Pawˇluˆ˗euˬ saˇ ka˗ahˇ tsawˇ haˬ tawˬ ha dzaˬ˗eu saˇ baoˬ maˬ jaˆ˗a siˬ. Teu miˇ neh saˇ baoˬ˗ahˇ neh iˇ mawꞈ naˇ, yawˬ ha iˇ˗eu paw iˇ˗eu myawˬ tawˬ ha˗eu saˇ baoˬ aˬ geu mawˇ jawˇ nga lehˇ aˬ cawˬ˗ahˇ ya naˇ haˬ˗eu meh. Jawˇ naˇ oe caw nya meh laˬ lehˇ jiˇ ya naˇ haˬ˗eu meh. (Gʼaˬkʼehˇ 21:2, 3) Doˆ iˇ˗eu saˇ baoˬ deuˬ yawˬ ha iˇ mawꞈ gaˇ iˇ˗eu maˬ ngeuˇ kʼawꞈ, saˇ baoˬ teu gaˇ neh iˇ caw gʼeh˗awˇ, gaˇ pehˇ˗ahˇ saˇ baoˬ naˬ duˬ˗ahˇ naˬ leˇ ngeh cehˆ ka˗eu meh. Kʼoeˇ naˇ aˬ yawꞈ iˇ mawꞈ˗eu paw pyawˬ˗ahˇ iˇ peh˗eu saˇ baoˬ nyaˆ taˆ tiˬ laˇ˗ahˇ paˇ dziˬ paˇ˗eu meh.—Gʼaˬkʼehˇ 27:1-6.

Saˇ baoˬ neh cah˗eu heu naˇ, tiˬ kʼoꞈ˗euˬ laꞈ kʼoeˇ yaw yamˬ na luꞈ˗ahˇ cah nya˗eu lehˇ maˬ ngeuˇ˗a. Saˇ baoˬ kʼaˇ noeˬ taˬ˗euˬ yamˬ˗ahˇ iˇ nya˗eu lehˇ jiˇ maˬ ngeuˇ˗a. Teu naˇ uˬ jeˬ uˬ yehˇ baˬ da neh tehꞈ maˬ ngeuˇ˗a. Yaw jeˬ ma jeˬ, aˬ yawꞈ maꞈ saˇ baoˬ kʼoeˇ taˆ awꞈ˗aꞈ˗euˬ teˇ saˇ ya gaˬ naˇ maˬ ehˇ, saˇ baoˬ pyaˆ iˇ taˬ˗euˬ gaˇ ya mawˇ naˇ maˬ ehˇ, saˇ baoˬ˗ahˇ gaˇ mˇ˗eu deuˬ maˬ doˆ iˇ ni jawˇ˗eu meh. Aˬ myah myah naˇ saˇ baoˬ˗ahˇ gaˇ mˇ˗eu deuˬ iˬ ma laˆ shaˆ˗euˬ jaˬ lehˇ˗ahˇ gʼoe˗awˇ cah˗eu meh. Teu miˇ neh aˬ yawꞈ maꞈ jaˬ lehˇ yaw tsaˬ tsaˬ˗ehˇ baw ngeh tehꞈ˗ehˇ luˆ iˇ˗eu meh. Gaˇ ma doˆ iˇ˗eu deuˬ, aˬ yawꞈ iˇ caw nya˗eu saˇ baoˬ poˆ mawˇ gʼaˬ naˇ, myawˬ deuˬ lehˬ hmˬ˗awˇ saˇ baoˬ dawˬ peh ya dawˬ leˇ˗eu meh. Saˇ baoˬ doˆ iˇ˗eu gʼeh naˇ, guˇ gaˬ˗eu meh.

Gaˇ hu˗euˬ gaˇ kawˆ˗ahˇ poˆ tseˇ˗eu Laiˇoˬ Kehˇsahˬ ehˇ˗eu, “Loˇmaˆ meuˬ naˇ gaˇ ma doˆ iˇ˗eu saˇ baoˬ poˆ mawˇ˗eu yaw awˬ meh. Loˇmaˆ meuˬ˗euˬ saˇ baoˬ naˬ duˬ Taiˇbeuˬ lawˇ baˬ gaˇ dzeˇ jaˆ˗eu meh. Saˇ baoˬ naˬ duˬ dawˬ peh jaˆ˗eu Awˇsaꞈ˗tiꞈ˗ya meuˬ˗ahˇ deh ga ga ma jaˆ˗awˇ, teu˗euˬ tiˬ jawˬ saˇ naˇ jaˆ jawˬ taˬ˗euˬ meh. Saˇ naˇ heu deuˬ naˇ, saˇ baoˬ naˬ duˬ nui gaˇ neh oe˗euˬ myawˬ deuˬ˗ahˇ, saˇ baoˬ˗ahˇ neh nui gaˇ paˇ sha tawꞈ˗eu deuˬ˗euˬ saˇ naˇ pyeuꞈ meh. Yaw jeˬ ma jeˬ, myawˬ gahˬ heu deuˬ naˇ, Naˇbaoˬ [nymˬ˗mˇ iˬ nah Paˇlaˬ miˇ kʼahˬ˗ahˇ jaˆ] Kaˇteˬ˗ciˬ [nymˬ˗mˇ iˬ nah Tuꞈniˇsiˬ˗yaˬ miˇ kʼahˬ˗ahˇ jaˆ] . . . hawˇ˗eu nui gaˇ˗euˬ saˇ baoˬ naˬ duˬ deuˬ˗ahˇ neh jiˇ oe˗euˬ meh. Iˇ caw mawꞈ˗eu deuˬ, saˇ naˇ teu deuˬ˗ahˇ ya naˇ haˬ leˇ˗awˇ, aˬ geu geuˇ meuˬ˗ahˇ paˇ naˬ iˇ deˬ siˬ lehˇ jiˇ ya naˇ haˬ˗eu meh.”

Saˇ baoˬ neh cah˗eu heu naˇ, aˇ yamˬ yaw kʼaˆ˗ehˇ maˬ ga leˇ˗eu nmˇ ngeuˇ kʼawꞈ, guˆ laˇ paˬ˗ehˇ jiˇ gʼeh˗eu meh. Pawˇluˆ miˇshaˬnaˬliˬ geuꞈ˗awˇ saˇ baoˬ˗ahˇ neh cah ngeh, saˇ baoˬ˗ahˇ˗euˬ shaˬ zahˬ yaw myaˬ poˆ tahˬ puˬ haw˗euˬ meh.—2 Gawˇliˬtu 11:25.