AME ngöne lo hneijine i Paulo, pë palakö he nyine ati atr. Maine kola ajane hnene la ketre atr, troa tro kowe la ketre nöj, angeic a pane thele la he ka atë la itre ka salem, nge ka tro kowe la nöje cili, me sipone troa hane të. (Itre hu. 21:2, 3) Maine tha ka tro meköti kö la he kowe la nöje hna ajan, ngo ijije hi troa uti ngöne la ketre nöj, matre xome pena la ketre he.—Ite hu. 27:1-6.

Ame ngöne la macatre, hetre ijine kö tro la itre he a ea. Maine ka ngazo la drai, tha tro kö itre eje lai a tro. Nge the qaja palaha e hetre ewekë ka axouene la itre ka xomi he (superstition), tune la kola ho la halo, maine öhne pena la ketre he ka lö hë ekö. Tro pe angatr a treqene la kola hetre eny. Ame la kola kapa la sipo ne la ketre atr troa të hune la he, haawe, angeice hi lai a canga xom la trengetrenge i angeic me itreqe ngöne la hna xepe i he.

Öni Lionel Casson, ketre atr ka inamacan: “Ame ekö e Roma, hetre götrane kö hnë troa wai göhnë göi troa xomi he. Ame ngöne la traon e Ostie, ezine la hna xepe hnei he e Tibre, nyimutre la itre biero hna cilëne hnene la itre ka salem. Angatr a isa traqa qa ngöne la itre nöj. Itre xan qa Narbonne (Faras enehila), itre xan qa Carthage (Tunisie enehila), me itre xane ju kö. Ame la ka ajane troa tro kowe la ketre nöj, angeic a tro kowe la itre biero cili, me thele la he ka troa tro sai angeic kowe la nöje i angeic.”

Tru catre la eloine la itre he ke, ka nyimenyim. Ngo hetre ethanyine fe. Nyimutre ekö la itre he ka lö, tune la itre he hnei Paulo hna xom.—2 Kor. 11:25.