Yehova o Sanjuka Eci Ove o Popia Hati, “Amene”
YEHOVA wa kapako efendelo lietu. Eye o “yevelela” afendeli vaye kuenda wa kapako ovina viosi va linga oco vo sivaye, ndaño vievi vitito. (Mal. 3:16) Ndeci, konomuisa ondaka yimue wa siata oku tukula olonjanja vialua. Ondaka yokuti, “amene.” Anga hẽ Yehova wa kapako muẽle ondaka yaco? Ocili, wa yi kapako! Oco tu kũlĩhe esunga liaco, tu konomuisi eci ci lomboloka ondaka yaco kuenda ndomo yi tukuiwa Vembimbiliya.
“OMANU VOSI VA KA TAMBULULA VATI, ‘AMENE!’”
Kongelesi ondaka “amene” yi lomboloka okuti “ci lingiwe,” ale “ndi tava.” Kelimi lio Heveru ondaka yaco yi lombolokavo okuti, “oku kala ukuacili,” ale “oku koleliwa.” Olonjanja vimue ya enda oku kuamiwa poku tetulula ovitangi vimue. Omunu noke yoku linga ohuminyo yimue, eye wa sukilile oku tambulula hati, “amene” oco a lekise okuti ovina a popia viocili kuenda nda ka tẽlisile ovina a popia o kangisiwa. (Ate. 5:22) Eci eye a tambulula “amene” powiñi eca uvangi wokuti amamako lohuminyo yaye.—Neh. 5:13.
Ulandu umue okuti mua kongela ondaka “amene” u sangiwa kelivulu Liesinumuĩlo ocipama 27. Va Isareli noke yoku iñila Vofeka Yohuminyo va liongoluila kovaso Yomunda Evale kuenda Yomunda Gerisimi, oco va yevelele oku tangiwa Kuovihandeleko. Ovo va kala pocitumãlo caco oco va ece uvangi wokuti va tava Kovihandeleko viaco. Ovo va ci linga poku tambulula hati “amene!” noke lioku yeva ovitangi vi yilila kesino. (Esin. 27:15-26) Sokolola komanu valua alume, lakãi kuenda omãla oku tambulula lolukandi! (Yeh. 8:30-35) Ovo lalimue eteke va ivaleleko olondaka viaco. Va Isareli vana va amamako oku tẽlisa ondaka yavo, veya oku popiwa hati: “Va Isareli va vumba Yehova oloneke viosi via Yehosua, loloneke viosi viakulu vokotembo ya Yehosua, vana va kũlihile upange wosi Yehova a lingilile Isareli.”—Yeh. 24:31.
Yesu wa tukulavo ondaka “amene” oco a lekise okuti olondaka a popia viocili, pole, wa ci linga lonjila yimue yilikasi. Eye ka tukuile ondaka hati ndi tava, pole, wa tukula ondaka yokuti “amene” okuti kongelesi yi lomboloka “ocili muẽle”. Olonjanja vimue wa enda oku pitolola ondaka hati, “amene amene.” (Mat. 5:18; Yoa. 1:51) Eye wa lekisa kolonjeveleli viaye okuti olondaka viaye viocili muẽle. Yesu wa ponduile oku vangula lekolelo momo eye wa kuatele omoko yoku linga okuti olohuminyo viosi via Suku vi tẽlisiwa ocili.—2 Va Kor. 1:20; Esit. 3:14.
“OMANU VA POPIA VATI, ‘AMENE!’ KUENDA VA SIVAYA YEHOVA”
Va Isareli va tukulavo ondaka “amene” eci va eca esivayo ku Yehova loku likutilila kokuaye. (Neh. 8:6; Osa. 41:13) Poku popia hati “amene” noke liohutililo, vana va yevelela va lekisa okuti va tava kovina via popiwa. Vosi va kalapo va sanjukila oku fendela Yehova lonjila ndeyi. Eci oco ca pita eci Soma Daviti a nena ocikasia ca Yehova ko Yerusalãi. Vokuenda kuocipito, eye wa likutilila lutima wosi poku imba ocisungo cimue ci sangiwa kelivulu lia 1 Asapulo 16:8-36. Vana va kalapo va vetiyiwa lolondaka viaye okuti “omanu vosi va linga vati, Amene, kuenje va sivaya Yehova.” Ocili okuti etambululo liavo lia vokiya esanju liavo keteke liaco.
Akristão vo kocita catete va enda oku popiavo hati, “amene” poku sivaya Yehova. Vovikanda via sonehiwa Vembimbiliya mu sangiwavo ondaka “amene.” (Va Rom. 1:25; 16:27; 1 Pet. 4:11) Elivulu Liesituluilo li lombolola okuti angelo kilu va sivaya Yehova poku popia hati: “Amene! Aleluya!” (Esit. 19:1, 4) Akristão vokocita catete va enda oku popia hati: “amene” noke yoku linga ohutililo kolohongele viavo. (1 Va Kor. 14:16) Ovo ka va pitolaile ño ondaka yaco okuti ka va sokolola vali kesilivilo liondaka yaco.
ESUNGA LIECI O “AMENE” YOVE YI KUETELE ESILIVILO
Noke lioku lilongisa ndomo afendeli va Yehova kosimbu va tukola ondaka “amene,” tu pondola oku limbuka esunga lieci ci kuetele esilivilo oku malusula ohutililo londaka “amene.” Eci tu popia hati “amene” kesulilo liohutililo tua linga, tu eca uvangi wokuti tua tava kolondaka via popiwa. Handi vali, eci tu tambulula okuti “amene” ndaño tu ci linga loku loñola, tu lekisa okuti tua tava kohutililo yaco. Kũlĩhĩsa esunga lieci o “amene” yetu yi kuetele esilivilo.
Eci manji umue a likutilila tu sukila oku yevelela lutate momo ci panga onepa kefendelo lietu. Eci tu likutilila tu fendelavo Yehova ka tu ci lingi lika kovina tu popia, pole, tu ci lekisavo kovilinga. Eci tu tambulula hati, “amene” tu yongola oku ci linga lutima wosi kuenda oku yevelela lutate ohutililo yi lingiwa.
Tu li kuete omunga. Olohutililo vi lingiwa powiñi vi tiamisila utima wetu kolondaka vi kasi oku yeviwa lomanu vosi vekongelo. (Ovil. 1:14; 12:5) Eci tu tambulula vonjanja yimuamue la vamanji, omunga yetu yi pamisiwa. Handi vali, eci tu tambulula hati, “amene” lolukandi ale loku loñola ci vetiya Yehova oku linga eci tua pinga vohutililo.
Oku popia hati, “amene” ci sanjuisa Yehova
Tu sanjuisa Yehova. Yehova o limbuka ovina viosi tu linga kefendelo liaye ndaño muẽle vievi vitito. (Luka 21:2, 3) Eye wa kũlĩha ovisimĩlo vietu kuenda eci ci kasi vutima wetu. Ndaño muẽle okuti tu kasi oku kuama olohongele votelefone, tu koleli okuti Yehova o sanjukila o “amene” yetu. Eci tu popia okuti “amene” tu li kongela ku vana va kasi oku sivaya Yehova vekongelo.
Oku popia hati, “amene” soketi ka ci kuete esilivilo, pole, ci kuete esilivilo lialua. Elivulu limue lia lombolola okuti, “poku tukula ondaka yaco, afendeli va Suku va lekisa okuti va kuete ekolelo, onjongole kuenda elavoko liocili vovitima viavo.” Omo liaco, tua amamiko oku popia hati, “amene” oco tu sanjuisi Yehova—Osa. 19:14.
