AKOTO Pɔlu blɛ su’n, mmeli nga be fa sran mun kɔ lika’n i wie nunman lɛ. Blɛ sɔ’n nun’n, trɔ ngunmin yɛ mmeli’m be sua-ɔ. Ɔ maan, sɛ sran kun waan ɔ́ fá mmeli kɔ́ lika’n, ɔ usausa sran mun sɛ aata difuɛ’m be mmeli wie o lɛ m’ɔ su fa trɔ kɔ́ lika sɔ’n nun o. (Yol. 21:2, 3) Kannzɛ nán lɔ trele yɛ mmeli’n su kɔ’n, ɔ kwla fu nun. Kpɛkun kɛ mmeli’n ko ju klɔ kun su’n, ɔ kwla kunndɛ mmeli uflɛ m’ɔ kwla fɛ i mantan lika ng’ɔ su kɔ’n i wun koko’n.—Yol. 27:1-6.

Blɛ sɔ’n nun’n, nán blɛ kwlaa nun yɛ mmeli’m be sin-ɔn. Kusu ɔ leman cɛn nin dɔ trele kun mɔ mmeli’m be kɔ lika-ɔ. Sɛ nzue’n tɔ dan’n, annzɛ kusu aunmuan fita dan’n, mmeli kanfuɛ’m be tu cɛn sie. Wie liɛ kusu’n, sɛ be wun kɛ anunman kɔkɔkuankuan kun ti mmeli’n i ti su naan ɔ su kpan’n, annzɛ sɛ be wun mmeli bue wie nzue’n nuan lɛ’n, be tu cɛn be sie wie. Afin be waan sɛ be kɔ’n, ɔ cɛman naan sa w’a ɲan be. Sɛ be wun kɛ wafa nga aunmuan fita’n ɔ su kleman be yalɛ’n, kpɛkun be su kɔ. Kɛ sran kun m’ɔ kunndɛ kɛ ɔ́ kɔ́ lika’n, ɔ ko wun mmeli ng’ɔ kwla ti i wun ɲanman nun’n, ɔ fɛ i trɔ’n ko minndɛ mmeli’m be jranwlɛ lɛ. I liɛ’n, sɛ sran’m be kpan kɛ mmeli’n su kɔ’n, ɔ kwla ti.

Be flɛ bian kun kɛ Liɔnɛli Kasɔn. Ɔ suan laa sa’m be su like. Ɔ seli kɛ: “Rɔmun klɔ’n su lɔ’n, mmeli’m be jran nzue ba nga be flɛ i kɛ Tibɛɛ’n i nuan lɛ. Ɔ maan, sɛ sran kun waan ɔ́ kɔ́ lika’n, ɔ kɔ lɔ trele ko fa mmeli. Ɔ wlanman lele. Asa ekun’n, klɔ nga be flɛ i kɛ Ɔsitia’n su’n, be kplannin biolo kpanngban kpa lɔ. Biolo sɔ’m be dan lika be nun’n, be fali mmeli jranwlɛ kwlakwla nga be o klɔklɔ’m be su’n, be nun sran kun sieli nun. I wie yɛle mmeli jranwlɛ ng’ɔ o klɔ nga be flɛ i kɛ Naabɔnun’n su’n. Ɔ o Aflansi nvle’n nun. Mmeli jranwlɛ kun ekun o klɔ nga be flɛ i kɛ Kaatazi’n su’n. Ɔ o Tinizi nvle nun. Ɔ maan kɛ sran kun waan ɔ́ kɔ́ klɔ kun su’n, ɔ kɔ klɔ sɔ’n i biolo’n nun trele.”

Be nga be fu mmeli nun be kɔ lika’n, be ju ndɛndɛ. Sanngɛ sa sunman kwla ɲan be. Kpɛ sunman kɛ akoto Pɔlu kó dí i junman’n ɔ fuli mmeli’n nun. Blɛ sɔ sunman nun, mmeli ng’ɔ fuli be nun’n, be nun wie’m be sacili i bo.—2 Kor. 11:25.