AN TAN a lapòt Pòl, pa gè té ni bato ki té la enki pou fè moun vwayajé. Si on moun té bizwen pran bato, fò i té chèché a sav si té ni yonn ka chayé mawchandiz ki té kay an menm dirèksyon ki-y é si komandan-la té dakò pou ni pasajé abò a-y (Akt 21:2, 3). Menmsi moun-la té asi on bato ki pa té kay ègzaktèman menm koté ki-y, i té pé désann adan on pò é chèché ondòt bato ki té’é menné-y pli pré a la i té kay la (Akt 27:1-6).

A pa té tout lanné-la sé bato-la té ka vwayajé é yo pa té ka rèspèkté on kalandriyé. Parapòt a on mové tan oben akòz dè kwayans a yo, délè sé matlo-la té ka désidé pran dépa a ondòt moman. Pa ègzanp, si yo té tann on kòwbo ki té an tèt a bato-la ka hélé, oben si yo té vwè ondòt bato échwé on koté, pou yo, sa té’é pòté-yo malè. Sé matlo-la té ka atann van-la vin bon pou yo té pati. Lè on moun ki té bizwen vwayajé té ka touvé on bato ki té byen vlé pran-y abò a-y, i té ka pran bagaj a-y, é i té ka atann toupré pò-la kè on moun di kè lè a dépa-la rivé.

On nonm ki èspésyalis a listwa yo ka kriyé Lionel Casson ka èspliké : « A Wòm, té ni on sèwvis pou sé moun-la pa té ni a touné-viré anlè sé ké-la pou touvé on bato. Pò a Wòm té anbout a flèv-la yo ka kriyé Lètib. Lè ou té kay Òsti, on vil ki té toupré, ou té ka touvé onlo biwo toutalantou a plas-la. Pawmi sé biwo-lasa, bon enpé sété biwo a moun ka fè transpò adan pò a diféran péyi : pò a Nawbòn (ki an Frans jòdijou), pò a Kartaj (ki an Tinizi jòdla), [...] é dòt pò ankò. Si on moun té ka chèché on bato pou i vwayajé, sèl biten i té ni a fè, sété ay pran enfòwmasyon adan sé biwo-la ki té ka korèsponn èvè sé vil-la ki té asi chimen a-y la. »

Lè ou té ka vwayajé an bato, sa té kay pli vit, men té ni danjé adan sa osi. Pannan vwayaj a-y antankè misyonè, a pa ni yonn ni dé fwa Pòl fè nofraj (2 Kor. 11:25).