KAAMBO “AMENI” WANU NCOUYANDIKA
Twamana kuzyiba babelesi ba Jehova mbobakali kulibelesya bbala lyakuti “ameni,” tulakonzya kubona kaambo ncociyandika kwaamba kuti “ameni” kumamanino aamupailo. Ciindi notulyaamba bbala eeli kumamanino aamupailo wesu, tutondezya kuti tulazizumina nzyotwaamba. Alimwi ciindi notukulwaizyigwa kwaamba kuti “ameni,” nomuba mukaumuumu, kumupailo wakubuleya, tutondezya kuti tulazizumina izyaambwa. Amubone twaambo atumbi “ameni” wesu ncouyandika.
Tulabikkila maano ciindi umwi napaila nkaambo ncibeela cesu cabukombi. Tulamukomba Jehova, ikutali buyo kwiinda muzintu zyaambwa mumupailo, pele alimwi ambotulilemeka ciindi nokupailwa. Luyandisisyo lwesu lwakwaamba kuti “ameni” kuzwa ansi amoyo lulakonzya kutugwasya kuzumanana kuulanga munzila yeelede alimwi akuubikkila maano mupailo.
Tulikamantene mbuli bakombi. Mupailo wakubuleya upa kuti basimbungano boonse babikkile maano kuzintu zili mukwaambwa. (Mil. 1:14; 12:5) Ciindi notukulwaizyigwa kwiingula caantoomwe abakwesu abacizyi, tulakamantana kapati. Ciindi notwaamba kuti “ameni” caantoomwe, tacikwe makani naa twaamba cakupozya naa cakaumuumu, mupailo wesu ulakonzya kupa kuti Jehova acite kweelana akulomba kwesu.
“Ameni” wesu upa kuti Jehova atembaulwe
Tulamutembaula Jehova. Jehova ulazibona zyoonse nzyotucita mubukombi bwesu. (Lk. 21:2, 3) Ulaabona makanze ngotujisi alimwi azili mumoyo wesu. Nokuba kuti tuswiilila miswaangano kwiinda mukubelesya fooni, tulijisi lusyomo lwakuti “ameni” wesu ulaumvwa Jehova. Ciindi notwaamba kuti “ameni,” tulabasangana boonse aabo ibajanika kumuswaangano kutembaula Jehova.
“Ameni” wesu ulakonzya kulibonya mbuli kuti taujisi mpindu, pele ulayandika kapati. Bbuku limwi lyaamba zyamu Bbaibbele lyaamba kuti, “Kwiinda mukubelesya bbala eeli lyomwe,” babelesi ba Leza balakonzya kutondezya “lusyomo, kuzuminwa, alimwi abulangizi ibuli mumyoyo yabo.” “Ameni” wesu lyoonse weelede kumukkomanisya Jehova.—Int. 19:14.
