LONG taem blong aposol Pol, i nogat ol sip we oli stap tekem ol pasenja. Taswe blong wan man i tekem sip, hem i mas askem ol narafala sipos oli save wan kago sip we stap go long ples we hem i wantem go long hem, mo sipos oli glad blong tekem sam pasenja. (Wok 21:2, 3) Nating sipos sip ya i no go long ples we man ya i wantem go long hem, be yet, weples we sip ya i stop long hem, man ya i save jam long wan narafala sip we i stap go long ples we hem i wantem go long hem.—Wok 27:1-6.

I gat ol stret taem long wan yia we ol sip oli stap travel, be plante taem oli nogat wan stret program. Maet from we weta i nogud, o samtaem oli gat ol narakaen tingting, olsem taem oli luk pijin ya reven i stap singaot antap long rop we i holemtaet sel blong sip, o oli luk wan sip i rek long soa, oli bilif se wan nogud samting i save hapen long olgeta. Plante taem ol man blong sip oli travel taem weta i gud. Afta we wan man i faenem wan sip we i save tekem hem, hem i tekem ol ting blong hem mo i go wet klosap long wof, kasem taem we oli talem se bambae sip i aot.

Wan man blong histri, nem blong hem Lionel Casson i talem se: “Taon blong Rom i mekem i isi long ol man blong oli faenem wan sip we oli save go long hem, mo oli no nid blong hadwok blong lukaotem wan sip we i stret. Wof blong hem i stap long maot blong reva ya Tiber. Long wan open ples klosap long taon blong Ostia, i gat fulap ofis. Plante long ol ofis ya oli blong ol man we oli stap tekem ol kago i go long ol defren ples: i gat ofis blong kago blong Narbonne [we tede hemia Franis], wan narafala wan hemia ofis blong kago blong Carthage [we tede hemia Tunisia], . . . mo plante moa bakegen. Mo eni man we i wantem travel, i jes nidim blong i go pas long ofis blong taon we hem i wantem go long hem.”

Ol man blong sip oli sevem taem blong ol man we oli travel, be samtaem i gat trabol. Plante taem, Pol i stap long ol sip we oli rek, taem hem i travel blong mekem ol misinari trip blong hem.—2 Kor. 11:25.