NGƐ Paulo be ɔ mi ɔ, a be mele pɔtɛɛ kɛ ha blɔ hiali, mohu ɔ, a kɛ melehi woɔ tlomi. Jamɛ a be ɔ mi ɔ, ke nɔ ko maa hia blɔ ɔ, e biɔ nihi kaa a le mele ko nɛ maa gu he nɛ e yaa a nɛ maa suɔ kaa e wo nihi lo. (Níts. 21:2, 3) Ke e ba kaa mele ɔ be he nɛ blɔ hialɔ ɔ yaa a sue po ɔ, e sɛɔ mi nɛ e ya kpleɔ si ngɛ blɔ ɔ nɔ, nɛ e woɔ mele kpa nɛ maa su he nɛ e yaa a.​—Níts. 27:1-6.

Mele kudɔli be be pɔtɛɛ nɛ a kɛ hiaa blɔ. Ke e ngɛ mi hluu loko a hiaa blɔ. Be komɛ ɔ, ke a na kaa kɔɔhiɔ mi tsake, aloo ke a na kaa kuakualabite ko ba ma abalaa a nɔ nɛ e ngɛ pɛe, aloo mele ko butu nɛ e he ní ɔmɛ ba pue wo ɔ nya a, a naa lɛ kaa okadihi nɛ a mawu ɔmɛ je tsɔɔ mɛ kaa a tsɛ̃ a blɔ hiami ɔ kɛ to. A mlɛɔ kɛ ya siɔ benɛ kɔɔhiɔ ma bɔni fiami kɛ ya he nɛ a yaa a loko a hiaa blɔ. Ke blɔ hialɔ ko na mele ko nɛ ma wo lɛ ɔ, e kɛ e tlomi bɔɔ nɛ e hɛɛ ɔ yaa mele si dami he ɔ, nɛ e mlɛɔ kɛ ya siɔ benɛ a maa fia adafi kaa be su nɛ mele ɔ maa hia.

Yi nɔ sane ngmalɔ ko nɛ a tsɛɛ lɛ ke Lionel Casson de ke: “Ngɛ Roma a, a to blɔ nya konɛ blɔ hiali ko gbo dengme kɛ hla mele nɛ a kɛ maa hia blɔ. Roma mele si dami he ɔ ngɛ Tiber Pa a nya. Meletsɛmɛ fuu ngɛ ɔfisihi ngɛ Ostia ma a mi, nɛ lejɛ ɔ kɛ Tiber Pa a nya kɛ we. Meletsɛmɛ nɛ a je Narbonne nɛ ji France ngɛ ɔfisi ngɛ lejɛ ɔ, meletsɛmɛ nɛ a je Carthage nɛ ji Tunisia hu ngɛ eko, kɛ meletsɛmɛ kpahi fuu a nɔ́. Ke blɔ hialɔ ko ngɛ mele ko hlae nɛ e maa sɛ mi ɔ, e sa nɛ e ya bi si ngɛ ɔfisi ɔmɛ konɛ e hyɛ kaa e maa na eko nɛ maa gu he nɛ e yaa a lo.”

Blema a, wo nɔ blɔ hiami sɔɔ, se a kɛ oslaahi fuu hu kpeɔ. Kaa nɔ hyɛmi nɔ́ ɔ, benɛ Paulo hia blɔ kɛ ya fiɛɛ ngɛ mahi fuu a nɔ ɔ, e kɛ mele butu si abɔ.​—2 Kor. 11:25.