A rito “amen” li vula leswaku “aswi ve tanu,” kumbe “hikakunene.” Li huma ka rito la Xiheberu leli vulaka “kutshembeka.” Minkama yin’wana, a rito “amen” ali tirhisiwa loko kuthethiwa timhaka. Hi xikombiso, ndzhaku ka kuva munhu a yendle xihlambanyu xa leswaku leswi aataswi vula i ntiyiso, a afanele a ku “amen” akuva a tiyisekisa leswaku xihlambanyu lexi angaxi yendla a pfumelelana na xona kupatsa ni mavuyelo lama hlamuseliweke ka xona. (Tinhl. 5:22) Kuva a vula swaku “amen” aphambeni ka vanhu votala aswimu yendla a titwa a li ni mfanelo ya kuhetisisa xihlambanyu lexi axi yendleke. — Neh. 5:13.

Xikombiso xikulu xa kutirhisiwa ka rito lelinge “amen” xi kumeka ka Deteronoma ndzima 27. Ndzhaku ka loko Vayisrayele va nghene ka Tiko Leli Tshembisiweke, va hlengeletanile ka Ntshava ya Ebali ni ya Gerizimu leswaku va twa kulerhiwa ka Nawu. Avanga hlangananga leswaku va yingisa Nawu ntsena kambe ava fanele va vula leswaku va pfumelelana na wona. Loko kuhlamuseliwa mavuyelo lawa amata kumiwa hi lava avata tshuka vangawu yingisi Nawu, hinkwavu va vule va ku “amen!” akuva va kombisa leswaku va pfumelelana na wona. (Det. 27:15-26) Pimisa hi mpfumawulo wa timiliyoni ta vavanuna, vavasati ni swivanana loko hi rito leli twalaka ni hi vun’we va ku “amen!” (Yoxu. 8:30-35) Kunene avama rivalanga marito lawa vama vuleke hi siku lolelo. Haswi tiva leswaku Vayisrayele vaxi hlayisile xitshembiso xa vona hikuva rungula la Bibele li li: “Israyele aya mahlweni atirhela Yehovha amasikwini hinkwawu ya wutomi la Yoxuwa ni ya madoda lamayeke mahlweni mahanya ndzhaku ka Yoxuwa lawa nakambe mativeke mintirho hinkwayu ya Yehovha leyi ayiyendleleke Israyele.” — Yoxu. 24:31.

Yesu na yena a atirhisa rito “amen” leswaku a tiyisekisa leswi aaswi vula. Kambe ndlela leyi ali  tirhiseke ha yona ayi hlawulekile. Matshan’wini ya ku “amen” ndzhaku kotwa marito lama vuliweke hi munhu mun’wani, a asungula leswi a alava kuswi vula hi rito “amen” kuva a tiyisekisa vayingiseli va yena leswaku leswi aata gama aswi vula aku li ntiyiso hikakunene. Minkama yin’wana aali phindha rito leli, a ku “amen amen.” (Mat. 5:18; Yoh. 1:51) Hi ndlela leyi, a apfuna vayingiseli va yena leswaku vanga kanakani nikatsongo ka leswi aaswi vula. Aswimu fanela Yesu kuvulavula hi ndlela leyi hikusa hi yena ntsena a nyikiweke matimba ya kuhetisisa switshembiso hinkwaswu swa Yehovha. — 2 Kor. 1:20; Nhla. 3:14.

Vayisrayele ava tlhela va tirhisa rito “amen” loko va khongela ni kudzunisa Yehovha. (Neh. 8:6; Pis. 41:13) Lava ava yingisa xikhongelo ava kombisa leswaku va twanana ni leswi vuliweke hi kuvula va ku “amen” loko xi hela. Hi kuvula leswo, hinkwavu ava hlangayela a kudzuniseni ka Yehovha. Leswi aswi yendla leswaku swi tsakisa kugandzela Yehovha hi vun’we. Leswi swi yendlekile loko Hosi Davhida a yise Areka ya Yehovha aYerusalema. Ka nkhuvu lowu, kuyembeleliwe lisimu la matimba swinene leli tsaliweke hi Davhida. Lisimu leli li kumeka ka 1 Tikronika 16:8-36. Hinkwavu lava a va li kona va khumbeke swinene hi marito ya yena lakakuva “vanhu hinkwavu vaku: ‘amen!’ vadzunisa Yehovha.” Kunene ava tsake swinene hi mhaka ya leswi ava hlanganile leswaku va gandzela Yehovha swin’we.

Vakreste lava hanyeke axikarhi ka lembe la 1 kuya ka 100 E.C na vona avali tirhisa rito lelinge “amen” loko va dzunisa Yehovha. Vapostola van’wana lava tirhisiweke leswaku va tsala Bibele avali phata ka mapapila lawa avama tsalela vamakwavu. (Rhom. 1:25; 16:27; 1 Pet. 4:11) Loko kuli buku la Nhlavutelo li vulavula hi tintsumi leti vulaka swaku “Amen, Haleluya!” loko ti dzunisa Yehovha. (Nhla. 19:1, 4) Vakreste Vosungula ava tolovela kuvula swaku “amen” loko kuyendliwa swikhongelo aminhlanganwini. (1 Kor. 14:16) Hambiswilitanu, avangoli vulela nawu ntsena.

Leswi se hiyi tivaka ndlela leyi malandza ya Yehovha ya khale amali tirhisa ha yona rito lelinge  “amen”, se haswi vona leswaku hayini li tirhisiwa loko xikhongelo xi hela. Loko hili vula ndzhaku ka xikhongelo lexi hixi yendlaka na hi li hoxe, hi kombisa leswaku leswi hiswi vuleke swi huma mbilwini. Naswona loko hili vula hi rito leli twalaka kumbe ambilwini ya hina ndzhaku ka xikhongelo lexi yendliwaka hi munhu mun’wana, hi kombisa leswaku ha pfumelelana ni leswi aswi vuleke. Ahi voneni swivangelo swin’wana leswi yendlaka “amen” wa hina a va wa lisima.

“Amen” wa hina a yendla xiphemu xa wugandzeli la hina. Hambileswo, ahi gandzeli Yehovha ntsena hi kupfumelelana ni leswi vuliweke ka xikhongelo kambe ni loko hi tikhoma kahle loko xi li karhi xi yendliwa. Hikolaho ka leswi hi lavaka kuvula swaku “amen” swi huma mbilwini, hi tikhoma hi ndlela leyinene hi tlhela hi nyikela yingiso swinene loko xikhongelo xi li karhi xi yendliwa.

“Amen” wa hina a tiyisa vun’we la hina tani hi vagandzeli va Yehovha. Loko kuyendliwa xikhongelo, swirho swa bandla hi vun’we swi nyikela yingiso ka rungula lo la lin’we. (Mint. 1:14; 12:5) Vun’we la hina li tlhela li tiya swinene loko hi ku “amen” hi nkama wun’we. Kunga khataliseki leswaku himu vula hi rito leli twalaka kumbe ambilwini, “amen” wa hina anga susumetela Yehovha leswaku a hlamula swikombelo leswi yendliweke.

“Amen” wa hina a yisa kudzuneka ka Yehovha. Yehovha waswi vona hinkwaswu leswi hiswi yendlaka leswaku himu gandzela. (Luk. 21:2, 3) Waswi vona leswi hinga na swona mbilwini ni leswi susumetelaka swiyendlo swa hina. Hambiloko hi yingisela minhlanganu hi telefoni, ahi tiyisekeni leswaku Yehovha amu nyika lisima “amen” wa hina. Phela loko hi ku “amen” hi tipatsa ni lavanga a Salão do Reino a kudzuniseni ka Yehovha.

“Amen” wa hina anga tikomba anga li wa nchumu kambe i wa lisima swinene. Buku lin’wana leli hlamuselaka marito ya Bibele li vula leswi: “Hi kutirhisa rito leli [“amen”], malandza ya Xikwembu ma kombisa kutshemba ni kupfumelelana loku manga na kona atimbilwini ta wona.” Onge “amen” wa hina anga tsakisa mbilu ya Yehovha. — Pis. 19:14.