“Ameni” Winu Ngwakuzirwa kwa Yehova
YEHOVA wakuzirwiska kusopa kwithu. ‘Wakuŵikako khutu lake na kuŵategherezga’ ŵateŵeti ŵake, ndipo wakuzirwiska chilichose icho ŵakuchita kuti ŵamulumbe nanga chingaŵa chichoko wuli. (Mal. 3:16) Mwachiyelezgero, ghanaghanirani lizgu ilo tikwenera kuti taliyowoya kanandi waka. Lizgu ili ni “Ameni.” Kasi Yehova wakuwona kuti lizgu lipusu ili ndakuzirwa? Enya, ndakuzirwa. Kuti timanye chifukwa chake, tiyeni tisande ivyo lizgu ili likung’anamura ndiposo umo likugwiliskikira ntchito mu Baibolo.
“ŴANTHU WOSE ŴAKAZGORE KUTI, ‘AMENI!’”
Lizgu Lachingelezi lakuti “ameni” likung’anamura kuti “viŵe ntheura” panji “nadi.” Lizgu ili lili kufuma ku lizgu Lachihebere ilo likung’anamura “uŵe wakugomezgeka.” Nyengo zinyake likagwirangaso ntchito pa nkhani za milandu. Para munthu wakupanga chilapo, wakayowoyanga kuti “ameni” kuti wasimikizge kuti ivyo wayowoya ni vyaunenesko ndiposo wazomerenge chilichose icho chizenge chifukwa cha ivyo wayowoya. (Maŵa. 5:22) Para munthu wapanga chilapo na kuyowoya kuti “ameni” pawumba, wali na chifukwa chikuru chomene cha kusungira layizgo lake.—Neh. 5:13.
Chiyelezgero chiwemi chomene cha umo lizgu lakuti “ameni” lili kugwiliskikira ntchito chili pa Dotoronome chipaturo 27. Ŵaisrayeli ŵakati ŵanjira mu Charu cha Layizgo, ŵakawungana pakati pa Phiri la Ebala na Phiri la Gerizimu kuti ŵapulikeso Dango. Ŵakawungana apa kuti ŵapulike waka Dango yayi, kweniso kuti ŵalongore kuti ŵalizomera. Ŵakalongora kuti ŵalizomera pakuzgora kuti “ameni!” pa nyengo iyo ŵakaŵazganga ivyo vichitikirenge uyo watondekenge kupulikira. (Doto. 27:15-26) Ghanaghanirani waka umo ghakapulikikwira mazgu gha ŵanalume, ŵanakazi, na ŵana masauzandi ghanandi apo ŵakazgoranga mwakukwezga. (Josh. 8:30-35) Ŵakwenera kuti ŵakaluwa yayi mazgu agho ŵakayowoya pa zuŵa ili. Ŵaisrayeli aŵa ŵakasungilira mazgu ghawo, chifukwa Baibolo likuti: “Israyeli wakalutilira kuteŵetera Yehova mazuŵa ghose gha Joshuwa na mazuŵa ghose gha ŵalara awo ŵakaŵa ŵamoyo Joshuwa wati wafwa, na awo ŵakamanyanga milimo yose iyo Yehova wakachitira Israyeli.”—Josh. 24:31.
Yesu nayo wakayowoyanga lizgu lakuti “ameni” kuti wasimikizge kuti ivyo wakayowoyanga vikaŵa vyaunenesko, kweni wakachita munthowa yapadera. M’malo mwa kuligwiliskira ntchito lizgu lakuti “ameni” pakukhozgera ivyo vyayowoyeka, iyo wakagwiliskiranga ntchito lizgu ili (mu Chingelezi lili kung’anamulika kuti “nadi”) para wambenge kuyowoya fundo yinyake yakuzirwa. Nyengo zinyake wakayowoyanga mwakuwerezga lizgu ili, kuti “ameni ameni.” (Mat. 5:18; Yoh. 1:51) Pakuyowoya nthena wakasimikizgiranga ŵategherezgi ŵake kuti mazgu ghake ghakaŵa ghaunenesko nadi. Yesu wakayowoyanga nthena chifukwa chakuti ndiyo wakapika mazaza kufiska malayizgo ghose gha Chiuta.—2 Kor. 1:20; Chivu. 3:14.
“ŴANTHU WOSE ŴAKAYOWOYA KUTI: ‘AMENI!’ NDIPO ŴAKALUMBA YEHOVA”
Ŵaisrayeli ŵakayowoyangaso “ameni” para ŵakulumba Yehova kweniso para ŵakulomba. (Neh. 8:6; Sal. 41:13) Pakuyowoya kuti “ameni” pamanyuma pa lurombo, ŵategherezgi ŵakalongoranga kuti ŵakukolerana navyo ivyo vyayowoyeka. Ntheura wose awo ŵakaŵapo, nawo ŵakayowoyanga kuti “ameni,” ndipo ŵakakondwa kusopa Yehova munthowa iyi. Ivi ndivyo vikachitika apo Themba Davide likiza na Likasa la Yehova ku Yerusalemu. Panyengo ya chikondwelero, wakalomba kufumira pasi pa mtima. Lurombo ulu lukaŵa nga ni sumu ndipo luli kulembeka pa 1 Midauko 16:8-36. Awo ŵakaŵapo pa chikondwelero ichi ŵakakhwaskika chomene na mazgu ghake mwakuti “wose ŵakayowoya kuti: “Ameni!” ndipo ŵakalumba Yehova.” Enya, ŵakakondwa kusopa Yehova pamoza.
Mu nyengo ya Ŵakhristu ŵakwambilira napo ŵakayowoyanga kuti “ameni” para ŵakulumba Yehova. Ŵanthu awo ŵakalembako Baibolo kanandi ŵakasazgangamo mazgu agha mu makalata ghawo. (Rom. 1:25; 16:27; 1 Pet. 4:11) Buku la Chivumbuzi likuyowoya kuti nanga mbangelo kuchanya pakulumba Yehova ŵakuyowoya kuti: “Ameni! Lumbani Ya.” (Chivu. 19:1, 4) Ŵakhristu ŵakwambilira kanandi ŵakayowoyanga “ameni” pamanyuma pa lurombo pa maungano ghawo. (1 Kor. 14:16) Kweni likaŵa lizgu ilo ŵakaliyowoyanga waka mwakuwerezga kwambura kughanaghanirapo yayi.
CHIFUKWA WULI NTCHAKUZIRWA KUYOWOYA KUTI “AMENI”?
Pamanyuma pa kusanda umo ŵateŵeti ŵa Yehova ŵakagwiliskiranga ntchito lizgu lakuti “ameni”, tawona kuti ntchakuzirwa kuyowoya kuti “ameni” paumaliro wa lurombo. Para tikuyowoya kuti ameni paumaliro wa lurombo lwithu, tikulongora kuti ivyo tayowoya vyafuma nadi pasi pa mtima. Ndipo para tikuyowoya kuti “ameni” nanga ntchamumtima, pa lurombo lwa pawumba, tikulongora kuti tikukolerana navyo ivyo vyayowoyeka. Wonani vifukwa vinyake vyakuyowoyera kuti “ameni.”
Lurombo ntchigaŵa cha kusopa kwithu. Tikusopa Yehova pa nyengo ya lurombo, ntheura tingalongora kuti ndise ŵantchindi kuyana na umo tikuchitira pa nyengo iyi. Chifukwa chakuti tikukhumba kuyowoya kuti “ameni” kufumira pasi pa mtima, tikuchita vinthu mwantchindi pa nyengo iyi na kutegherezga ivyo vikuyowoyeka mu lurombo.
Lurombo lukutovwira kuŵa ŵakukolerana. Lurombo lwapawumba chomene lukuŵa lwakukhwaskana na mpingo wose. (Mil. 1:14; 12:5) Para tayowoya kuti “ameni” pamoza na ŵabali na ŵadumbu, vikovwira kuti tiŵe ŵakukolerana chomene. Kwali tiyowoyenge mwakukwezga panji chamumtima, kweni para tayowoya kuti “ameni” vikovwira kuti Yehova wachitepo kanthu pa ivyo talomba.
Para tikuyowoya kuti “ameni” tikulumba Yehova
Tikulumba Yehova. Yehova wakuwona tumilimo tuchokotuchoko uto tikuchita pakumusopa. (Luka 21:2, 3) Wakumanya chilato chithu kweniso wakuwona ivyo vili mu mtima withu. Nanga ni para ungano tingategherezga pa telefoni, kweni tikugomezga kuti Yehova wakumanya para nase tayowoya kuti “ameni.” Para tayowoya kuti “ameni” tikulumba Yehova pamoza na awo ŵali ku ungano.
“Ameni” withu wangawoneka nga ngwambura kuzirwa, kweni ngwakuzirwa chomene. Encyclopedia yinyake yakulongosora Baibolo yikuti para ŵateŵeti ŵa Chiuta “ŵayowoya kuti ‘ameni’ ŵakulongora kuti ŵakumugomezga Chiuta ndipo ŵakugomezga na mtima wose kuti wachitengepo kanthu.” Mphanyi “ameni” waliyose uyo tikuyowoya waŵa wakukondweska kwa Yehova.—Sal. 19:14.
