I RUNDI ma jakwenda Paulo ukwo i ie, meli m’ubed uyeyo dhanu kende ubino mbe. Ka ng’atu moko umito wotho ku meli, ubed ukwayu epenj dhanu mange ka nyo giwinjo pi meli moko ma yeyo ther ma bicidho kaka m’emito cidho i ie man ka nyo gicopo maru giyei bende dhanu. (Tic. 21:2, 3) Kadok nwang’u ng’atini uidho meli m’ubecidho ngo kaka m’emito cidho i ie de, kinde ma meline ubewotho loro ther i dhu wat ma tung’ tung’, ecopo woidho meli mange m’ucidho kaka m’ebemito cidho i ie.​—Tic. 27:1-6.

I kind oro, saa moko bino nuti ma meli ubed uwotho ngo i ie, re gibed gilubo ngo program ma tap mi woth. Badereva moko gibed giranyu woth migi ka yamu utuk, ento lembe mi weco ku tipo bende ugam uketho gibed giranyu woth. Ku lapor, ka ginwang’u nia girombo rac, calu ve ka gineno ungoro moko ubin upiei iwi meli man ecaku bewak, kunoke giwok gineno asamba meli moko m’ung’eny i dhuwat. Gibed gineno bende the polo, pieno ka yamu ubekoto ma ber, gicaku woth. Ka ng’atu m’ucidho i wot unwang’u meli ma copo tere kaka m’ecidho i ie, ecidh ebedo ku ther pare i dhuwat kinde m’ekuro saa ma gibicoko ie woth.

Jakor kpawa moko ma nyinge Lionel Casson uyero kumae: “Ng’om mi Roma ubed ugiero dhuwat i ayi ma konyo dhanu ninwang’u meli yot yot, eno uketho dhanu gibed gicidh gisayu ngo meli gigi i dhu wat. Ng’ombe bino ku dhuwat ma dit i dhu kulo mi Tibre i adhura mi Ostia. Adhurane ubino ku kabedo ma lac man biro ma tung’ tung’ i ie. Ebino biro mi badereva mi dhuwat ma tung’ tung’: biro mi badereva mir adhura mi Narbonne (France), mi Carthage (Tunisie), ku mir adhura mi ng’om mange bende. Pieno, ng’atu m’ubesayu meli ubed ucidho i biro maeno man enwang’u meli ma copo there kaka m’ecidho i ie.”

Woth ma ku wi pii ubed ucamu ngo saa akeca, ento ebino bende kud ariti i ie. Jakwenda Paulo utuc nioi i nam wang’ ma pol kinde m’ebino wotho i tic mi misioner.​—2 Kor. 11:25.