PAWLU aten hta, bu hkawm masha ni hpe htaw ai laksan sanghpaw li n nga shi ai. Sanghpaw li hte bu hkawm mayu ai ni gaw, shanhte sa mayu ai shara de sa ai rai htaw ai sanghpaw li hpe hkan tam ra nna, shanhte hpe woi sa mayu ai kun ngu ai hpe mung san ra ai. (Kas 21:2, 3) Tinang sa mayu ai shara de du hkra sanghpaw li n du yang pyi, bu hkawm nga ai laman, sanghpaw li hkring ai shaloi, bu hkawm masha gaw shi sa mayu ai shara hte ni dik htum ai shara de sa na sanghpaw hpe tam mai ai.​—⁠Kas 27:1-6.

Hka lam hkawm ai ni law malawng gaw, du hkra ladaw hta hkan nna hkawm ma ai. Tup hkrak aten masat nna n hkawm ma ai. Du hkra ladaw n kaja ai majaw sha n-ga, shajan shalai kam sham ai lam ni a majaw, sanghpaw pru ai aten hpang hkrat chye ai. Ga shadawn, li sumpan shadaw hta u-hka ak ai nsen na ai (sh) hka hkin gau hta hkali hten nga ai hpe mu ai zawn re ai n kaja ai lamik kumla ni hpe mu ai shaloi, hkrun lam n hkawm mat sai. Sanghpaw li gawt ai ni gaw, nbung lam kaja ai hpe ahkaw ahkang la nna sanghpaw daru kaw nna pru ai. Bu hkawm na wa gaw, shi hpe woi sa na sanghpaw hpe mu yang, sanghpaw daru hte ni dik htum shara hta shi a arung arai ni hte arau sa nga nna, sanghpaw pru na aten shana ai hpe la nga ra ai.

“Roma mare hta gaw bu hkawm na sanghpaw li hpe tam na matu loi ai. Tinang hkrai sanghpaw daru dingyang sa nna sanghpaw hpe tam n ra ai” nga nna labau sara Lione Kasan tsun ai. “Dai sanghpaw daru gaw Tiber hkanu a hka hkin gau hta nga ai. Ostia mare makau hta rung ni shing grup da ai shara kaba langai nga ai. Dai rung ni hta law malawng gaw sanghpaw daru amyu myu a rung ni re. Narbonne [ya Pyintit] sanghpaw rung ni, Kartik [ya Tunisha] sanghpaw rung ni hte kaga sanghpaw rung ni rai nga ai. Bu hkawm na masha gaw gara shara de sa mayu tim, dai rung ni hta sa sagawn mai ai.”

Hka lam hkawm ai gaw, bu hkawm ai masha ni a matu aten hpe hkyam sa shangun ai. Raitim, dai gaw grai shoihpa nga ai. Pawlu gaw shi a sasana hkrun lam hta sanghpaw hten ai hpe law law lang hkrum wa ai.​—⁠2 Ko 11:25.