TIʼ yorajlel Pablo maʼan barco tac cojach bʌ miʼ pʌy majlel quixtañujob. Juntiquil quixtañu yom miʼ cʼajtin mi an jumpʼejl barco chaʼan bʌ cuchijel yaʼ bʌ mi caj i majlel baqui yom cʼotel i mi mucʼʌch i mejlel ti cujchel majlel (Hch. 21:2, 3). Anquese jiñi barco mach yaʼic miʼ majlel baqui yom cʼotel jiñi quixtañu, miʼ mejlel ti cʼʌjquel i miʼ jubel yaʼ baqui miʼ cʼotel, i cheʼ jiñi, miʼ sʌclan yambʌ muʼ bʌ i pʌy majlel cʼʌlʌl baqui yom (Hch. 27:1-6).

Jiñi barco tac maʼañic jumpʼejl ora bajcheʼ yom miʼ loqʼuel, jin jach miʼ melob cheʼ wen i yorajlel. Maʼañic miʼ loqʼuelob cheʼ an icʼ o jaʼal. Cheʼ jaʼel, an muʼ bʌ i ñopob cheʼ miʼ yʌjlel chaʼan an chuqui mach bʌ weñic miʼ caj ti ujtel i maʼañic miʼ loqʼuelob, jumpʼejl ejemplo, cheʼ miʼ tajob i qʼuel juncojt xʼacʼxiʼ woli bʌ i sub i bʌ yaʼ ti barco o i xujtʼil tac jumpʼejl barco yaʼ tiʼ tiʼ jaʼ. Jiñi xñijca barcojob ñuc i cʼʌjñibal i chaʼañob cheʼ wen jach bajcheʼ an jiñi icʼ chaʼan miʼ loqʼuelob. Jin chaʼan, cheʼ juntiquil quixtañu miʼ cʼotel i taj jumpʼejl barco mejl bʌ i pʌy majlel yomix miʼ chʼʌm majlel i cuch, i cheʼ jiñi miʼ pijtan chaʼan miʼ loqʼuel.

Juntiquil yujil bʌ chaʼan historia i cʼabaʼ Lionel Casson miʼ yʌl: «Roma wen chajpʌbil i chaʼan bajcheʼ miʼ mejlel i taj jumpʼejl barco juntiquil quixtañu chaʼan maʼañic miʼ boʼoyel i sʌclan. Jiñi barco tac yaʼan ti xʌcʼ jiñi jaʼ Tíber. Ti jiñi tejclum i cʼabaʼ Ostia an cabʌl oficina tac. I cabʌl tsaʼ bʌ cʼʌjñi chaʼan miʼ qʼuel jiñi barco tac muʼ bʌ i cʼotel ti Narbona [ili ora Francia], Cartago [ili ora Túnez], [...] i yan tac bʌ. Jiñi quixtañu cojach miʼ majlel yaʼ ti oficina i chaʼan jiñi tejclum tac baqui mi caj i majlel i miʼ cʼajtin».

Ti jumpʼejl barco orajach miʼ mejlel laj cʼotel ti baqui la com, pero añʌch i wocolel. Jiñi apóstol Pablo tsaʼʌch i wen taja wocol tac ti barco cheʼ bʌ tsaʼ ajñi bajcheʼ misionero (2 Co. 11:25).