“Amen” em tok Inglis, na mining bilong en i olsem, “dispela samting i ken kamap,” o “i tru.” Dispela tok i kam long wanpela tok Hibru em mining bilong en i olsem “stap gut long wok,” o “man em narapela i ken trastim.” Sampela taim ol i yusim dispela tok long kot. Taim man i mekim tok promis, em bai tok “amen” bilong strongim olsem tok bilong em i tru na em bai redi long karim hevi i kamap long tok promis bilong em. (Nam. 5:22) Taim man i tok “amen” long ai bilong planti manmeri, em i gat wok long inapim tok bilong em.—Neh. 5:13.

Lo sapta 27 i kamapim gutpela eksampel long pasin bilong tok “amen.” Bihain long lain Israel i kisim Graun Bilong Promis, ol i bung namel long Maunten Ebal na Maunten Gerisim. Ol i putim yau long ol tok bilong Lo, na ol i tokaut olsem ol i redi long bihainim dispela Lo. Taim ol hetman i ritim Lo na kolim ol hevi bai painim man i brukim Lo, ol i tok “Amen!” (Lo 27:15-26) Tingim, planti tausen man, meri, na pikinini i tok amen long wankain taim! (Jos. 8:30-35) Ol i no lusim tingting long tok ol i mekim long dispela de. Ol i inapim tok promis bilong ol. Baibel i tok: “Ol Israel i lotu yet long Jehova long taim bilong Josua na long taim bilong ol hetman husat i bin stap laip yet bihain long Josua i dai. Ol dispela hetman i bin lukim olgeta samting Jehova i mekim bilong helpim ol Israel.”—Jos. 24:31.

Jisas tu i tok “amen” bilong strongim olsem tok bilong em i tru, tasol em i mekim long narapela kain rot. Em i no yusim “amen” (ol i trensletim olsem “tru tumas”) olsem bekim bilong tok, nogat. Em i yusim bilong  kirapim tok bambai dispela i soim olsem tok bilong em i tru. Sampela taim em i tok 2-pela taim olsem, “amen amen.” (Mat. 5:18; Jon 1:51) Em i soim olsem tok bilong em i tru olgeta. Jisas inap tok olsem bikos em i kisim wok bilong truim olgeta tok promis bilong God.—2 Kor. 1:20; Rev. 3:14.

Lain Israel i save tok “amen” taim ol i preisim Jehova na beten long em. (Neh. 8:6; Sng. 41:13) Taim ol manmeri i tok amen, dispela i soim olsem ol i wanbel long ol tok i kamap long beten. I olsem olgeta i insait long beten, na ol i amamas long lotuim Jehova. Lain Israel i mekim olsem taim King Devit i bringim Bokis Kontrak bilong Jehova i go long Jerusalem. Taim ol i mekim ol ofa na sakrifais, Devit i mekim beten long rot bilong wanpela singsing i stap long 1 Stori 16:8-36. Ol manmeri long dispela bung i pilim tru ol tok i kamap long beten, olsem na “olgeta manmeri i tok, ‘Amen!’ Na ol i litimapim nem bilong Jehova.” Ol i wanbel long tok amen, na dispela i mekim ol i amamas tru.

Long taim bilong ol aposel, ol Kristen i tok “amen” taim ol i preisim Jehova. Taim ol man i raitim ol tok bilong Baibel, ol i kolim tu dispela tok long pas ol i raitim. (Rom 1:25; 16:27; 1 Pita 4:11) Buk Revelesen i stori long ol ensel long heven i givim glori long Jehova na ol i tok: “Amen! Preisim Ja!” (Rev. 19:1, 4) Ol Kristen long pastaim i tok “amen” taim ol i beten long taim bilong miting. (1 Kor. 14:16) Ol i no inap kolim nating dispela tok.

Ol manmeri long bipo i save yusim dispela tok “amen,” na dispela i helpim yumi long luksave olsem i stret long kolim dispela tok long pinis bilong beten. Taim yumi wan wan i beten na tok amen, yumi soim olsem yumi pilim tru ol tok yumi kolim long beten. Sapos planti manmeri i bung na wanpela i beten na yumi tok “amen,” maski yumi kolim isi o yumi  kolim strong, dispela i soim olsem yumi wanbel long ol tok i kamap long beten. Skelim ol narapela risen na pasin bilong tok “amen” i bikpela samting.

Wok lotu. Beten em wanpela hap bilong wok lotu, olsem na toktok na pasin yumi mekim i bikpela samting. Yumi laik pilim tru ol tok i kamap long beten na bai yumi inap tok “amen,” olsem na yumi mas bihainim stretpela pasin na putim tingting olgeta i go long beten.

Strongim pasin wanbel. Long ol beten i kamap long miting, yumi putim yau long ol tok em kongrigesen olgeta i harim. (Apo. 1:14; 12:5) Taim yumi olgeta i wanbel na tok amen, dispela i strongim pasin wanbel namel long yumi. Maski yumi kolim “amen” strong o yumi kolim long tingting, yumi soim olsem yumi pilim tru dispela beten, na Jehova bai mekim samting yumi askim long en.

Yumi preisim Jehova. Jehova i save long olgeta liklik samting yumi mekim bilong lotuim em. (Luk 21:2, 3) Em i lukim astingting na laik i stap long bel bilong yumi. Maski sapos yumi harim miting long rot bilong fon, Jehova i lukim na harim yumi taim yumi tok “amen.” Yumi stap wanbel wantaim ol lain i stap long miting na yumi olgeta i preisim Jehova.

Yumi inap ting olsem pasin bilong tok “amen” em liklik samting, tasol tru tru i no olsem. Wanpela dikseneri bilong Baibel i tok “long rot bilong dispela tok,” ol wokman bilong God inap kamapim klia “strongpela bilip, strongpela laik, na strongpela hop bilong ol.” Yumi laik bai Jehova i belgut long olgeta taim yumi tok “amen.”​—Sng. 19:14.