LUB caij uas Povlauj nyob, tsis tshua muaj tej nkoj uas thauj tibneeg mus ncig tebchaws. Tej nkoj txwg tsuas thauj khoom xwb. Yog ib tug twg xav caij nkoj mus lwm tebchaws, nws yuav tsum nug seb puas muaj nkoj mus ncaj qhov chaw ntawd. Nws mam thov nrog lawv caij mus xwb. (Tubtxib Tes Haujlwm 21:2, 3) Yog tsis muaj ib lub nkoj mus ncaj qhov chaw ntawd ces nws yuav tsum hloov nkoj ib lub rau ib lub mam txog chaw.​—Tubtxib Tes Haujlwm 27:1-6.

Tiam ntawd tsis muaj nkoj thauj khoom dhia thawm niaj thawm xyoo. Kuj tsis teem sijhawm tias nkoj yuav sawv kev thaum twg thiab. Thaum huab cua zoo thiab cua ntsawj zoo, lawv cia li sawv kev mus xwb. Tiamsis yog lawv hnov uab lag quaj saum hlua nkoj lossis pom muaj nkoj tawg tim ntug hiavtxwv, lawv ntseeg tias yuav ua vij npog ces lawv cia li nres nkoj tsis mus lawm. Thaum ib tug twg ntiav tau nkoj thauj nws mus, nws yuav tsum mus sawv ntawm chaw nres nkoj, tos txog thaum luag tshaj tawm tias lub nkoj yuav sawv kev mam nce mus.

Ib tug yawg sau keeb kwm hu ua Lainaum Khaxoo (Lionel Casson) piav tias yav thaum ub tebchaws Loos npaj ib txojkev los pab kom nrhiav tau nkoj caij yoojyim. Lawv muaj chaw nres nkoj nyob pem hau dej Thainpaws (Tiber). Tsis deb ntawd yog lub zos Auxitia (Ostia) uas muaj ib lub tshav puam loj heev. Puag ncig lub tshav puam muaj neeg ua haujlwm sawv cev rau cov nkoj txwg. Muaj cov uas pab xa khoom mus rau lub nroog Nanpoo (Narbonne) uas nimno nyob hauv Fabkis teb. Kuj muaj cov uas xa khoom mus rau lub nroog Khatantsi (Carthage) uas nimno nyob hauv Thunizia (Tunisia) tebchaws. Tseem muaj lwm cov uas xa khoom rau lwm qhov thiab. Yog leejtwg xav nrhiav nkoj caij ces nws cia li mus nug cov neeg ua haujlwm ntawm tshav puam xwb.

Thaum caij nkoj yeej mus txog sai dua tiamsis muaj tej lub sijhawm lawv kuj raug teeb meem thiab. Thaum Povlauj mus tshaj tawm, nws twb caij nkoj tawg ob peb zaug.​—2 Khaulee 11:25.