ЭЛЧИ Павелдиҥ ӧйинде улус тартатан керептер болбогон. Оныҥ учун јорыкка чыккан кижи керектӱ јерине барарга, кош тартар керептердиҥ кажы бирӱзи барар ба, улус алар ба деп, сурулап угуп алатан (Ап. ижи 21:2, 3). Кереп кижиниҥ баратан јерине јетире барбайтан да болзо, јорыкчы тӱҥей ле ого отурып, јолой кереп токтоор ӧскӧ портко тӱжӱп, ӧскӧ керепке отурып алар аргалу болгон. Анайып, кижи амадап турган јерине јууктай једип алатан (Ап. ижи 27:1—6).

Талайла келишкен ле ӧйдӧ јорыктаар арга болбогон. Анайда ок керептер графикле јӱрбеген. Керептер јаҥыс ла кӱн-аай јаман болзо эмес, је байланчак талайчылар кандый бир ырым-белге кӧрӱп ийзе, талайга чыкпас болгон. Темдектезе, талайчылар керептиҥ армакчыларына карган отурып, каактап турза эмезе талайдыҥ јарадында керептиҥ сынган оодыктарын кӧрӱп ийзе, тӱбек болор деп байланып туратан. Анайда ок салкын керептиҥ јӱзерине удура согуп турза, якорьды кӧдӱрбейтен. Јорыкчы једерге турган јерине баратан керепти табып алала, бойыныҥ тудунчагын алып, бухтага јууктай келип, керептиҥ атанарын сакып туратан.

Лайонел Кассон деп тӱӱкичиниҥ бичигениле: «Римниҥ порты Тибр сууныҥ талайга кирген јеринде турган. Порттыҥ јанында Остия деген кичинек калада јаан тепсеҥ болгон. Ол тепсеҥди эбире конторалар турган. Бу конторалардыҥ кӧбизи башка-башка порттордогы керептердиҥ ээлериниҥ болгон. Темдектезе: Нарбон [эмдиги Францияныҥ јери], Карфаген [эмдиги Тунистиҥ јери], оноҥ до ӧскӧ порттор. Бу конторалар Римдеги јорыкчыга керектӱ керепти таап аларга болушкан. Јорыкчы контораларга кирип, кереп кандый порттордо токтоорын билип алар аргалу болгон».

Талайла јорыктаарга тӱрген де болзо, је јеткерлӱ болгон. Темдектезе элчи Павелдиҥ миссионер јорыгында јӱзӱп јӱрген кереби оодылган учуралдар јаҥыс катап болбогон (2 Кор. 11:25).