The English word “amen” mean say “I agree” or “make e be so.” And the Hebrew word wey e come from mean “to dey faithful” or “to trust.” Sometimes, them de use-am when them de judge matter. When person don swear, e go talk “amen” to show say the thing wey e talk na true and say e go accept anything wey go happen. (Num. 5:22) When person talk “amen” for public, na another big reason wey e get to do wetin e promise.​—Neh. 5:13.

For Deuteronomy chapter 27 e get one fine way wey they use “amen.” After people for Israel enter the Promise Land, they gather between Mount Ebal and Mount Gerizim to hear as them de read the Law. For there, they no go only listen to the Law, but they talk say they don accept the Law. They do this one when they say “Amen!” after they read wetin go happen to person wey disobey the Law. (Deut. 27:15-26) Think about the sound of thousands of men, women, and children as them de answer aloud! (Josh. 8:30-35) They no ever forget the things wey they talk that day, and they do as they talk. We know this one because Bible talk say: “People for Israel continue to serve Jehovah all the days wey Joshua dey alive and all the days of the elders wey still dey alive after Joshua don die. Na them know the things wey Jehovah do for people of Israel.”​—Josh. 24:31.

Jesus still use “amen” for one special way. E use-am to show say the thing wey e talk na true. Jesus de talk “amen” (for English they translate-am as “truly”) before e talk any  important truth, no be after person talk something. Sometimes Jesus de repeat this word when e say “amen amen.” (Matt. 5:18; John 1:51) E de talk-am to show the people wey e de talk to say, wetin e de talk na the correct truth. Jesus really dey sure of wetin e talk; and e talk like that because of the power wey e get from God to make all the promise of God come true.​—2 Cor. 1:20; Rev. 3:14.

People for Israel still use “amen” when them de pray and praise Jehovah. (Neh. 8:6; Ps. 41:13) When person de pray, and we listen well-well and say “amen” after the prayer, e show say we agree with wetin the person talk. This one de make everybody to join and worship Jehovah for special way. This thing happen when King David bring the Ark of Jehovah to Jerusalem. As people begin celebrate, King David pray from the heart. The prayer be like song, and they write this prayer for 1 Chronicles 16:8-36. The thing wey e talk really move all the people wey come, and “all the people say, ‘Amen!’ and they praise Jehovah.” They really glad as all of them answer together to worship Jehovah.

For apostle their time, Christians still use “amen” to praise Jehovah. People wey write Bible still use “amen” many times for letters wey they write. (Rom. 1:25; 16:27; 1 Pet. 4:11) Bible book of Revelation talk about how spirit creatures for heaven de praise Jehovah as them talk say: “Amen! Praise Jah!” (Rev. 19:1, 4) Na normal thing for Christians for apostle their time to talk “amen” for their meeting after prayer. (1 Cor. 14:16) But “amen” no be word wey they fit just talk when they no think about the meaning.

As we don talk about how servants of Jehovah for apostles their time use “amen,” now we fit see why e dey important to use “amen” end prayer. When we pray finish and say  “amen,” we de show say we really mean wetin we don talk. And when we say “amen,” even for our heart, to wetin person pray about when we gather together, e show say we agree with the prayer. Make we see other reasons why e dey important to talk “amen.”

E show say we de listen when person de pray because prayer na part of our worship. We de worship Jehovah with wetin we de talk for prayer and the way we de behave for prayer. Because we really want make the “amen” wey we talk come from our heart, this one go make us listen and behave well when another person de pray.

E show say we dey as one for our worship. When we gather together and one person de pray, we and other brothers and sisters de listen to the same thing. (Acts 1:14; 12:5) So when we join other brothers and sisters answer “amen,” this one de make us dey as one more-more. When we say “amen” together whether we talk-am loud or we talk-am for our heart, this one na another reason wey fit make Jehovah answer our prayer.

We de praise Jehovah. Jehovah de see all the things wey we de do for our worship. (Luke 21:2, 3) E de see everything wey e dey for our heart, wetin we de think, how we de feel and the reason why we de do things. Even when our condition no allow us to attend meeting, and they connect us with telephone, make we dey sure say when we say “amen” Jehovah de hear-am. Our “amen” show say we de join our brothers and sisters to praise Jehovah.

We fit de think say our “amen” no get value. But no be so, e really get value. One Bible encyclopedia talk say, “just with this one word,” servants of God fit show say “they get strong believe, trust, and hope for their heart.” Make all our “amen” wey we talk de sweet Jehovah for ear.​—Ps. 19:14.