SA PANGKAGABSAN kan panahon ni Pablo, mayo kaidto nin mga barko na pampasahero sana. Tanganing makahanap nin masasakayan na barko, sa parati mahapot sa iba an mabiyahe kun may aram sindang barkong pangkargamento na pasiring sa direksiyon na dudumanan niya asin na gustong magpasakay nin mga pasahero. (Gibo 21:2, 3) Dawa kun an barko bakong pasiring sa eksaktong destinasyon kan mabiyahe, sa mga duungan na pupunduhan kan barko, puwede siyang maghanap nin ibang barko na madara sa saiya harani sa destinasyon niya.—Gibo 27:1-6.

An pagbiyahe sa dagat sa parati may panahon lang, asin mayong espesipikong iskedyul na sinusunod an mga barko. Apuwera sa maraot na kamugtakan nin panahon, puwedeng iatraso nin superstisyosong mga marinero an paglayag kan barko kun makahiling sinda nin signos, arog kan naghuhuning uwak na nakatugdon sa mga pisi kan layag, o kun makahiling sinda nin naraot na barko sa may baybayon. Pag mahiling kan mga tripulante na tama an direksiyon kan duros, aaprobetsaran ninda iyan asin malayag na. Kun makahanap na nin barko an mabiyahe, maduman siya sa duungan dara an bagahe niya asin hahalaton an anunsiyo na madali nang maglayag an barko.

“Nagtatao an Roma nin kumbenyenteng serbisyo na paagi kaiyan dai na kaipuhan kan mga tawo an nakakapagal na pagparalakaw sa duungan,” an sabi kan historyador na si Lionel Casson. “An duungan kaiyan nasa bukana kan Tiber. Sa kaharaning banwa nin Ostia igwang dakulang piazza (plasa) na napapalibutan nin mga opisina. Dakul sa mga opisinang ini an sadiri nin mga marinero na representante kan manlain-lain na duungan: may saro para sa mga marinero kan Narbonne [Pransia na ngunyan], may saro para sa Carthage [Tunisia na ngunyan], . . . asin iba pa. Pag may gustong magbiyahe sa barko, maduman lang siya sa mga opisina kan ano man na siyudad na nasa ruta niya.”

Nakakamenos nin panahon an pagbiyahe sa dagat, pero may mga peligro man iyan. Nagkapirang beses na nakaeksperyensiya si Pablo nin paglubog nin barko sa mga pagbiyahe niya bilang misyonero.—2 Cor. 11:25.