RO FAFISU Paulus ḇyedi, ro moḇ ḇeborna kapal nomankunḇa fa nun kawasa sya. Inja snonkaku oso imbe rya farma ido, fandun fa ifuken ḇe snonkaku ḇesesya kapal ḇeyaḇyaḇen oso isya imbe dayun ke oroḇa. Ifuken kapal ani imbe ryaḇe moḇ ryamura ani ma kapal ani imbe dun snonkaku ke oroḇa. (Farfyar 21:2, 3) Kapal ani nari ryaḇe moḇ ryamura ani ḇa yo, na iso kapal ani fa dado ro pelabuhan moḇ kapal ani imbe imnai ma ipyar ro ya. Inja, fandun fa dado ma syewar kapal ḇese nower fa duni ḇe moḇ imbe ryamura ro na.​—Farfyar 27:1-6.

Kapal nane nayun ro paik nakam ḇa. Fyorno ido, sfadwer ker jadwal kapal nane. Snaro sup na nḇewame, ma ḇeyun kapal ansine simewer sisae snaro sikyar famfnom faro farfyar ḇekaku ḇa. Raris, smam manwawa oso kyain ro kaḇrai ḇefes ayun na ḇaido smam kapal ḇeḇyeḇa oso ider ro yenandire, nari sayun ḇa. Ḇeyun kapal ansya smam kako wam ya, wam iso pyum ido nari sayune. Fyor snonkaku oso ifawi kapal oso isya imbe dayun ḇe moḇ ryamura rona, nari iḇyaḇen robor ḇyena kam ḇe pelabuhan ani, ramnai iwaf abar ras risai kapal ani na dayun ya.

Manfawinanem sejarah oso ḇenir ḇe Lionel Casson ikofen, ”Ro Roma sifrur jadwal kapal inja kawasa imbe ḇeso sya sisewar awer kapal risai ḇeyayun ya. Pelabuhan ḇyeja isya ro War Tiber weri. Ro Kota Ostia pasar oso isya ma kantor-kantor naisya ro dia kako. Kantor-kantor nane naiso cabang ro perusahaan kapal na. Raris, perusahaan Narbonne [kirine sap i ḇe Prancis] nya kantor oser ro dia, perusahaan Kartago [kirine sap i ḇe Tunisisa] kako nya kantor oser, . . . ma eḇesena kako. Snonkaku ḇembran farma sya bisa smam jadwal kapal ro kantor nane monda, kapal oso isya dayun ḇe moḇ imbe sramura rona ke roḇa.”

Sayun kuker kapal inema nun swaf mankenem ḇa, ḇape samswen naisya kako. Ro marandan ḇyeja ḇe utusan injil, kali ri ḇeḇeso kapal Paulus iso anya iḇyeḇa ma imbrure.​—2 Kor. 11:25.