KA timbimo ta Paulo ku ti si maneki sitimela so teka vathu dwe. Ti to m’thu e mana kuenda ngu txitimela a ti fanete kuziva mwendo kuwotisa ku ina txitimela txi txi pakelako simaha txi txi ya ka wukhalo wu m’thu a yako ka wona ni ku ina va tumela kuteka vathu kani. (Mith. 21:2, 3) Hambi i di to txitimela txo kari txi si hoki a mu m’thu a yako kona, ene a ndi na txhika sitxhini se e gwita e mana tximwani txitimela.—Mith. 27:1-6.

I si nga yotshe mbimo sitimela si nga ti tsimbila. Ku ti ni sivangelo so tala so fana ni matxelo, va tsimbitisi va sitimela va ti thindeka kuenda ngako va txi wona to maha to singita to fana ni digwana di txi emba di di txitimwi ka phande ya ditanga, mwendo kuwona txitimela txi txi nga dhibha. Vona va ti londola mbimo yi kupekako moya, se ngako wu txi peka didhawa da dinene ngu kona va nga ti tsimbila. Ngako m’thu se a di mani txitimela txi txi nga txi ya amu a nga tiya kona, a ti tsula txititxhini ni simaha sakwe e rinzela mbimo yi txi khukhako.

M’gondi mmwani a dhanwako ku i Lionel Casson a khene: “Didhoropa da Roma di ti ni nzila yo hehuka to m’thu e mana txitimela kasi ku e enda. Dibeleloni ka sitimela ku ti maneka ka mnambo wa Tibre hafuhi ni linene. Ka Didhoropha da Óstia ku ti ni ni ma hofisi. Ma hofisi o tala ma ti lumba vatsimbitisi va sitimela a makhalo o hambana-hambana o fana ni o ta ngu Narbonne [konkuwa i ku França] vamwani vo ta ngu Carthage [konkuwa i ku Tunísia]. Awule a nga ti lava kuenda ti txo lava e wotisa ka ma hofisi a wukhalo wu a yako ka wona dwe.”

Hambiku kuenda ngu mabhoti ku nga ti popara mbimo, kambe ku ti ni phango. Makhambi o tala Paulo a mananile ni kudhibha ka maendo akwe kota murumiwa.—2 Vak. 11:25.