I DILO di Paul, bisitima bi bi bé begee ndik bôt bi bé tôl bé. Inyu ke liké ni sitima, bake liké ba bé lama bat bôt bape ibale ba bé yi ngim sitima i yé bebee i ke i het ba bé ke, ni ibale i bé le i yoñ bôt. (Minson mi baôma 21:2, 3) To ibale i sitima i, i bé ke bé i het mut maké a bé ke, a bé le a yoñ yo inyu boñ le i téé nye i homa bisitima bi bé bomna, ha nyen a bé le a yoñ sitima i i bé ke i mbok yé.​—Minson mi baôma 27:1-6.

Maké ma Tuye ma bé bôña bé hiki ngéda ikété nwii, baluk bisitima ba bééna bé ngim ngéda i tôbôtôbô inyu nyodi. U héya ngéda ngii i bé ibe, basal i sitima ba ba bé hémle bisat ba bé buuha nyodi ibale ba nhoñol le béba jam i nla gwéla, kiki bo ngéda boboñ a nlo a bedep i nkôô wada u sitima, ndi a kahal kwai, tole ibale ba ntehe bipes bi sitima ipe bi nleñel i lép. Ndi ngéda basal i sitima ba bé tehe le ngii i yé loñge, ba bé jôp i njel. Ngéda nke liké a bé a léba sitima i nkena nye, a bé a ke libôñ ni mbegee yé inyu bem ngéda sitima y’a nyodi.

Mut miñañ wada le Lionel Casson a nkal le: “Tison i Rôma i bi yoñ ngim bitelbene inyu hôla bôt i léba sitima i yé bebee i ke ibabé le ba tumbba ngandak. Libôñ jé li bé i homa Lom Tiber a nsul i Tuye. Tison i Ôstia i i bé ha ipañ, i bééna likanda likeñi jada, i het ngandak minloñ i bé bomna, i bak nkiiñaga ni mandap. Ngandak mandap mu i bé bahoma ba nyôñôl tikét inyu ke liké ni njel tuye: Yada i bé ha inyu bôt ba bé ke i Narbonne [hala wee i loñ Pulasi i len], ndap ipe i bé inyu bôt ba nke i Carthage [hala wee i loñ Tunisia i len], . . . hala ni hala. Ngéda mut a bééna ngôñ i ke liké ni njel tuye, a bé lama ndik bat tikét mu mandap ma bé mu njel yé.”

Maké ma tuye ma bé hôla bake liké i hoo pam, ndi yak mo ma bééna map mandutu. Mu maké ma nyen Paul a bi kwo i tuye ngandak ngélé.​—2 Korintô 11:25.