PABLO näire ru nänkäre mrenbiti nitre ie ye ñaka nämäne. Ru jondron rürübäinkäre ye nämäne niken kä meden kokwäre aune raba niken nitre ngwena o ñakare ye nitre nämäne ngwentari (Hech. 21:2, 3). Kä meden kokwäre nitre nämäne niken yekänti ru ye ñaka nämäne niken, akwa nitre nämäne niken te aune ru ye nämäne nemen medente nünenkä yekänti nitre nämäne näin timo aune nämäne niken ru madate abokän nämäne niken niaratre ngwena nemen ja käite (Hech. 27:1-6).

Kä ruäre aibe te ru mrente ye nämäne niken aune ora nuäi te ru ye ngwan rabadre ye kräke kukwe ñaka nämäne ükaninte. Ye medenbätä, nitre ru mrente ngwanka ye ruäre ngwane, ñaka nämäne ru ngwen ñan kä nämäne käme ye aibebätä, ñakare aune kukwe ñaka kwin rabai bare nie nämäne kwetre, ñodre, nukwä cuervo nämäne ngwäne rubiti ngwane o ru nämäne niken ñöte nie nämäne kwetre. Murie nämäne ngösöi ye aibe ngwane nitre ru ngwanka nämäne niken ru ngwena, ñobätä ñan aune ye köböire niaratre nämäne ru ngwen kwin. Aisete ru meden näin niaratre ngwena ye nämäne kwen ietre ngwane, niaratre nämäne niken tribe ngwena nemen mren kräbiti aune ru näin ora nuäi mikadre gare ye ngübakäre.

Lionel Casson ni kukwe kira mikaka gare tä niere: “Juta Roma ye nämäne ru mrente mike ne kwe nitre nänkä ye ñaka tädre näin sekwäre nekwäre ru känene nänkäre jai. Ru mrente nämäne nemen nünenkä ñö Tíber nämäne nemen ngätäi jai yekänti. Juta Ostia ye ken bäsi kä kiare kwata kri nämäne abokän te oficina nämäne. Oficina ye nitre ru ngwanka jene jene yekwe: ru nänkäre kä Narbona [nengwane Francia] kokwäre, ru nänkäre kä Cartago [nengwane Túnez] kokwäre, [...] niken jatäri. Nitre nänkä ye nämäne niken kä meden kokwäre ye ererebätä rabadre niken oficina yete ru ngwentari”.

Nändre mrenbiti ye köböire nän nämäne bäri jötrö, akwa kukwe tare nämäne nemen bare arato. Apóstol Pablo nämäne sribi misionero nuainne ye ngwane, ru nikani bä kabre ñöte (2 Cor. 11:25).