DI TINGKI ni si Paulus, ndang adong kapal na holan mamboan penumpang. Asa boi sasahalak manompang sian kapal, ingkon disungkun ibana do tu halak na asing atik boha adong diboto nasida kapal barang na naeng laho tu inganan na laho dituju jala olo mamboan penumpang. (Ul. 21:2, 3) Alai sipata, olo do ndang adong kapal na langsung tu inganan na laho dituju i. Alai dung sahat kapal i di tujuanna, boi do muse dilului kapal na asing na naeng tu inganan na laho dituju.​—Ul. 27:1-6.

Ndang adong jadwal naung ditontuhon andigan kapal borhat. Olo do gabe ndang saut kapal i borhat molo ndang denggan cuaca. Jala, adong do piga-piga pelaut na porsea tu takhayul. Molo adong diida nasida pidong sigak na mangkuling manang diida nasida puing-puing ni kapal di topi ni laut, ndang jadi nasida borhat. Jala molo diida nasida ndang gogo alogo, baru ma borhat nasida. Asa boi dapot ni sasahalak kapal na olo mamboan penumpang, ingkon laho do ibana tu pelabuhan jala diboan ma barangna. Dung i, ingkon dipaima do adong boa-boa na mandok na laho borhat kapal i.

Sahalak sejarawan na margoar si Lionel Casson mandok, “Di Rom, dibahen do cara asa mura halak mangalului kapal. Di pinggir ni sunge Tiber do pelabuhanna. Di jonok ni kota Ostia, adong do lapangan na balga jala adong angka kantor pengiriman barang disi. Di kantor i ma angka pengirim barang paturunhon barang ni nasida. Umpamana, angka kapal sian Narbonne [saonari on adong di Prancis], kapal sian Kartago [saonari on adong di Tunisia], dohot na asing. Angka halak na naeng laho tu angka kota i boi do manungkun tu angka kantor i laho mamboto adong manang ndang kapal na borhat.”

Hatop do pardalanan sian laut, alai godang do bahaya na boi masa. Tingki gabe misionaris si Paulus, hea do piga-piga hali lonong kapal na ditompang ibana.​—2 Kor. 11:25.