KESUAH agi, nadai kapal ke semina dikena mai penumpang maya jeman Paul. Ngambika ulih mindah ngena kapal, penumpang patut nanya orang bukai enti bisi kapal dagang ke deka mindah ngagai endur ke dituju penumpang nya. (SKR. 21:2, 3) Kapal keterubah ke dikena penumpang nya engka enda terus mai iya ngagai endur ke dituju. Tang lebuh kapal nya sangkai ba endur ke semak agi, penumpang nya ulih ngiga kapal bukai ke ulih mai iya ngagai endur ke dituju iya.—SKR. 27:1-6.

Pejalai ngena kapal kesuah agi nitihka musin, lalu kapal nya nadai jadual ti nyemetak. Orang ke belayar kadang-kadang betangguh deka belayar ukai semina ketegal gaya hari ke enda manah, tang engka ketegal sida arapka pengawa beburung. Ambika chunto, engka bisi ninga burung kak bebunyi ba tali layar, tauka meda kapal bukai ke karam ba tebing. Orang ke belayar mega beratika penunga angin. Sida mupuk belayar enti angin nya bepuput ngagai endur ke deka dituju sida. Lebuh penumpang tetemuka kapal ti ulih ditepan iya, iya deka mai barang iya ngagai penyangkai kapal lalu nganti orang madahka maya kapal nya mupuk belayar.

Seiku pakar sejarah ke benama Lionel Casson madahka: “Menua Rome bisi ngaga atur ke ngasuh orang senang ngiga kapal ke deka dikena mindah kin kitu, lalu sida enda ibuh ngiga kapal nya kediri empu. Penyangkai kapal nya bisi ba nanga Sungai Tiber. Semak nanga sungai nya bisi endur ke dikumbai Ostia. Dia bisi town square ke dikelingi mayuh opis. Mayuh ari opis tu diempu kompeni kapal ari mayuh endur penyangkai kapal. Reti nya, kompeni kapal ari menua Narbonne ke dikumbai Perancis kemayaharitu, tauka ari menua Carthage ke dikumbai Tunisia kemayaharitu, . . . sereta endur ke bukai bisi opis sida empu ba Ostia. Sapa-sapa ke begunaka kapal kena mindah, ulih nanya ngagai opis nya nitihka endur ke deka dituju sida.”

Pejalai ngena kapal enda masau jam. Taja pia nya bisi penanggul iya empu. Paul udah beberapa kali ditabanka kapal karam lebuh iya nyadi pengerintis seberai tasik.—2 Kor. 11:25.