MASAKA a murumiwi Paulo kaliwo paporo wattukula attuvi bahi ninga ovanene. Wi muttu akose oleddo na paporo, yanfuneya aavuzege attu ena, akala anomuziwa paporo oli na mittorho obe na marhondda wafuna odhowana wego ondowiye vina akala agahattukula attu. (Mer. 21:2, 3) Akala paporoya kadhowa onfuna odhowa muttuya, iyene wampakirha mpaporoni wi atite vazambuwoni vansama apaporo ena wi amusakulevo mwina ondowa epaddi eniwanana na oleddo waye.—Mer. 27:1-6.

Oleddo wa mbara wankaana masakaya, mbwenye mapaporoya kana matadelo avaha moonelo wa masiku a wedda. Dila dhina, oleddoya wantxinjiwa sabwaya ya otagala obe masarhapitto. Motagiha, akala amwazambo elo omoona nyakungu akuwaga vadhulu va paporo obe akala elo omoona paporo wogujuwa nikome abo ali masarhapitto. Mwa mpaddi mwina agoona pevo edhowaga epaddi enfunani awene ampakirha momaguva. Attu agamoona paporo wafuna okosa oleddo awene ammaga mittorho dhawa battiya va gombe ajedhelaga mukuwo wa mwazambo waloga wi paporo onfuna ovenya.

“Nsaka nttile muttette wa Roma wahikala masasanyedho ohirutxa a onfwanya paporo wokosana oleddo momaguva”. Namaleba dhopadduwa Lionel Casson Ohiloga: “Zambuwo ya Roma yakala vamavolowelo va mwinje wa Tibre. Waddamela kwatti ya Óstia vahikala mburo munddimuwa vina kambirhinya dhinjene dha mabasa. Kambirhinya esi anyaya ankana mittorho dhadhowanani zambuwo dhinjene: Mittorho dhina dhadhowa o Narbonne [ovanene enittaniwa França] dhina dhadhowa Cartago [ovanene enittaniwa Tunísia]. Muttu-muttu wafuna okosa oleddo wanfwanyela oroma ovuzela kambirhinya dha kwatti dhina akala mittorhodha dhindowa epaddi enfuna iyene odhowa.”

Muttu wanwodha okosa oleddo na paporo momaguva, mbwenyi dila yina wangumanana makattamiho. Murumiwi Paulo dila dhina wahifwanyiwa ngovi muleddoni mwaye wa omisionario.—2 Kor. 11:25.