E SEGA na waqa ni usa pasidia ena gauna i Paula. Ni dua e via vodo waqa, ena vakatataro se waqa ni kako cava e gole ena vanua qori, ena rawa ni usa pasidia tale ga se sega. (Caka. 21:2, 3) Ke sega mada ga ni yaco na waqa qori ena vanua me lai sobu kina, ena vodo ga qai sobu ena vanua e kele yarayara kina me rawa ni vodo tale ena dua na waqa me yaco ena vanua e gole kina.—Caka. 27:1-6.

E tiko ga na gauna ni soko ena loma ni yabaki, e veiveisau tale ga na gauna. E tiko eso na ka e dau vakadaroya na soko, me vaka na draki ca kei na nodra vakabauta vakatevoro na dausoko. Kena ivakaraitaki, nira rogoca ni tagi na manumanuvuka na reveni ena dali ni laca, se ra raica ni kasa na waqa e baravi. Era dau vakayagataka vinaka na dausoko na kaukaua ni cagi. Ni cagidonu, era sa na biubiu sara. Ni dua e via vodo waqa, ena kauta na nona kato me lai waraka ena ikelekele ni waqa na kena kacivaki ni sa vakarau biubiu.

E kaya e dua na daunitukutuku makawa, o Lionel Casson: ‘Ni dua e via soko, ena rawarawa me lai vodo ena korolevu o Roma. Nira na sega ni vaqara waqa tale. E tiko na ikelekele ni waqa ena gusu ni uciwai na Tiber. E toka e yasana na tauni o Ostia e levu kina na valenivolavola. E levu na valenivolavola ni kabani ni waqa: na waqa ni Narbonne [o Varanise nikua], dua tale na waqa ni Carthage [o Tunisia nikua], . . . kei na levu tale. Ke dua e via vodo waqa, me lai taro ena valenivolavola ni waqa ni vanua e via lako kina.’

E vakabula gauna na vodo waqa, ia e rerevaki tale ga. Ena nona ilakolako vakaulotu o Paula, e voca vakavica e wai.—2 Kor. 11:25.