LÓN fansoun aposel Paulus we, ese kan kon wor ekkewe sókkun siip sein uwou chón sái. Iwe, ren ar repwe sái wóón siip, ra kan eisfetál ika a wor ié a silei efóch siip epwe sái ngeni ewe leeni ra ekiekin ló ia, me ika ena siip a tongeni uwou pasisé. (Föf. 21:2, 3) Inaamwo ika efóch siip esap ló ngeni ewe leeni ewe chón sái a mochen ló ie, nge ika ena siip epwe inelóng lón ekkewe pwal ekkóch leenien inen siip, iwe ewe chón sái epwe tiwetiw me kútta pwal efóch siip epwe fitaaló kane ngeni ewe leeni a mochen lo ie.​—Föf. 27:1-6.

Fán chómmóng a fen wor án ekkewe siip schedule ren fetálin ar sái lón eú me eú ier nge saminne epwe ffat ránin me kulókun ineet epwe su. Epwe tongeni mmangóló ren ngawen rán, are ren án ekkewe sááló lúkú pwe repwe tongeni mwiringaw lón ar sái ika ra kúna och esissil, áwewe chék ren án emén ángá kóikói me wóón senin amaraan ewe siip, are ar kúna efóch siip a ta oroset. Ika ekkewe sááló ra kúna pwe a éch ásepwál, iwe repwe chék su. Ren án emén chón sái epwe kúnékún waan siip, epwe ló ngeni ewe leenien tokku fán pisekin kewe, me witiwiti esilesilen án efóch siip epwele su.

Iei met emén souuruwo itan Lionel Casson a erá: “A wor án chón Rom kókkót mi ámecheresi án aramas kúnékún siip repwe tongeni fiti. A wor ar leenien inen siip mi nóm lesopunchikin ewe chénúpupu Tiber. A wor eú sóópw itan Ostia mi kkan ngeni ena leenien inen siip nge a mmen watte ewe leeni lón mi amasawa me chómmóng ofes únúkkún. Chómmóng me lein ekkena ofes, iir ofesin ekkewe siip repwe sái ngeni ekkewe sókkopaten leenien inen siip. Áwewe chék, a wor ofesin ekkewe siip sein ewe telinimw Narbonne [lón Franis iei], pwal ofesin ekkewe siip sein ewe telinimw Carthage [lón Tunisia iei] me pwal ekkóch ofesin siip. Emén chón sái epwe chék ló ngeni menni ofesin siip epwe ssá ngeni ewe leeni a ekiekin ló ie.”

Án aramas fiti siip a tongeni emwittiri án emén sái, nge mi pwal wor efeiengawan. Fán chómmóng, a unusen ta ewe siip Paulus a fiti atun a sái lón an angangen misineri.​—2 Kor. 11:25.